Read Zotung Chin EZEKIEL 23 Bible Online

EZEKIEL 23 - Zotung Chin bible

EZEKIEL 23

²Ccungccapaw, nung nungkheit ccanung hae lu ning a um hae;

³minmin tuh he a liaccaw hae te, Izip ram kya ohhuanung lang a tang hae; mih matei kha miapah hae zah mih liaccady by kha a pom hae.

⁴Atawccanung min tuh Oholah cikuh zah a neitawnung min tuh Oholibah acikuh. Minmin tuh ka kya-e lang tang hae zah, ccanung ccapaw hae kha a saahku hae. Oholah tuh Samaria thua zah Oholibah tuh Jerusalem nynh thua.

⁵Oholah tuh ka kya-e athua pite a ohhuakuh; a sungsah hae paw Assiria hae,

⁶meizong boeining a lawkuh hae paw rhawbawi hae, uktu hae te kawpyatu bawi hae, apuithyapaw ccangvae hae, marang rhawkaw hae kha a ry hae.

⁷Assiria pise asung-e hae paw balyn ryte a ohhuaku hae; aning nynh a ry hae paw miakaw kya-e zohtuh hae balyn khate amaw toulou kha a thusaku.

⁸Izip ram kya a la raepaw ohhuakunaw kha umtaw khyh; tuin kyakhe a ngawphue lyaze pise hae nynh ikhae hae zah a liaccady matei kha miapyate a seikhae hae.

⁹Tukeiccuze aning nynh a ry hae paw a sungsah hae, Assiria hae kuih kalan khe ka ap vae.

¹⁰Minmin nynh a boeining kha phae hae zah a ccakaete a nung hae; a ccanung hae te a ccapaw hae kha a kyngpya hae; amaw thaloi te a chia hae. Aning tuh byapianaw teing zah, nopi hae laku kya byaphung lang a tang.

¹¹A neitawnung Oholibah nynh tuh-e tuh a muih zemah a unung laeze ohhuaku rynaw thinlung hoihua zah a ohhuakuh hua.

¹²Assiria hae, uktu hae te kawpyatu bawi hae, sivaw rhawtuk-uccaw lawkuh hae paw rhawbawi hae, marang rhawkaw hae apuithyapaw ccangvae hae balyn kha aning nynh a ry hae.

¹³Aning nynh a nungsikunaw kha ka muih; parouh mawte alokuhpaw laanpi kha a zui hae.

¹⁴Thuasalama Oholibah nynh houhouh a ohhuaku; pang kya soikuhpaw pise hae zuh, asi sepaw soikuhpaw Khaldi hae zuh,

¹⁵tuh-e azuh hae tuh mih tae kya taeccia cciakuh hae zah mih lu kya haetapaw pungde a deku hae, mih balynte bawi hae—mih thokeinaw ram tuh Khaldi ram athuapaw Babilon hae te nynh aloku hae.

¹⁶Minmin kha he a muih hae te, ohhuaku rynaw thinlung hoi zah, Khaldi ram umpaw tuh-e hae kalan khe locceihtu a saw hae.

¹⁷Babilon hae tuh sungsakunaw ikhung kalan cceih hae zah aning kha a thusah hae; te minmin ryte amaw toulou kha a thusakuh koute, nungsikuh babae lante minmin kyate a ki.

¹⁸A ohhuakunaw te a ccakaete a umpaw kha khawsung leite he a langsakuh tuh, a unung tungvaw ka lua ka aethua hawte, aning tungvaw mah ka lua ka aethua.

¹⁹A ngawphue lyaze Izip ram kya a ohhuaku ccyh kha liathuite houhouh a ohhuaku,

²⁰pise athuanaw hae paw mih e tuh lann e te lokuh zah, mih buatui tuh rangtepaw buatui te alokuhpaw a sungsah hae kha a ry hae.

²¹Izip hae nynh na matei ae miapya lya hae te na mateidung ae moipya lya hae, na ngawphue lya-e ohhuakuh rynaw kha na ngaethui.

²²Tukeiccuze, pou Oholibah, Bawipaw PACHIA nynh hynhte a ho: Mih tungvaw na lua-aethuapaw na sungsah hae kha nang rawsete ka thosakuh cih hae zah, teitei langte balyn nang kha kae konua cih hae:

²³tuh-e hae tuh Babilon hae te Khaldi hae balyn, Pekod hae, Shoa hae te Koa hae ryte Assiria hae balyn, tuh-e hae kya-e apuithyapaw ccangvae hae, uktu hae, kawpyatu bawi hae, bawi hae te rhawbawi hae, marang rhawkaw hae balyn nynh athua hae.

²⁴Minmin nynh palung langte rhawkaw patae ryte marangle hae te uccaw phunawpaw le hae khate nang kha ae thuanua cih hae; khawriaphua adihpaw, khawriaphua alepaw te sivawlukhung khate teitei langte balyn nang kha ae koihlu cih hae, kae nynh minmin kha byapianaw kaw ka pya cih hae zah, nang kha mih phungzae thyhte bya ae pia cih hae.

²⁵Minmin nynh na tungvaw mih thin ae rianua ccaw hae cite, ka thinrianaw kha kae sawnua cih. Na naduh te na nakua kha ae aw cih hae zah, a hiinhy hae paw tuh thaloi te a chih cih hae. Na ccanung hae te na ccapaw hae kha a kyng cih hae, a hiinhy hae paw kha maee te a u cih hae.

²⁶Na boeining kha ae phae cih hae zah, aphutepaw na lung hae kha a lawkuh cih hae.

²⁷Tuhcite na ohhuaku rynaw thinlung te Izip ram kyate nae thuakhaekupaw na ohhuakunaw kha ka thangsah cih; khah-e hae kha na ngae vae lan khyh zah, Izip ram kha na liathui vae lan khyh.

²⁸Bawipaw PACHIA nynh hynhte a ho: Nang nynh na huapaw ccungccaw hae kuih kalan te na lua na aethuapaw ccungccaw hae kuih kalan khe kae ap cih;

²⁹nang kha ae hua hae thyhte ae cyih cih hae, na ryalaw mee athae balyn kha a lawkuh cih hae zah, na ccakaete ae cciataw cih hae, na ohhuakunawpaw na e kha alang cih. Na ohhuaku rynaw te na ohhuakunaw nynh

³⁰hynh-e hynh na tungvaw ae thuakhaepya vae, pawccecize minphuin ccangpaw hae ryte na ohhuakuh zah, mih zohtuh hae khate namaw toulou kha na thusaku.

³¹Na unung laanpi kha na zuibua vae; tukeiccuze a banang kha na kuih kya kae pya cih.

³²Bawipaw PACHIA nynh hynhte a ho: Akopaw te akhupaw na unung banang kha na neih cih; tuh-e banang tuh patae accawngpaw thua zah, nang tuh ae sarya cih hae zah ae nuinse cih hae.

³³Nang tuh ruinaw te ngaethyanaw khate phe na beih cih. Na unung Samaria banang tuh ri lan umpaw te ronaw banang nynh thua;

³⁴tuh-e banang tuh na neih cih zah phe athang cih, banang akoinahpaw kha na khae cih zah, na matei kha thoh ae aw cih; phe ka ho vae, cite Bawipaw PACHIA nynh a ci.

³⁵Tukeiccuze Bawipaw PACHIA nynh a hopaw tuh: Kae kha nae ning zah na nulang nae vua keiccuze ohhuaku rynaw na hoipaw te na ohhuakunaw mee kha teingtua.

³⁶BAWIPAW nynh kae yn hopyapaw tuh: Ccungccapaw, Oholah te Oholibah kha bya na pia cih hae tou? Anungsikuhpaw mih cyisahnaw kha hopya tua hae.

³⁷Pawccecize minmin nynh milae vawpaw te sei hae zah ccungccaw kha a chia hae; mih zohtuh hae khate milae vawpaw kya seinaw a rae vae hae; ka hanlan yn saahpya hae paw ccaaw hae kha heize zohtuh hae kalan khe looh lang a pya vae hae.

³⁸Tuhpiaze ka tungvaw kya e hynh a cyi ung hae: Tuin nin khe ka beikinnthyaa kha thusah hae zah ka sabbath hae kha thethyasah hae.

³⁹Mih ccaaw hae kha mih zohtuh hae hanlan a chia nin hae khe, ka beikinnthyaa kha thusah khylan a lungkhu lang a tee hae. E hynh minmin nynh ka inn lungkhu a cyi hae paw nynh thua.

⁴⁰Minmin nynh locceihtu hae kha sawte asawnaw e pise hae kha kosah hae zah oun thua hae. Minmin hanlan tui na singpyaku hae, na mit kya azong na thuhpakuh hae zah ccaankunawpaw uccaw khate na ccaanpyaku hae;

⁴¹myarya lypaw ikhung vawlan khe na haung zah, tuh-e ikhung malang aphaekuhpaw ccaboi vawlan khe ka kya-e mynkhuhpaw te ka chitui kha na nung.

⁴²ngaluin-ngaluin ccae hae paw zapi hae roi tuh accae, siarisiarae um hae paw patae te ramkaw te oun thuakhae hae paw arui hae paw mah a umbua hae; minmin nynh nopi hae kuih kyakhe khawccan nawsakuh hae zah, mih lu vawlan khe apuithyapaw bawilukhung kha a khungsah hae.

⁴³Milae vawpaw te seinaw raekheihte a tawkhaekuhnung tetou minmin tuh a ohhuaku hae, cite ka ho.

⁴⁴Lukhakheit nynh ohhuanung kha a teenua hawte, minmin nynh aning kha a teenua hae. Tuhcite minmin nynh a ohhuakuh ry hae paw Oholah te Oholibah kha a teenua hae.

⁴⁵Adingpaw byapiatu hae nynh, minmin tuh milae vawpaw kya seinaw te ccungccaw chiapaw seinaw kha a rae hae, cite a ho cih hae; pawccecize minmin tuh milae vawpaw kya seinaw raetu hae te ccungccaw theihtu hae nynh athua hae.

⁴⁶Bawipaw PACHIA nynh hynhte a ho: Tuh-e nopi hae kha thinphangsah khylan te uccaw luade khylan, zapi hae kha mih kalan konua oh.

⁴⁷Zapi hae nynh minmin kha lung te a deih cih hae zah thaloi te a bae cih hae; mih ccanung hae te mih ccapaw hae kha a chiapah cih hae zah, mih inn kha maee te a soipah cih hae.

⁴⁸Nopi balyn nynh raeringkuh hae zah nanning hawte a ohhuaku khyh nawlan hae, ram lungkhu kya ohhuakunaw kha ka zosah cih.

⁴⁹Ohhuaku na rynaw oh keiccu ae liaru cih oh zah, aseipaw nae zohtuh hae keiccu detahnaw na teing cih oh; te kae tuh Bawipaw PACHIA ka thuapaw kha na nyh cih oh.