Read Zotung Chin EZEKIEL 19 Bible Online

EZEKIEL 19 - Zotung Chin bible

EZEKIEL 19

¹Israel siapharan ccapaw hae hanlan rawkhuite na ho lanpaw tuh:

²Na nung tuh chindeih hae kyaze pawcihawpaw chindeih pinung mou athua! Chindeih ano hae paw kyaze amaw a taw hae kha a do-oih hae.

³Aning nynh a do-oihpaw ataw sa kheit tuh chindeih anopaw lang yn tang zah, saw teipaw kha a ccangku; aning nynh ccungccaw hae kha a ae hae.

⁴Minphuin hae nynh amaw kong kha thae hae zah mih bungzou; aning kha mih saehung lungkhu khe a kyng hae, sivawrui te he hae zah Izip ram lang a cciakhae hae.

⁵A nung nynh ngaehoi um vae khyh cipaw nyh zah, lungrote he a um te, ataw hae kya-e sa kheit kha lah zah chindeih nopaw lang a tangsah.

⁶Tuh-e chindeih nopaw nynh mah chindeih hae kya saw kha tei lan a via bungthung; te chindeih nopaw lang yn tang zah, saw teipaw kha a ccangku; aning nynh ccungccaw hae kha a ae hae.

⁷Aning nynh mih rhawlungrua hae kha ropah hae zah mih khua hae kha phe a zosahpya hae; aning nynh a siaruapaw roi keiccuze ram te a lungkhu umpaw balyn tuh pong siikuh hae.

⁸A pepan umpaw khua takyh kya-e minphuin hae nynh amaw kha a dou hae; miabu te aning kha bong hae zah mih saehung lungkhu khe a kyng hae.

⁹Sivawrui te khii hae zah abawng lungkhu a nung hae, te Babilon siapharan kalan a cciakhae hae; Israel mua vawlan khe a roi kha thae athua vae khyh ccaw cite thong lungkhu a nung hae.

¹⁰Na nung tuh misu khokhu lungkhu, tui kin kya linpaw misu ku hawte nynh thua, tui alung keiccuze athae thae zah, akaran te phe abeih.

¹¹Tynkarangpaw akaran tuh uktu bawi kya-e ccoi lang a tang; akaran hae patae laku khe myarya hang lante a thadyn; akaran patae ryte ahang keiccuze phe alangkuh.

¹²Thuasalama tuh-e tuh thinriate poh khaee thua zah laephi kya vua athua; nithua lang e khisan nynh karae rousah zah, athae tuh akhuakuh, tynkarangpaw akaran tuh karae rou zah, maee nynh phe a u.

¹³Atu vae tuh, tui um leinaw, karae roupaw ramkaw khe linthui athua.

¹⁴Akaran kyate maee pou zah, akaran te athae kha phe a u, tetuh tuin kyakhe uknawpaw ccoi rae nawlan tynkarangpaw akaran um vae khyh. E tuh rawkhuinaw thua zah, rawkhui nawlan mang athua.