Read Zotung Chin EZEKIEL 25 Bible Online

EZEKIEL 25 - Zotung Chin bible

EZEKIEL 25

¹BAWIPAW bya tuh ka kya yn thua zah:

²Ccungccapaw, na mae kha Ammon hae kalan hawi lah, profehbya honua hae.

³Ammon hae kha hopya tua hae, Bawipaw PACHIA bya kha ngaetua oh: Bawipaw PACHIA nynh hynhte a ho: Thethyasah athuapaw ka beikinnthyaa kha thuasah, ccungccaw daesah athuapaw Israel ram kha thuasah, kyngte ramccang lang cciakhae athuapaw Judah hae kha thuasah nanning nynh he na muih oh te, nae lungrythua keiccuze,

⁴nanning kha nithua lang e ccungccaw hae kalan kae ap cih oh. Minmin nynh nanning laku kya mih ryahmin kha ae tahnuakuh cih oh zah, nanning laku khe mih bu hae kha ae saknua cih oh; nae thingthae kha ae aepah cih oh zah, nae vaetua mateitui kha ae niapah cih oh.

⁵Rabbah khua kha kalauh hae paeenaw lang ka rae cih zah Ammon ram kha tuukhia lang ka rae cih. Tetuh BAWIPAW ka thuapaw kha na nyh cih oh.

⁶Pawccecize Bawipaw PACHIA nynh hynhte a ho: Nanning nynh Israel ram kha rawsete nae kuih na bianua oh, na ccu na suanuakuh oh zah eiungte nae lungtua keiccuze,

⁷ka kuih kae dyngnua vae oh zah, minphuin ccangpaw hae kalan luadepaw uccaw hawte kae ap cih oh. Minphuin ccangpaw hae kyate nanning kha kae vua cih oh zah, ram hae kyate kae maemih cih oh; nanning kha kae roh cih oh. Tetuh kae tuh BAWIPAW ka thuapaw kha na nyh cih oh.

⁸Bawipaw PACHIA nynh hynhte a ho: Moab nynh, Judah hae tuh minphuin ccangpaw hae balyn te alokuh, cite a ho keiccuze,

⁹Moab tuh ram akin-akae, ramri kya-e khua hae kyate tho zah ram phu-enaw athua hae paw Beth-jeshimoth, Baal-meon te Kiriathaim khua hae kha rhaw hae ka tuksah cih hae.

¹⁰Moab te Ammon ram kha nithua lang e ccungccaw hae kalan ka pya cih hae. Tukeiccuze Ammon tuh minphuin hae laku kya liathui thua vae lan khyh,

¹¹Moab ram kha bya ka pia cih. Tetuh kae tuh BAWIPAW ka thuapaw kha a nyh cih hae.

¹²Bawipaw PACHIA nynh hynhte a ho: Edom nynh Judah hae tungvaw phulah ry zah rawsete phu a lawnaw kya myarya a sei,

¹³tukeiccuze Bawipaw PACHIA nynh hynhte a ho, Edom kha ka kuih ka dyngnua cih, a kya umpaw ccungccaw te sarangpaw hae kha ka roh cih zah, ccungccaw phe ka daesah cih; Teman khua kyate Dedan khua kyacia thaloi te a chih cih hae.

¹⁴Ka ccungccaw Israel kuih khate Edom kha phu ka lah cih; ka thinrianaw te ka thin-unaw thyhte minmin nynh Edom tungvaw a cyih cih hae; minmin nynh phu ka lawpaw kha a nyh cih hae, cite Bawipaw PACHIA nynh a ci.

¹⁵Bawipaw PACHIA nynh hynhte a ho: Filistin hae nynh adae kho leipaw rhawkunaw khate phulawnaw kha rae hae zah, eiungnaw thinlung khate ro khylan a liaru hae,

¹⁶tukeiccuze Bawipaw PACHIA nynh hynhte a ho, Filistin kha ka kuih ka dyngnua cih, Kereth hae kha ka vua cih hae zah, rili kin kya a laehy hae paw kha ka roh cih hae.

¹⁷Myarya ccihpaw detahnaw khate minmin kha phu ka lah cih hae. Te minmin kha phu he ka lah hae te, minmin nynh kae tuh BAWIPAW ka thuapaw kha a nyh cih hae.