Read Zotung Chin EZEKIEL 20 Bible Online

EZEKIEL 20 - Zotung Chin bible

EZEKIEL 20

¹Kum sarinaw kum, sawpaw sah pangawnaw, nin haw nin khe Israel piccan hae tuh BAWIPAW kha tuanaw ngia khylan oun thua hae zah ka malang a haung hae.

²Te BAWIPAW bya tuh ka kya yn thua zah:

³Ccungccapaw, Bawipaw PACHIA nynh a hopaw kha Israel piccan hae kha hopah hae: Kae kha tuanaw ngia khylan pawccemou nae thua oh? Kae tuh ka hiin thyhte, nanning nynh tuanaw nae ngia kho lan khyh oh, cite Bawipaw PACHIA nynh a ci.

⁴Ccungccapaw, minmin kha bya na pia cih hae tou? Minmin kha bya na pia cih hae tou? Mih minpaaw hae nynh a rae hae paw nungsikunaw kha nysah hae lah,

⁵minmin kha hopah hae: Bawipaw PACHIA nynh hynhte a ho: Israel kha ka po lyaze, Izip ram kya kamaw toulou kha minmin kya nysakute, Kae tuh BAWIPAW nae Pachia nynh ka thua, cite Jakob ciihan hae kha bya ka kinpyaku hae.

⁶Tuin nin khe, Izip ram kyate kae poukhae cih oh zah, nanning hanlan ka popaw ram, mateitui te khoitui aluanaw ram, ram balyn laeze aphu-e huaccepaw ram lungkhu lang kae teekhae cih oh, cite minmin kha bya ka kinpyaku hae.

⁷Nanning lu kheit cci nynh nae mit lungtuakhae kupaw anungsikuhpaw uccaw hae kha vua oh lah, Izip ram e zohtuh khate naemaw toulou kha thusakuh nan oh; kae tuh BAWIPAW nae Pachia nynh ka thua.

⁸Thuasalama minmin nynh kae kha yn dou hae zah ka bya ngae khyh hae; mih mit lungtuakhaekupaw anungsikuhpaw uccaw hae kha lu kheit nynh sanmah vua khyh hae zah, Izip ram e zohtuh hae kha vua khyh hae. Tetuh ka thin-unaw kha mih tungvaw ka bu cih zah, Izip ram lungkhu kya ka thinrianaw kha ka mangnua cih hae, cite ka tuaku.

⁹Thuasalama minmin a umnaw hae minphuin ccangpaw hae muihnaw khe ka min kha thusah athua khyh nawlan, ka min hanlan rya ka lah zah, minphuin ccangpaw hae muihnaw khe ka nysakuh hae zah, minmin kha Izip ram kyate ka poukhae hae.

¹⁰Tukeiccuze Izip ram kyate ka poukhae hae zah ramkaw lang ka cciakhae hae.

¹¹A zuipaw miakaw nynh a hiin ccaw hae cite, ka phungbya hae kha ka pya hae zah ka phungzae hae kha ka muihsah hae.

¹²Tuhpiaze kae, BAWIPAW nynh minmin kha ka thyaasah hae cipaw a ny nawlan hae, kae te minmin laku muisahnaw lante ka sabbath hae kha ka pya hae.

¹³Thuasalama Israel hae nynh ramkaw kya kae kha yn dou hae; a zuipaw miakaw nynh a hiinnaw lanpaw ka phungbya hae kha zui khyh hae zah, ka phungzae hae kha a vua hae; te ka sabbath hae kha myaryamaw a thusah hae. Tetuh minmin kha ro khylan, ramkaw kya ka thin-unaw kha mih tungvaw bu lan cite ka tuaku.

¹⁴Thuasalama ka poukhae hae paw kha a muih hae paw minphuin ccangpaw hae muihnaw khe ka min kha thusah athua khyh nawlan, ka min hanlan rya ka law.

¹⁵Tuhpiaze ram balyn laeze aphu-e huaccepaw, mateitui te khoilutui aluanaw ram, nanning kae pya vae oh paw ram lungkhu langkhe kae teekhae lan khyh oh, cite ramkaw khe bya ka kinpyaku hae,

¹⁶pawccecize mih thinlung tuh mih zohtuh hae nulang a zuiku keiccuze ka phungzae hae kha vua hae zah ka phungbya hae kha zui khyh hae, ka sabbath hae kha mah a thusah hae.

¹⁷Thuasalama minmin kha ngaethya ka umsah hae zah ka roh khyh hae, ramkaw kya phe ka thangsah khyh hae.

¹⁸Ramkaw kya mih ccaaw hae kha ka hopah hae zah, Nae nung nae paaw hae kya-e phungbya kha zui nan oh, mih phungzae kha mah zui nan oh, mih zohtuh hae khate naemaw toulou kha thusakuh nan oh.

¹⁹Kae tuh BAWIPAW nae Pachia nynh ka thua; ka phungbya hae kha zui oh lah, ka phungzae hae kha hoyte zui oh,

²⁰Kae, BAWIPAW tuh nae Pachia ka thuapaw kha na ny nawlan oh, kae te nanning laku kya muisahnaw athua cih paw ka sabbath hae kha thyaasah oh.

²¹Thuasalama mih ccaaw hae nynh kae kha yn dou hae; a zuipaw miakaw nynh a hiinnaw lanpaw ka phungbya hae kha zui khyh hae zah, ka phungzae hae kha hoyte zui khyh hae; ka sabbath hae kha a thusah hae. Tetuh ka thin-unaw kha mih tungvaw ka bu cih zah, ramkaw khe ka thinrianaw kha ka mangnua cih hae, cite ka tuaku.

²²Thuasalama ka poukhae hae paw kha a muih hae paw minphuin ccangpaw hae muihnaw khe ka min kha thusah athua khyh nawlan, ka min hanlan tuate ka kuih kha zya ka synku.

²³Tuhpiaze ramkaw khe minmin hanlan bya ka kinkuh zah, minmin kha minphuin ccangpaw hae laku kya phiariphiarae ka nung cih hae zah, ram hae kalan ka saw cih hae,

²⁴pawccecize minmin nynh ka phungzae hae kha zui khyh hae, ka phungbya hae kha vua hae zah ka sabbath hae kha a thusah hae, mih minpaaw hae kya-e zohtuh hae kha a beik hae.

²⁵Te ahoy leipaw phungbya hae kha ka pya hae zah, a hiinkhae kho lei hae paw phungzae hae kha ka pya hae.

²⁶Minmin nynh kae tuh BAWIPAW ka thuapaw kha a ny nawlan hae, minmin kha ro khylan mih ccatawccaw balyn khate silawnaw rae hae zah, mimaw mih lasung ccaccei mawkhate minmin kha ka thusah hae.

²⁷Tukeiccuze, ccungccapaw, Bawipaw PACHIA nynh a hopaw kha Israel hae kalan hopya tua hae: Nae minpaaw hae nynh ka tungvaw lungzi leite ka min kha bua yn thusah hae.

²⁸Minmin kha pya lan bya ka kinpyaku hae paw ram lungkhu langkhe he ka teekhae hae te, minmin nynh a muih hae paw ahangpaw mua miakaw khyhze thingku anaw abungpaw miakaw kyakhe silawnaw rae hae zah ka thin yn riasah hae; te tuin kyakhe mynkhuhpaw kha maee te upah hae zah, niapaw silawnaw kha a rae hae.

²⁹(Na ccianua oh paw ahangpaw hmin tuh pawmou athua? cite ka khia hae. Tukeiccuze tuh-e tuh Bamah cite atunin cia a ko hae.)

³⁰Tukeiccuze Bawipaw PACHIA nynh a hopaw kha Israel hae kalan hopya tua hae: Nae minpaaw hae kya-e anungsikuhpaw uccaw hae nulang zuikuseite, minmin nynh a cyi hae hawte naemaw toulou kha na thusakuh cih oh tou?

³¹Nae lasung kha na pya oh zah nae ccaaw hae kha silaw nawlan maee te ute naemaw toulou kha nae zohtuh hae khate atunin cia na thusaku oh. Pou Israel hae, nanning nynh kae kha tuanaw nae ngiakuh kho cih oh tou? Kae tuh ka hiin thyhte, nanning nynh tuanaw nae ngia kho lan khyh oh, cite Bawipaw PACHIA nynh a ci.

³²“Aening tuh minphuin ccangpaw hae hawte thua oh sih lah, thing te lung a beik hae paw ramccungccaw hae hawte thua oh sih,” cite na tuaku oh paw kha papin cyihkuh lan khyh.

³³Bawipaw PACHIA nynh a hopaw tuh: Kae tuh ka hiin thyhte, athungpaw kuih, dyngpaw kuih te bupaw thinrianaw khate nanning kha kae uk cih oh.

³⁴Phiariphiarae na umnaw oh ram hae te minphuin hae kyate athungpaw kuih, dyngpaw kuih te bupaw thinrianaw khate kae cciakhae cih oh zah kae suelua cih oh;

³⁵minphuin ccangpaw hae ramkaw langkhe kae cciakhae cih oh zah, tuin kyakhe mitmae hawiliakute nanning kha bya kae pia cih oh.

³⁶Izip ram ramkaw kya nae minpaaw hae kha bya ka pia hae hawte, nanning kha bya kae pia cih oh, cite Bawipaw PACHIA nynh a ci.

³⁷Ka hoitang kaw khe kae cciasah cih oh zah, byakinnaw lungkhu khe kae nung cih oh.

³⁸Kae yn dou hae paw te yn rawse hae paw kha nanning laku kyate poh ka thuaa cih hae; ramccang ccungccaw lante a umnaw hae ram kyate minmin kha ka poukhae hae zemah, Israel ram lungkhu lang tee lan khyh hae. Te kae tuh BAWIPAW ka thuapaw kha na nyh cih oh.

³⁹Pou Israel hae, Bawipaw PACHIA nynh hynhte a ho: Nae balynte atu cceih oh lah, nae zohtuh hae kha beik oh; thuasalama atu te malang tuh ka bya na ngae khyh oh zemah, nae lasung hae te nae zohtuh hae khate athyaapaw ka min kha na thusah vae lan khyh oh.

⁴⁰Pawccecize, Bawipaw PACHIA nynh a hopaw tuh: athyaapaw ka mua, Israel mua ahangpaw vawlan khe Israel hae balyn nynh ram lungkhu kya kae kha yn beik cih hae; tuin kyakhe minmin kha leh ka khan cih hae, te tuin kyakhe nae kya-e ahlu hae, ahoy huaccepaw nae lasung hae te athyaapaw nae uccaw balyn kha kae ngia cih oh.

⁴¹Phiariphiarae na umnaw oh ram hae te minphuin hae kyate nanning kha kae poukhae oh zah he kae suelua oh te, nanning kha mynkhuhpaw hawte kae ccou cih oh; minphuin ccangpaw hae muihnaw khe ka thyaanaw kha nanning laku kya ka langsakuh cih.

⁴²Nae minpaaw hae kalan pya lan bya ka kinpyaku hae paw ram, Israel ram lungkhu lang he kae teekhae oh te, kae tuh BAWIPAW ka thuapaw kha nae nyh cih oh.

⁴³Tuin kyakhe naemaw toulou na thusakunaw oh paw nae cyisahnaw te nae hiinzia balyn kha na liathui cih oh zah, na la cyi oh paw hoyleinaw balyn keiccuze naemaw toulou nae luathuakuh cih.

⁴⁴Pou Israel hae, ahoy leipaw nae hiinzia, nae cyisahnaw athahpaw thyhte thua leite, ka min hanlan nanning kha he kae ccuepe oh te, kae tuh BAWIPAW ka thuapaw kha nae nyh cih oh, cite Bawipaw PACHIA nynh a ci.

⁴⁵BAWIPAW bya tuh ka kya yn thua zah:

⁴⁶Ccungccapaw, alia langkhe na mae kha hawi lah, alia lang kha rawsenaw bya honua tua, te Negeb ram umpaw tuhpi kha rawsete profehbya hopya tua;

⁴⁷Negeb tuhpi kha hynhte hopya tua, BAWIPAW bya hynh thaetua: Bawipaw PACHIA nynh hynhte a ho, Na tungvaw kya maee ka tyh cih zah, na kya umpaw thingku hinlalyhpaw miakaw te aroupaw thingku miakaw kha a u cih; aruapaw maee tuh chih lan khyh zah, alia langte palung langkhe pawpaw balyn kha khaleih a u cih.

⁴⁸Kae, BAWIPAW nynh tuh-e maee kha ka tyh cipaw kha ccungccaw balyn nynh a nyh cih hae; tuh-e maee tuh chih lan khyh.

⁴⁹Tetuh kae nynh, “Pou Bawipaw PACHIA! Minmin nynh ka konglang ho hae zah, ‘Aning tuh tousenawpaw phungpaw a hotupaw thua khyh tou?’ a ciku hae,” cite ka hopya.