Read Zotung Chin EZEKIEL 28 Bible Online

EZEKIEL 28 - Zotung Chin bible

EZEKIEL 28

¹BAWIPAW bya tuh ka kya yn thua zah:

²Ccungccapaw, Tair uktu bawi kha hopya tua, Bawipaw PACHIA nynh hynhte a ho: Lysakunaw thinlung na hoi zah, “Kae tuh pachia nynh ka thua; rili ngaelung kya, pachia hae haungnaw kya ka haung,” na ci, pachia hawte na tuaku zemah pachia na thua khyh, ccungccaw nynh na thua.

³Nang tuh Daniel laeze na hawhua ccaccing; nang na malang phei khopaw te thuruh khopaw um khyh;

⁴na hawnaw te na nythyanaw liate sisua patae na tungku vae, na sisua bawng lungkhu khe sui te ngun kha na sueluaku vae.

⁵Kungkunaw kya myarya na haw liate na sisua kha na lungthungsaku vae, tuh-e na sisua keiccuze lysakunaw thinlung na hoi vae.

⁶Tukeiccuze Bawipaw PACHIA nynh a hopaw tuh: namaw toulou kha pachia hawte na tuaku keiccuze

⁷minphuin hae kyaze ri lan um huaccepaw ramccang hae kha kae konua cih hae; minmin nynh aphutepaw na hawnaw kha mih thaloi ae thuaanuakuh cih hae zah, na lesaenaw kha a thusah cih hae.

⁸Nang kha Hunghua lungkhu lang ae tuu cih hae zah, rili ngaelung khe myarya ccihpaw chinaw te na chih cih.

⁹Nang ae theih hae paw kuih kyakhe nang tuh pachia thua leite, ccungccaw mang na thua pite, nang ae theihtu hae malang khe “Kae tuh pachia nynh ka thua,” cite na ho ung cih tou?

¹⁰Vingdungawkuh lei hae paw nynh a chi hae hawte, ramccang hae kuih khate na chih cih; pawccecize Bawipaw PACHIA nynh, phe ka ho vae, a ci.

¹¹Tuhpiaze BAWIPAW bya tuh ka kya yn thua zah:

¹²Ccungccapaw, Tair siapharan hanlan na ngaethah sah lah, aning kha hopya tua, Bawipaw PACHIA nynh hynhte a ho: Nang tuh ccingnaw tazeih nynh na thua, hawnaw te phe na beih zah na puithyanaw tuh phe accing.

¹³Nang tuh Pachia khokhu, Eden kya na um; aphutepaw lung aphuinphuin khate na ccaanku, tuh-e lung hae tuh patamia, khrisolaih, awrarihpaw lung, topaz, beryl, oniks, jasper, nilar lung, karbankal te emeral lung nynh thua hae; sui te raepaw uccaw hae kha na hoi. Nang kha rae na thua nin khe khah-e hae kha na hanlan paccynpya athua vae.

¹⁴Chitui thuh athuapaw cherub kha nang ae rintu lang kae nungpya; nang tuh athyaapaw Pachia mua vawlan khe na um; phaephae akpaw lung hae laku khe na cceih.

¹⁵Na pui nin kyate na tungvaw kya hoyleinaw muih athua mawlaezung na cyisahnaw tuh ccaenaw um khyh.

¹⁶Na kungkunaw tuh myarya alung keiccuze puathonaw te phe na beih zah na sei vae; tukeiccuze nang kha athyaa leipaw uccaw hawte Pachia mua kyate kae vua, nang ae rintu cherub nynh phaephae akpaw lung hae laku kyate nang kha ccaring ae dee.

¹⁷Na puithya keiccuze na thinlung tuh alysakuh; na minthaannaw hanlan na hawnaw kha na roku. Nang kha laekhu lang kae vua; siapharan hae nynh nang kha dote mih lungpaw ccaw cite mih malang khe kae nung.

¹⁸Ahme leipaw kung na kunaw kya na hoyleinaw alung keiccuze na beikinnthyaa hae kha na thusah. Tukeiccuze na lungkhu kya maee ka tyh zah nang kha maee te kae u, nang ae muih hae paw balyn malang khe laephi vawlan khe nang kha buhhaw lang kae tangsah.

¹⁹Minphuin hae laku nang ae nyhpaw balyn tuh nang keiccuze a siikuh hae; nang tuh ri lan umpaw athangnaw kya na thua vae zah, zungzae na zo vae cih.

²⁰BAWIPAW bya tuh ka kya yn thua zah:

²¹Ccungccapaw, Sidon khua langkhe hawi lah, profehbya kha hynhte honua tua,

²²Bawipaw PACHIA nynh hynhte a ho: Pou Sidon, nang kha kae rawse, na ngaelung khe phu-enaw ka mue cih. Sidon khua kha bya ka pia zah, ka thyaanaw kha he ka langsakuh te, kae tuh BAWIPAW ka thuapaw kha a nyh cih hae;

²³Sidon khua kha shethya ka sawnua cih zah, khua lungkhu e laanpi hae kya chiise ka luasah cih; khua kha voilute a rawsepaw thaloi keiccuze michi hae tuh khua ngaelung khe a khuliakuh cih hae. Tetuh minmin nynh kae tuh BAWIPAW ka thuapaw kha a nyh cih hae.

²⁴Israel hae nynh minmin a dothatheih hae paw mih innpaw hae balyn kyakhe athuingthyapaw hinpawbu te hinpaw ahepaw kha muih vae lan khyh hae. Te minmin nynh kae tuh Bawipaw PACHIA ka thuapaw kha a nyh cih hae.

²⁵Bawipaw PACHIA nynh hynhte a ho: Israel hae kha phiariphiarae nung athuanaw minphuin hae kyate he ka suelua hae te, ka ryalahtu Jakob ka pyapaw mimaw laephi kyakhe a um cih hae.

²⁶Tuin kyakhe khyndadyh lan a um cih hae, inn a sakkuh cih hae zah misu khokhu kha a raekuh cih hae. Minmin kha a la dothatheih hae paw mih innpaw hae balyn tungvaw bya he ka pia hae te, minmin tuh khyndadyh lan a um cih hae. Tetuh kae tuh BAWIPAW mih Pachia ka thuapaw kha minmin nynh a nyh cih hae.