Read Zotung Chin EZEKIEL 18 Bible Online

EZEKIEL 18 - Zotung Chin bible

EZEKIEL 18

¹BAWIPAW bya tuh ka kya yn thua zah:

²“Nungpaaw hae nynh ariapaw misu thae kha ae hae zah, ccaaw hae tuh mih hawzaw,” cite nanning nynh Israel ram te asekuhpaw e phungtangbya kha palei na ho oh paw hynh paw na rynaw oh mou?

³Bawipaw PACHIA nynh a hopaw tuh, Kae tuh ka hiin thyhte, e phungtangbya hynh Israel ram kya na mang vae lan khyh oh.

⁴Hiinnaw balyn tuh ka kya-e nynh thua; nungpaaw hae hiinnaw thuasah, ccaaw hae hiinnaw thuasah ka kya-e nynh thua: A seipaw ccungccaw tuh a chih cih.

⁵Ccungccapaw tuh ding zah ahmepaw te akyhpaw kha a cyi ze thuasah—

⁶mua hae vawlan khe ae khyh, Israel phin kya-e zohtuh hae kha beik khyh, milae zu kha seikhae khyh, nopiny a nyhpaw kha naekuh khyh,

⁷humhung kha mah tuaasah khyh, laebah a lahtu nynh a ponpaw uccaw kha bua a kii, milae uccaw luade khyh, a vuelawpaw kha a looh pyabua zah a ccakaete umpaw kha boeining a bongpya ze thuasah,

⁸ato lawkute phua koiisakuh khyh hae, hoyleinaw kyate a kuih a synku, byalung hae paw laku kya ahmete bya a pia,

⁹ka phungbya hae kha a zui, ka phungzae hae kha pekite zui zah lungzite rya a law ze thuasah—tuhcihawpaw ccungccaw tuh miding nynh thua; aning tuh a hiin ccaccing cih, cite Bawipaw PACHIA nynh a ci.

¹⁰Tuh-e paw a ccapaw tuh a puathopaw, ccungccaw a theihpaw,

¹¹e uccaw hae hankhakheit kha a cyi (a paaw nynh khah-e hae kha a la cyi khyh zemah), mua hae vawlan khe a ae, milae zu kha a seikhae,

¹²ryachi hae te anyaa hae paw kha a tuaa a sah hae, milae uccaw a luade, ponpaw uccaw kha kii khyh hae, zohtuh hae kha a beik, anungsikuhpaw kha a cyi,

¹³ato kha a lawkuhtupaw athua lanze, aning tuh a hiin cih tou? Hiin lan khyh. Aning nynh anungsikuhpaw e uccaw balyn kha a cyi vae; aning tuh a chih ccaccing cih; a chiise tuh amaw tungvaw accah cih.

¹⁴Thuasalama, e ccungccapaw ccapaw tuh a paaw nynh a la raepaw seinaw balyn kha muih zah hoyte tua zah tuhcite cyihbua khyh,

¹⁵mua vawlan khe ae khyh, Israel hae kya-e zohtuh hae kha beik khyh, milae zu kha seikhae khyh,

¹⁶humhung kha mah tuaasah khyh, a pon hae paw uccaw kha lawkuh khyh, milae uccaw luade khyh, a vuelawpaw kha a looh pyabua zah a ccakaete umpaw kha boeining te a bongpya,

¹⁷hoyleinaw kyate a kuih kha a synku, ato kha lawkuh khyh zah ka phungzae hae te ka phungbya hae kha a zui lanze, aning tuh a paaw hoyleinaw keiccu chih lan khyh; aning tuh a hiin ccaccing cih.

¹⁸A paaw tuh a rysawthah zah a uno uccaw kha a luade, te a minphuin hae laku khe ahoy leipaw kha a cyi keiccuze a hoyleinaw keiccu a chih.

¹⁹Tuhzemah nanning nynh, “A paaw hoyleinaw keiccuze a ccapaw tuh pawccemou teing leite a um cih?” na ci oh. A ccapaw nynh ahmepaw te akyhpaw kha cyih zah, ka phungbya balyn kha pekite a zui lanze, aning tuh a hiin ccaccing cih.

²⁰A seipaw ccungccaw tuh a chih cih. A ccaaw tuh a paaw hoyleinaw keiccuze teing lan khyh, a paaw tuh a ccapaw hoyleinaw keiccuze teing lan khyh; miding tuh a dingnaw mee kha a mue cih zah, ccungccaw hoyleipaw tuh a hoyleinaw mee kha a mue cih.

²¹Thuasalama ccungccaw hoyleipaw nynh a raepaw a seinaw balyn kyate maeleihkuh zah ka phungbya balyn kha zuite ahmepaw te akyhpaw kha a cyi lanze, aning tuh a hiin ccaccing cih; chih lan khyh.

²²Aning nynh a la cyiseipaw seinaw hae kha ccuinpya thua lan khyh; aning tuh a la cyipaw dingnaw keiccuze a hiin cih.

²³Ccungccaw hoyleipaw nynh a chipaw kha ccapyh san ka lungtua zawtou? A hiinzia kha paleihkuh zah a hiinpaw kha ka lungtuahua khyh tou? cite Bawipaw PACHIA nynh a ci.

²⁴Thuasalama midingpaw nynh a dingnaw kyate maeleihkuh zah hoyleinaw kha raete, ccungccaw hoyleipaw nynh a cyipaw anungsikuhpaw uccaw kha a cyi lanze, aning tuh a hiin cih tou? Aning nynh a la cyipaw adingpaw cyisahnaw kha liathuipya thua lan khyh; a la cyiseipaw hynhunaw te a la raepaw seinaw keiccuze aning tuh a chih cih.

²⁵Tuhzemah nanning nynh, “Bawipaw nynh a cyipaw tuh hme khyh,” na ci oh. Pou Israel hae, atu ngaetua oh: Ka cyipaw tuh hme khyh tou? Ahme leipaw tuh nanning nynh na cyi oh paw kha thua khyh tou?

²⁶Miding nynh a dingnaw kyate maeleihkuh zah hoyleinaw kha a rae lanze, tuh-e hoyleinaw keiccuze aning tuh a chih cih; a la cyipaw hoyleinaw keiccuze aning tuh a chih cih.

²⁷Tuhawte, ccungccaw hoyleipaw nynh a la cyipaw hoyleinaw kha maetawkuh zah, ahmepaw te akyhpaw kha a cyi lanze, a hiinnaw kha a khumkuh cih.

²⁸Aning nynh a la cyipaw cyiseinaw balyn kha hoyte tua zah a maetawku keiccuze aning tuh a hiin ccaccing cih; chih lan khyh.

²⁹Tuhzemah Israel hae nynh, “Bawipaw nynh a cyipaw tuh hme khyh,” a ci hae. Pou Israel hae, ka cyipaw tuh hme khyh tou? Ahme leipaw tuh nanning nynh na cyi oh paw kha thua khyh tou?

³⁰Tukeiccuze, pou Israel hae, nae hiinzia thyhte nanning balyn kha bya kae pia cih oh, cite Bawipaw PACHIA nynh a ci. Nae seinaw balyn kha maetawkuh oh lah, ngaesikuh oh; tuhkhyhze tuh hoyleinaw tuh nae ronaw athua cih.

³¹Kae kha rawsete na rae oh paw seinaw balyn kha vua oh lah, thinlung thawpaw te tuanaw thawpaw lawkuh oh! Pou Israel hae, pawccemou na chih cih oh?

³²Lukhakheit nynh a chipaw kha ka lungtua khyh, paleihkuh oh lah, hiintua oh, cite Bawipaw PACHIA nynh a ci.