Read Zotung Chin EZEKIEL 2 Bible Online

EZEKIEL 2 - Zotung Chin bible

EZEKIEL 2

¹Aning nynh kae yn hopyapaw tuh: Pou ccungccapaw[1], thadyntua, bya kae hopah cih.

²Te aning nynh bya he yn hopah te, muisaw tuh ka lungkhu lang tee zah ka ccu te yn thadynsah; te bya yn hopyapaw kha ka thae.

³Aning nynh yn hopyapaw tuh: Ccungccapaw, nang kha Israel hae kalan, kae yn doutu dou a mangpaw minphuin kalan kae saw cih; minmin te mih minpaaw hae nynh atunin cia ka tungvaw a sei vae hae.

⁴E ciihan tuh a bunglepaw te a lungkhungpaw nynh thua. Nang kha minmin kalan kae saw cih zah minmin kyakhe, “Bawipaw PACHIA nynh hynhte a ho,” cite na hopah cih hae.

⁵(Minmin tuh dou a mangpaw phin thua hae zah), a ngae hae zemah thuasah, a ngae khyh hae zemah thuasah minmin laku kya profeh lu kheit a um cipaw a nyh cih hae.

⁶Pou ccungccapaw, thabu hae te hinpaw hae nynh nang kha ae koihlu hae zah zekang hae laku kya na um zemah minmin kha rih nan hae, mih bya kha mah rih nan; mih maesue keiccuze na lungroh nan sah, pawccecize minmin tuh dou a mangpaw phuin nynh thua hae.

⁷Minmin tuh dou a mangpaw phuin thua hae zah, a ngae hae zemah thuasah, a ngae khyh hae zemah thuasah ka bya hynh na hopah cih hae.

⁸Thuasalama, pou ccungccapaw, nang tuh kae hopyapaw hynh ngae lah, khah-e dou a mangpaw phuin hawte dou a mangpaw thua nan; na khalang aw lah, kae pyapaw hynh aetua, yn ci.

⁹Ka do zah, ccaw azeikuhpaw ccakue kha phang a ccyngpaw kuih nynh ka kalan yn dyngkupaw kha ka muih.

¹⁰Aning nynh tuh-e ccakue tuh ka malang khe a daw; nulang malang te azeikuhpaw tuh-e ccakue kyakhe rawnaw bya, khuinaw bya te ngaethyanaw bya kha azeikuh.