Read Zotung Chin EZEKIEL 27 Bible Online

EZEKIEL 27 - Zotung Chin bible

EZEKIEL 27

¹BAWIPAW bya tuh ka kya yn thua zah:

²Ccungccapaw, Tair hanlan rawkhuite um lah,

³rili kin umpaw khua, rili kin e ram patae kya-e ccungccaw hae nynh kungkunaw hae khua athuapaw Tair kha hopya tua, Bawipaw PACHIA nynh hynhte a ho: Pou Tair, nang nynh, “Kae tuh ka puithyanaw phe ccing,” cite na ho vae.

⁴Na ramri tuh rili hae ngaelung nynh a um; nang ae raetu hae nynh na puithyanaw kha phe ccing lan ae rae hae.

⁵Senir ram e maeccaw ku hae kha na thingphe lang a sue hae; kohlung boei tung rae nawlan Lebanon ram e sidar ku kha a law hae.

⁶Bashan ram e phaesi thing khate na kohlung zawnawpaw accong kha a rae hae; Saipras e maeccaw ku khate na kohlung suarui kha rae hae zah saepanua khate a ccaan hae.

⁷Na kohlung kya zopaw boei tuh Izip ram kya-e kou puithya lan ccaanpaw boei ahoypaw thua zah, na kohlung kya asaekuhpaw alan hawte nynh thua; na kohlung kya adawkuhpaw boei tuh Elishah tuikoih kyate thuakhaepaw meizong te sephaphuhpaw nynh thua.

⁸Sidon khua te Arvad khua kya um hae paw tuh na kohlung a zawtu nynh thua hae; na kyakhe ryalaw athyapaw ccungccaw hae um hae zah, minmin tuh na kohlung a zawtu nynh thua hae.

⁹Gebal piccan hae te mih kuihhae ahoypaw kohlung raetu hae tuh na kya a um hae; rili kya-e sanphalung balyn te a zuitu hae tuh nang te uccaw reku khylan na kya a um hae.

¹⁰Paras[3], Lud[4] te Put[5] minphuin hae tuh na rhawkawphu, athungpaw na rhawkaw hae kya a umbua hae, minmin nynh khawriaphua te lukhung kha ae saepah hae zah, phu-enaw kha ae pya hae.

¹¹Arvad hae te na rhawkaw hae nynh na khualungrua po voilu lan rhaw ae viapya hae; Gamad hae nynh na innhangpaw kyate rhaw ae viapya hae. Mih the bawng hae kha na khualungrua po voilu lan a baw hae; na puithyanaw kha phe ccing lan ae raepya hae.

¹²Na sisua tuh myaryamaw lung zah, Tarshish khua ryte uccaw reku bungthungnaw kha na rae oh; phua, sivaw, ccephui, kuee kha na kungku kya yn thuakhae zah na rulaeku oh.

¹³Javan, Tubal te Meshek hae ryte uccaw kungkunaw kha na raekheih oh; see te sohin angphe hae kha ae zuapya hae.

¹⁴Beth-togarmah hae te nang tuh marang hae, rhawtuknawpaw marang hae te lann hae kha rulaekunaw na rae oh.

¹⁵Rhodes hae ryte uccaw kungkunaw kha na raekheih oh; rili kin e ram hae tuh nang nynh uccaw na zuanaw hmin nynh thua hae; minmin nynh saepanua te thing manpaw kha amee lang nang ae pya hae.

¹⁶Na uccaw alung keiccuze Edom te nang tuh uccaw kungkunaw kha na raekheih oh; lung hinpaw, sephaphuhpaw boeining, kou puithya lan ccaanpaw boeining, ahoypaw boeining, koral lung te patamia lung khate na uccaw kha na rulaeku oh.

¹⁷Judah te Israel ram khate mah uccaw kungkunaw kha na raekheih oh; Minnith kyate apoupaw chanvuih, ccaw, khoitui, chitui te balm phi kha ae zuapya hae.

¹⁸Na sisua aphuinphuin tuh myaryamaw alung keiccuze Damaskas te mah nang tuh uccaw kungkunaw kha na raekheih oh—Helbon misutui te tuuming rawpaw kha ae pya hae.

¹⁹Vedan te Uzal kya-e Javan nynh nang te uccaw kungkunaw a rae hae; sivaw, kassia thing te ccazung epaw kha na re hae.

²⁰Dedan nynh marang cciku ze dekupaw kha ae zuapya.

²¹Arabia ram te Kedar bawi hae balyn tuh tuutaw hae, tuutepaw hae te miaa hae kha kungkunaw na raekheih oh zah hoyte na ccuepeku oh.

²²Sheba te Raamah kya-e kungku hae ryte uccaw kungkunaw kha na raekheih oh; ahoy huaccepaw mynkhuhpaw aphuinphuin, amee rupaw lung te sui kha na rulaeku oh.

²³Haran, Kanneh, Eden, Sheba kungku hae, Asshur te Khilmad hae nynh mah nang te uccaw kungkunaw kha a rae hae.

²⁴Ahoypaw boeining hae, meizong boeining hae, kou hoy lan ccaanpaw boeining, azong aphuinphuin te ccaanpaw uccaw, khyndadyh lan arui te heedepaw uccaw hae kha kungkunaw na raekheih oh.

²⁵Tarshish sanphalung hae tuh na uccaw phupyate na kalan oun cceih hae. Tukeiccuze nang tuh rili ngaelung kya myarya ripaw phupaw te phe na beih.

²⁶Kohlung zawtu hae nynh nang kha rili lungkhu khe ae cciakhae hae. Nithua lang e khisan nynh nang kha rili ngaelung khe ae ro vae.

²⁷Na sisua hae, na uccaw hae, zuathyapaw na uccaw hae, na kohlung zuitu hae, na kohlung a zawtu hae te a raethuitu hae, na uccaw a zua a retu hae, na kya umpaw rhawkaw balyn te na umkheih oh paw ccungccaw aphu balyn tuh nang kha ro na thua nin khe rili ngaelung kya a ccah cih hae.

²⁸Na kohlung a zawtu hae kya-e siaruanaw roi keiccuze anaenaw umpaw khua hae tuh ahy hae.

²⁹Kohlung zawtu balyn tuh mih kohlung hae kyate atolang a rung hae. Kohlung a zuitu hae te a zawtu balyn tuh varang langkhe thadyn hae zah,

³⁰nang na hanlan accae lante rah hae zah thawte a sia hae. Mih lu vawlan vuiping phingkuh hae zah, buhhaw kya a toukuh hae;

³¹nang na keiccuze mih sang kha okuh hae zah, buriboei kha a zingku hae, nang na hanlan mih thinlung phe ccih lante thawte a rah a khui hae.

³²Nang na hanlan ngaethyate rah hae zah: “Rili ngaelung kya Tair hawte aroh boi paw hummou a um?

³³Rili laanpi kyate na uccaw hae he yn thua te, ccungccaw patae kha mih lungry na ccingsah hae; myarya lungpaw na sisua te na zuapaw uccaw hae khate laephi siapharan hae kha na hoirumsah hae.

³⁴Atu tuh tui akhunaw kyakhe rili khate ro na thua vae; na zuapaw uccaw hae te kohlung kya-e na ccungccaw hae tuh namaw ryte na phungkuh vae oh.

³⁵Rili kin um hae paw balyn tuh nang keiccuze a siikuh vae hae; mih siapharan hae tuh myarya rih hae zah, mih maesue kya mih rinaw alangkuh.

³⁶Minphuin patae laku e kungku hae nynh nang kha saryanaw roi ae sawnua cih hae; nang tuh myarya ri lan umpaw athangnaw kya na thua vae zah, zungzae na zo vae cih,” a ci hae.