Read Zotung Chin EZEKIEL 16 Bible Online

EZEKIEL 16 - Zotung Chin bible

EZEKIEL 16

²Ccungccapaw, Jerusalem kha a nungsikunaw nysakuh lah,

³hynhte hopya tua, Bawipaw PACHIA nynh Jerusalem kha hynhte a hopya: Na thokeinaw te na puinaw tuh Kanaan ram nynh thua; na paaw tuh Amor paw thua zah na nung tuh Hit nung nynh thua.

⁴Na puinaw konglangte, na pui nin ze na laerui ae aw khyh hae, tuisingte ae ccikan khyh hae, loi ae noi khyh hae, nolung boei te mah ae lung khyh hae.

⁵Na tungvaw thawccinaw hoite, e hae ccangkheit san cyipya lan ngaethya ae umsahpaw um khyh; na pui nin khe nang kha ae hua hae zah ramkaw kya ae vua hae.

⁶Na pe ka cceih zah, na chiise te na kalouhkupaw kha kae muih. Na chiise kya na touku lyakhe nang kha, “Hiintua!

⁷Loolae kya umpaw thingku hawte lethungtua,” kae cipya. Na lethung, na hang vae zah phe na liaccaw vae; na matei yn doh zah na sang yn sae vae; tuhzemah boeining leite na ccakaete nynh na um.

⁸Na pe bua ka cceih zah kae dotua; nang tuh vawpaw hoi phe na zaw vae. Ka angkiccua adung kha kae dawpah zah, na ccakaete na umpaw kha kae bongpya: Nang kae hawnawpaw byakinnaw kha namaw ryte ka rae zah, nang tuh ka kya-e lang na tang vae, cite Bawipaw PACHIA nynh a ci.

⁹Tetuh nang kha tui te kae sing, na chii kha pong kae ccikanpah zah, chitui kae thuh.

¹⁰Ccaanpaw boeining kha kae lawsakuh zah, saving phanah kha kae nawsaku; nebaleihpaw laaw te kuapaw boei kha kae zingsakuh zah, po-laaw te kuapaw boeining kha kae zingsah.

¹¹Nang kha ccaannawpaw uccaw hae te kae ccaan: Na kuih kya khawccan kae nawsah zah na nging kya si kae oisah,

¹²na naduh kya naduhhuing kae huingsah, na nakua kya nakuahuing kae huingsah zah, na lu vawlan apuithyapaw bawilukhung kae khungsah.

¹³Nang kha sui te ngun te ccaan na thua zah, na boeining tuh nebaleihpaw laaw te kuapaw boeining te po-laaw te kuapaw boeining te ccaanpaw boeining nynh thua. Na looh tuh vaekhui, khoitui te chitui nynh thua. Myarya na puithya zah siapharannung lang na tang.

¹⁴Nang kae pyapaw ka lesaenaw keiccuze na puithyanaw tuh ccing zah, na puithyanaw minthaannaw tuh minphuin hae laku kya a pazaekuh, cite Bawipaw PACHIA nynh a ci.

¹⁵Thuasalama na puithyanaw kha na doliakuh zah na minthaan keiccuze na ohhuakuh, khuaccong hae paw miakaw kya na ohhuakunaw kha ruarua na ua hae.

¹⁶Na boeining kha na lawkuh zah, na beiknaw hminthyaa kha azong aphuinphuin te na ccaan zah, tuin kyakhe na ohhuaku; e tahawpaw hynh um mah um boi khyh zah, malang mah um boi vae lan khyh.

¹⁷Kae pyapaw ka sui te ka ngun athuapaw na kya-e apuithyapaw lung hae kha na lah zah, pise zohtuh hae kha na raeku, te khah-e hae khate na ohhuaku;

¹⁸khah-e zohtuh hae kha ccaanpaw na boeining hae khate na bong zah, ka chitui te ka kya-e mynkhuhpaw kha mih malang khe na nungpya hae.

¹⁹Kae pyapaw looh—kae dangpaw vaekhui, chitui te khoitui kha mih malang khe mynkhuhpaw silawnaw lante na nungpya hae; tuhcite Bawipaw PACHIA nynh a ho.

²⁰Nae saahpya hae paw na ccanung hae te na ccapaw hae kha na hoei hae zah, khah-e zohtuh hae nynh ae hae sah cite si na lawnaw hae. Na ohhuakunaw tuh zaw loh khyh ii!

²¹Ka ccaaw hae kha na theih hae zah, khah-e zohtuh hae kalan khe silawnawpaw lante na pya hae.

²²Na nungsikunaw te na ohhuakunaw balyn keiccuze na zawthaw lya-e na chii kya ohkute, boeining lawku leite na ccakaete na umpaw kha na liathui vae khyh.

²³Hoyleinaw balyn kha na rae koute (Nang na hanlan ngaethya lan kou um, ngaethya lan kou um! cite Bawipaw PACHIA nynh a ci),

²⁴accawngnaw hmin miakaw khe inaw kha na raekuh zah, khualae e laanpi takyh kyakhe ahangpaw hmin kha na duaku;

²⁵laanpi akounaw takyh kya ahangpaw hmin kha na raekuh zah na puithyanaw khate na ohhuaku, na pe a cceihpaw miakaw kya na pyn kha pyakute houhouh na ohhuaku.

²⁶A ohhuakuh rypaw na innpaw hae, Izip hae te na ohhuakuh oh zah, ka thinriasah khylan houhouh na ohhuaku.

²⁷Tukeiccuze nang kha ka kuih kae dyngnua zah na looh kha ka zyasah bung, te na ohhuaku ry keiccuze mih maethahpaw Filistin ccanung hae, na rhaw hae rynaw kalan khe nang kha kae ap.

²⁸Nang tuh a sungkuh kho leipaw na thua keiccuze Assiria hae ryte na ohhuaku oh; minmin ryte na ohhuaku oh zemah na lungryachih kho loh khyh.

²⁹Kungku hae paw ram, Khaldi ram ryte ohhuakunaw houhouh na rae; e hynhte mah na lungryachih lae khyh.

³⁰Bawipaw PACHIA nynh a hopaw tuh, maethya nyh leipaw ohhuanung cyisahnaw, e uccaw hae balyn hynh rawthungte raete, na thinlung tuh pawcih baban mou anyaa;

³¹laanpi akounaw takyh kya inaw na raekuh zah, khualae e laanpi takyh kya ahangpaw hmin kha na raeku. Tuhzemah amee pyapaw kha pawlang na ria khyh keiccuze nang tuh ohhuanung te na lokuh khyh oh.

³²A vawpaw ccelang mingccangpaw kha lehkhanpaw, milae vawpaw te a seinung zu nynh na thua!

³³Ohhuanung hae balyn kha amee pya athua hae; thuasalama nang tuh na sungsah hae paw kha na lasung na pya hae, na ohhuakunaw elang teitei kyate balyn na kalan yn ccia ccaw hae cite pyaruh kha na pya hae.

³⁴Tukeiccuze nang tuh na ohhuakunaw kya ccangpaw nopi hae te na lokuh khyh oh: humhung nynh mah nang kha ohhuaku khylan ae soih khyh; nang kha amee ae pya khyh lya hae khe, nang nynh amee na pya paleih hae; nang tuh milae te na lokuh khyh oh.

³⁵Tukeiccuze, pou ohhuanung, BAWIPAW bya hynh thaetua:

³⁶Bawipaw PACHIA nynh hynhte a ho: Na ohhuakuh ry zah na ccakaete umte na sungsah hae paw ryte na ohhuaku keiccu thuasah, anungsikuhpaw na zohtuh hae balyn keiccu thuasah, na zohtuh hae na pyapaw na ccaaw hae chiise keiccu thuasah,

³⁷hoysahnaw na raekheih oh paw na sungsah hae paw balyn, na sungsah hae paw balyn te na hua hae paw balyn kha ka suelua cih hae; minmin kha teitei kyate balyn kae sueluanua cih hae zah mih malang khe na ccakaete kae nung cih, tetuh minmin nynh na ccakaete na umpaw kha khaleih ae muih cih hae.

³⁸Milae vawpaw te a sei hae paw nopi hae te ccungccaw theihpaw nopi hae kha byapia hawte nang kha bya kae pia cih zah, eiung thinriate na tungvaw kya chiise ka thuasah cih.

³⁹Minmin kuih kya kae ap cih, minmin nynh na ohhuakunaw hmin kha a roh cih hae zah, ahangpaw na hmin hae kha a roh cih hae; na boeining kha ae phae cih hae zah apuithyapaw na uccaw hae kha a lah cih hae, te na ccakaete ae cciataw cih hae.

⁴⁰Ccungccaw patae kha ae konua cih hae zah minmin nynh lung te ae deih cih hae, mih thaloi te zoihtatyh lan ae bae cih hae.

⁴¹Minmin nynh na inn hae kha maee te ae soipah cih hae zah nopi hae patae muihnaw khe bya ae pia cih hae; na ohhuakunaw kha ka thangsah cih zah, amee mah na pya vae lan khyh hae.

⁴²Tuhcite ka thinrianaw kha ka daesakuh cih zah, na tungvaw ka eiung vae lan khyh; lungdaete ka um cih zah, ka thinria vae lan khyh.

⁴³Na zawthaw lya kha na ning vae zah, e uccaw hae balyn kya ka thin nae riasah vae keiccuze na cyisahnaw hae kha na lu vawlan kae khang cih, cite Bawipaw PACHIA nynh a ci. Na nungsikunaw balyn vawlan khe ohhuaku rynaw seinaw kha na raechih khyh tou?

⁴⁴Dotua, phungtangbya a mangpaw miakaw nynh nang na kong kha, “Nung lothya alonung ccanung,” cite phungtangbya a mang cih hae.

⁴⁵Nang tuh a vawpaw te a ccaaw hae kha a huatu na nung ccanung nynh na thua; nang tuh mih vawpaw hae te mih ccaaw hae kha a huatu na unonung hae mih unonung nynh na thua. Na nung tuh Hit nung thua zah, na paaw tuh Amor paw nynh thua.

⁴⁶Na unung tuh a ccanung hae ryte nang te palung lang a umpaw Samaria kha nynh thua; na neitawnung tuh a ccanung hae ryte nang te alia lang umpaw Sodom kha nynh thua.

⁴⁷Nang nynh mih hiinzia kyalya kha zui leite, mih nungsikunaw thyhte na cyibua; ccyh sosoh kya minmin laeze na hiinzia balyn tuh arohhua.

⁴⁸Bawipaw PACHIA nynh, kae tuh ka hiin thyhte, nang te na ccanung hae nynh na cyi oh hawte, Sodom te a ccanung hae nynh cyih khyh hae.

⁴⁹E hynh na neitawnung Sodom seinaw nynh thua: aning te a ccanung hae tuh a lysakuh hae, looh phe beih lan hoi hae zah ngaengan hiinhoyte a um hae, thuasalama ryachi hae te anyaa hae paw kha bawm khyh hae.

⁵⁰Minmin tuh lysakuh hae zah ka malang anungsikuhpaw uccaw kha a rae hae; tukeiccuze tuh-e uccaw tuh he ka muih te minmin kha ka vua hae.

⁵¹Samaria nynh nang na seinaw angankuh zeih seinaw rae khyh; nang nynh anungsikuh huapaw kha minmin laeze na rae vae, te na raepaw anungsikuhpaw balyn liate na unonung hae mih dingnaw kha na langsaku vae.

⁵²Nang nynh thethyanaw kha ccoutua, pawccecize na unonung hae hanlan azoi huapaw byapianaw kha na thuakhaepya vae hae; minmin nynh a rae hae paw laeze anungsikuh hua lante na raepaw na seinaw hae keiccuze minmin tuh nang laeze a dinghua hae. Tukeiccuze na maethah sah lah, thethyanaw ccoutua, pawccecize na unonung hae mih dingnaw kha na langsah vae.

⁵³Sodom te a ccanung hae, Samaria te a ccanung hae kha ka kikhae cih hae zah, nanning hiinnaw kha mah mih ccungccaw hae ryte bua ka hoysah cih,

⁵⁴tetuh minmin hanlan lungtangnaw lang na tang cih, na cyipaw balyn keiccuze na thethah cih zah na maethah cih.

⁵⁵Na unonung Sodom te a ccanung hae, na unonung Samaria te a ccanung hae tuh langmawlya hawte bua athuathui cih hae zah, nang te na ccanung hae mah langmawlya hawte bua na thuathui cih oh.

⁵⁶Na hoyleinaw langsah athua maw, na lysaku lya kha na unonung Sodom tuh na munglae kya byaphung lang na mang khyh tou? Atu tuh nang ae theihrya hae paw na pepan e hae balyn, Aram ccanung hae te a innpaw hae balyn hanlan thuasah, Filistin ccanung hae hanlan thuasah nang tuh dothatheihpaw nynh na thua vae.

⁵⁷

⁵⁸Nang tuh na ohhuaku rynaw te na nungsikunaw keiccuze detahnaw kha na teing cih, cite BAWIPAW nynh a ci.

⁵⁹Bawipaw PACHIA nynh hynhte a ho: Na cyi hawte na tungvaw ka cyih cih, nang nynh byakinnaw kha na roh zah, thyalawkute byakinkunaw kha pawlang na ria khyh;

⁶⁰tuhzemah na ngawphue lyaze nang te ka raepaw ka byakinnaw kha ka liathui cih zah, zungzae tynpaw byakinnaw kha nang te ka rae cih.

⁶¹Nang te byakinnaw ka la raepaw keiccu thua leite, na unonung hae athua hae paw na unung te na neitawnung kha parouh mawte na ccanung hae lang he kae pya hae te, na hiinzia kha na liathui cih zah na maethah cih.

⁶²Ka byakinnaw tuh na kya ka tynsah cih zah, kae tuh BAWIPAW ka thuapaw kha na nyh cih,

⁶³Na cyipaw balyn kha he kae ngaethya te, na tuathui cih zah na ngaeangthua cih, te na maethya keiccuze na khalang kha papin na awthui vae lan khyh, cite Bawipaw PACHIA nynh a ci.