Read Zotung Chin EZEKIEL 26 Bible Online

EZEKIEL 26 - Zotung Chin bible

EZEKIEL 26

¹Kum haw lae kheitnaw, sawpaw masaty nin khe BAWIPAW bya tuh ka kya yn thua zah:

²Ccungccapaw, Tair nynh Jerusalem konglang kha ho zah, “Alei! Minphuin hae koikua athuapaw Jerusalem tuh aroh vae; a thuakaw hae tuh ka hanlan ahungkuh vae; kae tuh houhouh ka hoirum vae cih, atu aning tuh aroh vae,” a ci.

³Tukeiccuze, Bawipaw PACHIA nynh hynhte a ho: Pou Tair, nang kha kae rawse! Rili nynh tuileih kha a thosah hawte, nang rawsete minphuin patae kha ka thosakuh cih hae.

⁴Minmin nynh Tair kya-e khualungrua kha a roh cih hae zah, a innhangpaw hae kha a phou cih hae. A laenoi kha phe thyaa lan ka phi cih zah lung ccite a umpaw lang ka rae cih.

⁵Rili ngaelung kya miabu reinawpaw hmin lang ka tangsah cih. Kae nynh phe ka ho vae, cite Bawipaw PACHIA nynh a ci. Tair tuh minphuin hae nynh a luade hae paw lang a tang cih,

⁶ram lungkhu e khua hae kya um hae paw kha thaloi te chia athua cih hae. Tetuh minmin nynh kae tuh BAWIPAW ka thuapaw kha a nyh cih hae.

⁷Pawccecize Bawipaw PACHIA nynh hynhte a ho: Siapharan hae siapharan athuapaw thahlang e Babilon Siapharan Nebukhadnezzar kha marang hae, marangle hae, marang rhawkaw hae, athungpaw te huhan a hoipaw rhawkawphu ryte Tair khua lang ka cciakhae cih.

⁸Ram lungkhu e khua hae kya um hae paw kha aning nynh thaloi te a theih cih hae. Aning nynh rhawlungrua kha ae raenua cih, marung kha ae thaekhaw cih zah, khawriaphua kha ae hangnua cih.

⁹Na khualungrua kha thingtung khate a tingsah cih zah, na innhangpaw hae kha a hae khate a tya cih.

¹⁰A marang hae tuh myarya alung hae keiccuze, vuiping nynh nang kha phe ae bong cih. Aroh vae paw khuapi lungkhu lang tee hawte, aning nynh na koikua hae kya he a tee te, marang rhawkaw hae, leccu hae te marangle hae roi keiccuze na khualungrua tuh ahy cih.

¹¹A marang ccukoh hae khate na laanpi balyn kha a syde cih. Na ccungccaw hae kha thaloi te a theih cih hae, tynkarangpaw na tung hae tuh laephi kya a khuliakuh cih hae.

¹²Na hoirumnaw kha ae luade cih hae zah na uccaw hae kha ae lawpakuh cih hae; na khualungrua kha a tingsah cih hae zah, ahoypaw na inn hae kha a roh cih hae. Na lung hae, thingphe hae te laephi hae kha tui lungkhu lang a phung cih hae.

¹³Hlaw na sahpaw roi kha ka daesah cih; na tintang roi kha thae thua vae lan khyh.

¹⁴Nang kha lung ccakaepaw lang kae rae cih zah, miabu reinawpaw hmin lang na tang cih. Nang kha papinmaw raethui na thua vae lan khyh, pawccecize kae, BAWIPAW nynh phe ka ho vae, cite Bawipaw PACHIA nynh a ci.

¹⁵Bawipaw PACHIA nynh Tair kha hynhte a hopya: Na lungkhu kya ccungccaw chianaw um zah, vaemaw mue hae paw nynh he a hawkhaekuh hae te, na khuliakupaw roi keiccuze rili kin um hae paw tuh thyngku leite a um cih hae zawtou?

¹⁶Tetuh rili kya-e uktu bawi balyn tuh mih bawitungkhung kyate a rung cih hae; mih angkiccua te kou puithya lan ccaanpaw mih boeining kha a khahkuh cih hae. Boeining kha thyngku biate a lawkuh cih hae zah laekhu kya a haung cih hae; atu te atu a thyngkuh cih hae zah, na tungvaw acyihkuhpaw keiccuze a siikuh cih hae.

¹⁷Minmin tuh nang na hanlan mih ngaethah cih zah nang kha: Pou a minthaanpaw khuapi, vaekheih lyaze rili kya athungpaw khuapi, ri lan a umnaw kha ram pynpi kya phe a biasahpaw khuapi, nang te na kya um hae paw tuh pawtemou rili hae kyate phe na zo oh!

¹⁸Na khuliaku nin khe rili kin e ram hae tuh a thyngkuh hae; nang nynh na zo keiccuze rili lungkhu umpaw tuikoih hae tuh a siikuh hae.

¹⁹Bawipaw PACHIA nynh hynhte a ho: Ccungccaw a um leipaw khuapi hawte nang kha ccungccaw adaepaw khuapi lang kae rae zah, rili kha na tungvaw lang thuakhaete, tui alepaw te nang kha he kae vusah te,

²⁰langmaw lyaze Hunghua lungkhu lang a rungbung hae paw ccungccaw hae kalan khe nang kha kae nangde cih, langmawlya te roh hae zah Hunghua lungkhu lang a cceihbung hae paw ryte lae kaw khe kae umsah kheih cih oh, tuhteze nynh na kyakhe khuasahpaw ccungccaw um lan khyh zah ahiin hae paw ram kya umnaw hmin na hoi lan khyh.

²¹Ri lan umpaw athangnaw kalan khe kae thuakhae cih zah, nang tuh na um vae lan khyh; nang kha ccung zemah papinmaw muih na thua vae lan khyh, cite Bawipaw PACHIA nynh a ci.