Read Zotung Chin EZEKIEL 17 Bible Online

EZEKIEL 17 - Zotung Chin bible

EZEKIEL 17

¹BAWIPAW bya tuh ka kya yn thua zah:

²Pou ccungccapaw, Israel hae kha phohpawbya phohpyate tousenaw phungpaw kha hynhte hopah hae:

³Bawipaw PACHIA nynh hynhte a ho: Aming tuh azong aphuinphuin te pyaa zah, a sake alepaw, aming myarya thaawpaw, mosipi lepaw sa kheit tuh Lebanon mua lang yn thua. Aning nynh sidar ku adung kha kyng zah,

⁴adungpaccy atoihpaw kha a khya; tuh-e tuh kungkunaw ram lang cciakhae zah, kungkunaw khua kyakhe a lin.

⁵Te ram kyate ccacii kha lah zah, lae hoy kyakhe a lin; su ku hawte tui alungnaw khe a lin.

⁶Tuh-e aku tuh yn toih zah ange tuh lo zah apazaekuhpaw, nebabynpaw, ange hae tuh mosipi kalan khe lobung hae zah, atharui hae tuh a thadynnaw khe a sahbung hae paw misu ku lang yn tang. Tuhcite misu ku lang a tang; ange hae tuh toih hae zah anaw asae.

⁷Aming thaaw zah a sake myarya lepaw ccangpaw mosipi lepaw sa kheit a um. Te dotua! E misu ku nynh atharui hae kha tuh-e mosipi kalan khe a saw; tuh-e misu ku nynh tui mue khylan, ange hae kha tuh-e mosipi kalan khe a losah. Tuh-e misu ku tuh lin a la thuanaw hmin kyate

⁸tui alungnaw lae hoy kyakhe lin athua, tuhteze nynh ange atoih cih, anaw asae cih zah aphu-epaw misu ku lang a tang cih.

⁹Tukeiccuze hynhte hopah hae: Bawipaw PACHIA nynh hynhte a ho: Tuh-e misu ku tuh hoynaw a mue cih tou? Tuh-e misu ku tuh baleih naansah khylan te athae kha thuhsah khylan, anaw atoih thawpaw kha naansah khylan, mosipi nynh atharui kha khaee lan khyh tou? Atharui ryte poh khaee khylan, athawsaepaw kuih khyhze athungpaw rhawkaw ho lan khyh.

¹⁰Ccangpaw hmin kya linthui he athua te, hiinte alethung cih tou? Nithua lang e khisan nynh he a mung te, khaleih naan lan khyh tou? A lethungnaw hmin kyakhe naan lan khyh tou?

¹¹Te BAWIPAW bya tuh ka kya yn thua zah:

¹²Rhawtho a mang hae paw kha atu hopah hae: E tousenaw bya asuilan hynh na nyh khyh oh tou? Hynhte hopah hae: Babilon siapharan tuh Jerusalem lang yn thua zah, Jerusalem siapharan te a kuihkaw e bawi hae kha kyng hae zah Babilon lang a kikhae hae.

¹³Siapharan ciihan lu kheit kha ko zah, byakinsakute tuh-e paw ryte byakinnaw kha a rae, (aning nynh ram lungkhu e lupi hae kha a cciakhae hae),

¹⁴tuhteze nynh peenaw tuh zakaw a sangsakuh cih zah, amaw te amaw kha hangsahku leite, a byakinnaw kha zuite a thadyn kho cih.

¹⁵Thuasalama aning nynh Judah siapharan kha rhawthonua zah, marang hae te rhawkaw patae kha ngia khylan Izip ram langkhe locceihtu hae kha a saw hae. Aning tuh hoynaw a mue cih tou? Hynhcihawpaw uccaw a cyihpaw tuh a lue kho cih tou? Byakinnaw kha rote a lue kho cih tou?

¹⁶Bawipaw PACHIA nynh a hopaw tuh: Kae tuh ka hiin thyhte, thanccingte siapharan lang a khangtupaw siapharan kya-e byakinnaw kha pawlangria khyh zah, aning te a raekheih hae paw a byakinnaw kha a ro keiccuze siapharan lang a khangtupaw a umnaw Babilon khua khe aning tuh a chih cih.

¹⁷Ccungccaw patae kha chia khylan, Babilon hae nynh rhawtuk nawlan laephi kha thaete dohsah hae zah koihlunawpaw khualungrua kha he a rae hae te, Faro nynh athungpaw a rhawkaw hae te aphupi hae ryte aning kha rhawtuknaw kya bawm lan khyh.

¹⁸Jerusalem siapharan nynh thyalawkute byakinkupaw kha pawlangria khyh zah, byakinnaw kha a ro keiccu thuasah, e uccaw balyn hynh a cyi keiccu thuasah aning tuh lue lan khyh.

¹⁹Tukeiccuze Bawipaw PACHIA nynh a hopaw tuh: Kae tuh ka hiin thyhte, aning nynh pawlang a ria leipaw ka byakinpyakunaw kha thuasah, aning nynh a ropaw ka byakinnaw kha thuasah a lu vawlan ka ccawsah ccaccing cih.

²⁰Ka miabu te ka bong cih zah, ka kaang kya a kae cih; Babilon lang ka cciakhae cih zah, ka tungvaw lungzinaw hoi leite a sei keiccuze tuin khua khe bya ka pia cih.

²¹A rhawkaw hae kyate a ccuepaw balyn tuh thaloi te a chih cih hae, a hiinhy hae paw tuh teitei lang balyn phiariphiarae a phiakuh cih hae; tetuh kae, BAWIPAW nynh ka hopaw kha na nyh cih oh, a ci.

²²Bawipaw PACHIA nynh hynhte a ho: Myarya hangpaw sidar ku adungpaccy kya-e atoih thawpaw kha ka lah cih zah, ka lin cih. Atoih thawpaw adungpaccy kya-e atoihpaw kha ka khya cih zah, hang zah asung-epaw mua vawlan khe ka lin cih.

²³Israel mua ahang huaccepaw vawlan khe tuh-e tuh ka lin cih, tuh-e nynh ange atoih cih zah athae thae cih, te asung-epaw sidar lang a tang cih. tuh-e thingku kaw khe pavaw phuinccing a um cih hae; asake saepaw ahysuepaw phuinccing nynh tuh-e thingnge a mynlyh kyakhe bu a luakuh cih hae.

²⁴Ramkaw e thingku balyn nynh BAWIPAW ka thuapaw kha yn nyh cih hae. Ahangpaw thingku kha ka nesah zah, anepaw thingku kha ka hangsah; hinlalyhpaw thingku kha ka rousah zah, aroupaw thingku kha hinlalyh lan ka nung. Kae, BAWIPAW nynh ka ho vae; tuh-e tuh ka ccingsah cih.