Read Zotung Chin EZEKIEL 22 Bible Online

EZEKIEL 22 - Zotung Chin bible

EZEKIEL 22

¹BAWIPAW bya tuh ka kya yn thua zah:

²Ccungccapaw, nang, ccungccaw theihpaw khuapi kha bya na pia cih tou, bya na pia cih tou? Aning nynh anungsikuhpaw a cyisahnaw balyn kha hopya tua.

³Bawipaw PACHIA nynh a hopaw kha minmin kalan hynhte hopya tua hae: Amaw lungkhu khe chiise luasah zah, zohtuh hae kha raekute amaw toulou a thusakuhpaw khuapi ccyh tuh a thua vae.

⁴Na luasahpaw chiise keiccuze na sei vae, na raekupaw zohtuh hae keiccuze na nungsikuh vae; namaw nynh na ccyh kha na naesaku vae, khyapyapaw na ccyh tuh a thua vae. Tukeiccuze minphuin hae malang khe na the kae thyasah zah, ram balyn nynh saryapaw lang kae rae vae.

⁵A thethah zah siarisiarae a sianua hae paw nang kha namaw te na sawkuh oh paw te na naekuh oh paw nynh ae sarya cih hae.

⁶Na kya umpaw Israel bawi hae nynh mih huhan raveih thyhte ccungccaw kha a chia hae.

⁷Na kyakhe nung te paaw kha a theihrya hae; na kya umpaw minphuin ccangpaw hae kha uccaw luade hae zah, ngawraw hae te nomae hae kha na kyakhe a tuaa a sah hae.

⁸Athyaapaw ka uccaw hae kha pawlang na ria khyh oh zah ka sabbath hae kha na thusah oh.

⁹Ccungccaw chia khylan ccungccaw a lawty hae paw, mua vawlan a ae hae paw, ohhuakunaw seinaw rae hae paw tuh na kya a um hae.

¹⁰Na lungkhu khe mih paaw hae zu kha a seikhae hae; nopiny a ny ccyh hae khe nopi hae kha a seikhae hae.

¹¹Ccungccaw abang nynh mih innpaw hae zu seikhaete anungsikuhpaw kha a rae hae; abang nynh mih monung hae ryte anungsikuhpaw ohhuakunaw kha a rae hae; na kya umpaw abang nynh mih ccianung athuapaw mih paaw ccanung khate anungsikuhpaw kha a rae hae.

¹²Na lungkhu khe, minmin nynh ccungccaw chia khylan amee a lawku hae; nanning nynh phua ato lawkute na koiisaku oh, nae innpaw hae uccaw kha na luade oh; nanning nynh kae kha nae ning vae oh, cite Bawipaw PACHIA nynh a ci.

¹³Dotua, ahme leite na mue oh paw uccaw, te na lungkhu kya aluapaw chiise keiccuze ka kuih ka bia.

¹⁴Na tungvaw rya he ka lah te, na rawthungnaw tuh a ngaesang kho cih tou? Na kuih thungnaw tuh atyn kho cih tou? Kae, BAWIPAW nynh ka ho vae paw kha ka cyih cih.

¹⁵Nanning kha minphuin ccangpaw hae kya phiariphiarae kae nung cih oh zah ram hae kyakhe kaheikalah kae phia cih oh, te nae nungsikunaw kha kae lawpah cih oh.

¹⁶Nanning keiccuze minphuin hae muihnaw kya ka minthusah athua cih; te nanning nynh kae tuh BAWIPAW ka thuapaw kha na nyh cih oh.

¹⁷BAWIPAW bya tuh ka kya yn thua zah:

¹⁸Ccungccapaw, Israel hae tuh ka hanlan sivaw-ia lang phe tang vae hae; mih balyn mawte ngun, sohin, ccephui, sivaw te kuee hawte thua hae zah, somaee kya tuisahte sivaw-ia lang phe tang vae hae.

¹⁹Tukeiccuze Bawipaw PACHIA nynh hynhte a ho: Nanning balyn tuh sivaw-ia lang na tang vae oh keiccuze Jerusalem ngaelung langkhe kae suelua cih oh.

²⁰Ngun, sohin, sivaw, kuee te ccephui kha tuisah khylan somaee lungkhu nung hawte, nanning kha ka thinrianaw te ka thin-unaw khate Jerusalem khua khe kae pum cih oh zah kae tuisah cih oh.

²¹Nanning kha sueluate ka thinrianaw maee kha kae mungnua cih oh zah, tuin khua lungkhu khe atui lang na tang cih oh.

²²Ngun tuh somaee lungkhu atui hawte, nanning tuh tuin khua kyakhe na tui cih oh; BAWIPAW nynh nae tungvaw kya ka thinrianaw ae bu oh paw kha na nyh cih oh.

²³BAWIPAW bya tuh ka kya yn thua zah:

²⁴Ccungccapaw, Israel ram kha hopya tua: Nang tuh accikankuh leipaw ram, thinrianaw nin kya khuaarah leipaw ram nynh na thua.

²⁵Ram lungkhu umpaw a bawi hae tuh saw tei zah a siapaw chindeih te nynh aloku hae; ccungccaw hae kha tei hae zah, sisua te aphutepaw uccaw hae kha a lawku hae; ram lungkhu kya nomae lang patae a tangsah hae.

²⁶A ranpibawi hae nynh ka ccangpyanaw kha roh hae zah athyaapaw ka uccaw hae kha a thusah hae; athyaapaw te athyaa leipaw kha laesah leite, athyaapaw te athyaa leipaw kong kha ccangpah khyh hae, minmin laku kya kae kha thethyasah khylan, ka sabbath hae kha pawlangria khyh hae.

²⁷A bawi hae tuh saw a tei hae paw ram-ui hae te nynh aloku hae, ccungccaw chiate, ahme leite muenaw hanlan ccungccaw hiinnaw kha a ro hae.

²⁸Profeh hae nynh mah BAWIPAW nynh a ho lei pite, “Bawipaw PACHIA nynh hynhte a ho,” cite hote ahme leipaw vizin kha muih hae zah, hynbya a ho hae, arawpaw sii kha a thuh hae.

²⁹Ram kya-e ccungccaw hae nynh nangsepaw te luadepaw rya kha a law hae; a ryachipaw te anyaapaw kha tuaasah hae zah, ramccang hae kha ahme leite a luade hae.

³⁰Ram kha ka ro khyh nawlan, khualungrua a raethui cih paw te ating vae paw khualungrua kya ram ccelang ka malang a thadyn cih paw kha ka ccung zah lu kheit sanmah ka muih khyh.

³¹Tukeiccuze ka thinrianaw kha mih tungvaw kya ka bu; ka thinrianaw maee te minmin kha ka u hae; mih cyisahnaw kha mih lu vawlan ka ccawsah, cite Bawipaw PACHIA nynh a ci.