Read Zotung Chin EZEKIEL 24 Bible Online

EZEKIEL 24 - Zotung Chin bible

EZEKIEL 24

¹Kum takuanaw, sawpaw sah hawnaw, nin haw nin khe BAWIPAW bya tuh ka kya yn thua zah:

²Ccungccapaw, atunin ccaccei maw a min kha zeitua. E nin ccaccei kyahin Babilon siapharan nynh Jerusalem kha a koihlu vae.

³Rhawtho a mangpaw ccungccaw hae kha tousenaw phungpaw hopah hae, Bawipaw PACHIA nynh hynhte a ho: Maee vawlan khe ang khang lah, tui kha phoihtua;

⁴ang lungkhu khe sange hae kha thungtua, ahoypaw sange hae, aphae, alya te aru ahoy hae paw khate phe biasah tua.

⁵Tuuphu kya-e ahoy huapaw kha lawtua lah, thingtung hae kha ang kaw khe pumnua tua; sange hae kha ccohsahnua lah, ang lungkhu umpaw aru hae kha mah ccohsahnua tua.

⁶Tukeiccuze Bawipaw PACHIA nynh hynhte a ho: Chiise aluapaw khuapi, chihhangkae zah athyaa leipaw ang hanlan ngaethya lan kou um! Sange hae kha nge kheit koute nge kheit ccungthydung leite phe thang lan lawtua.

⁷Pawccecize khuapi nynh a luasahpaw chiise tuh tuh-e khuapi lungkhu kya a um; tuh-e chiise tuh laephi nynh a thei ccaw cite laephi vawlan lae khyh; raerae langpaw lung vawlan khe nynh a lae.

⁸Ka thinriasah khylan te phulaw khylan khuapi nynh a luasahpaw chiise kha raerae alangpaw lung vawlan khe ka lae vae, tuhteze nynh chiise kha thei kho thua lan khyh.

⁹Tukeiccuze Bawipaw PACHIA nynh hynhte a ho: Chiise aluapaw khuapi hanlan ngaethya lan kou um! Maeething apumkuhpaw myarya lepaw kha ka rae cih.

¹⁰Thingtung hae kha pum oh lah, maee tyh oh; saw kha phe voi lan thung oh lah, amynkhuhpaw aphuinphuin kha thungbia oh, aru hae kha maee nynh u hae sah.

¹¹Maee-e vawlan khe ang ccakae khate khangtua, tetuh ang tuh aso cih, daw tuh ase cih zah, a lungkhu umpaw athupaw tuh palae atui cih, chihhang tuh maee nynh phe a u cih.

¹²Alakaw lan ka thaw ka bangsaku han; thaawkalae lan chihhangkaepaw tuh zo kho khyh. Maee te zo kho khyh.

¹³Anungsikuhpaw na ohhuaku rynaw kha ka thyaasah zemah, na nungsikunaw tuh thyaa lae khyh; ka thinrianaw kha na tungvaw ka ccingsah mawlaezung na thyaa lan khyh.

¹⁴Kae, BAWIPAW nynh ka ho vae; accyh zawbia vae zah rya ka lah cih. Kae synpakuh lan khyh. Na ozia te na cyisahnaw thyhte de kae tah cih, cite Bawipaw PACHIA nynh a ci.

¹⁵BAWIPAW bya tuh ka kya yn thua zah:

¹⁶Ccungccapaw, na sungsah huapaw kha na kyate vaekheihmawte ka lah cih; tuhzemah na rah na khui lan khyh, na mitphi mah lua lan khyh.

¹⁷Zyazyate hawkhaeku tua; a chihpaw elang rawkhuite um nan. Na pungde khungkuh lah, na phanah nawkuh; na mung palung lang e kha bongsakuh nan, a rah a khui hae paw kya-e looh kha ae nan, a ci.

¹⁸Tukeiccuze awkhua ccyh khe ccungccaw hae kha ka hopah hae zah, zete ccyh kya ka zu tuh a chih. Te awkhualan awkhua tuh kawpya ka thua thyhte ka cyih.

¹⁹Tetuh ccungccaw hae nynh kae kha, “E na cyipaw hynh kaening hanlan paw suilan mou cipaw nae hopah lan khyh tou?” cite yn khia hae.

²⁰Te minmin kha ka hopya hae: BAWIPAW bya tuh ka kya yn thua:

²¹Israel hae kha hopah hae, Bawipaw PACHIA nynh hynhte a ho: Na lysakunaw oh paw nae huhan, nae mit lungtuanaw te nae thinlung nynh a rypaw ka beikinnthyaa kha the ka thyasah cih; na cciataw oh paw nae ccanung hae te nae ccapaw hae tuh thaloi te a chih cih hae.

²²Te ka cyi hawte na cyih cih oh; nae mung palung lang e tuh na bongkuh lan khyh oh, a rah a khui hae paw kya-e looh kha na ae lan khyh oh.

²³Nae pungde kha na khungkuh cih oh zah nae phanah kha na nawkuh cih oh; na rah na khui lan khyh oh, nae hoyleinaw keiccuze na zo na dae cih oh zah, lu kheit te lu kheit hawkhaekute na umnuakuh cih oh.

²⁴Tetuh Ezekiel tuh nanning elang muihsahnaw athua cih; aning nynh a cyi hawte na cyihbua cih oh. E hynh he yn cyihkuh te, Bawipaw PACHIA ka thuapaw kha na nyh cih oh.

²⁵Ccungccapaw, mih rhawlungrua, mih lungtuanaw te mih phu-enaw, myarya a do ry hae paw te mih thinlung nynh a rypaw kha thuasah, mih ccanung hae te mih ccapaw hae kha thuasah ka lawpya hae ccyh yn thua tetuh,

²⁶a luepaw lukhakheit nynh na kya yn thua cih zah, nang kha the ae thaesah cih.

²⁷Tuin nin vae tuh yn luetupaw kalan khe na khalang na aw cih zah, yccae leite um vae leite bya na hopah vae cih. Tuhcite minmin hanlan nang tuh muihsahnaw na thua cih; te BAWIPAW ka thuapaw kha a nyh cih hae.