Read Zotung Chin EZEKIEL 29 Bible Online

EZEKIEL 29 - Zotung Chin bible

EZEKIEL 29

¹Kum hawnaw, sawpaw sah hawnaw, nin haw lae ning nin khe, BAWIPAW bya tuh ka kya yn thua zah:

²Ccungccapaw, Izip siapharan Faro kha na mae hawinua lah, amaw te Izip ram pynpi kha profehbya honua tua;

³Bawipaw PACHIA nynh hynhte a ho: Pou Izip siapharan Faro, a vawpi hae ngaelung khe a kuih a ccu tharae zo zah, “Nal vawpi tuh ka kya-e nynh thua; e vawpi hynh kamaw hanlan ka raeku,” cite a hopaw nakaa-hupi, nang kha kae rawse.

⁴Ngasabaw khate na khaw kha kae baw cih zah, na vawpi hae kya-e ngasaw hae kha na kaleih kya ka besakuh cih hae. Na vawpi hae kyate nang kha ccaring kae sue cih zah, na vawpi hae kya-e ngasaw balyn tuh na kaleih kya a bekuh cih hae.

⁵Nang te na vawpi hae kya-e ngasaw balyn kha ramkaw langkhe kae vua cih oh; nang tuh ramkaw khe na chih cih, nang kha ae khuing lan khyh hae zah ae uh lan khyh hae. Nang kha laephi kya-e sarangpaw hae te khivae kya-e pavaw hae hanlan looh lang ka pya vae hae.

⁶Tetuh Izip ram um hae paw balyn nynh kae tuh BAWIPAW ka thuapaw kha a nyh cih hae, pawccecize nang tuh Israel hae hanlan phaeku hoitang nynh na thua;

⁷mih kuih te ae kyng vae hae ze, nang tuh na khya zah, mih raw balyn kha thoh na pae hae; na kya a ngeiku vae hae ze, nang tuh na khya zah, mih kuih mih ccu balyn kha na tynsah khyh hae.

⁸Tukeiccuze Bawipaw PACHIA nynh a hopaw tuh: Na kalan thaloi ka thuasah cih zah, ccungccaw te sarangpaw hae kha ka bae cih hae;

⁹Izip ram tuh ccungccaw adae cih zah alakawpaw lang a tang cih. Tetuh minmin nynh kae tuh BAWIPAW ka thuapaw kha a nyh cih hae. Nang nynh, “Nal vawpi tuh ka kya-e nynh thua, ka raekupaw nynh thua,” na ci keiccuze

¹⁰nang te na vawpi hae kha kae rawse oh, Izip ram kha Migdol kyate Sai-en cia, Ethiopia ramri phe thua lan, alakawpaw te ccungccaw phe adaepaw lang ka rae cih.

¹¹Ccungccaw te sarangpaw nynh tuin ram kya po cceih lan khyh hae; kum sung pali lungkhu pawpaw nynh mah umnah lan khyh.

¹²Ccungccaw phe adaepaw ram hae laku khe Izip ram kha ccungccaw adaepaw lang ka rae cih; Izip khuapi hae tuh arohpaw khuapi hae laku khe kum sung pali lungkhu arohpaw lang a tang cih hae. Izip hae kha minphuin hae kyakhe phiariphiarae ka nung cih hae zah, ram hae kyakhe ka phiasakuh cih hae.

¹³Tuhzemah Bawipaw PACHIA nynh hynhte a ho: Kum sung pali accing te, Izip hae kha phiariphiarae a umnaw hae minphuin hae kyate ka suelua cih hae;

¹⁴Izip hae kha ka kikhae cih hae zah, mih thokeinaw ram, Pathros ram langkhe ka kisah cih hae; tuin kyakhe ram nyaapaw lang a tang cih hae.

¹⁵Ram hae laku kya Izip tuh anyaa huaccepaw ram lang a tang cih zah, minphuin hae luki papin sang vae lan khyh; minmin tuh minphuin ccangpaw hae kha papin bua a uk leipaw ditarawpaw lang ka rae cih hae.

¹⁶Izip hae tuh Israel hae nynh doliakupaw lang papin tangthui vae lan khyh hae; bawmnaw mue khylan Izip hae kalan a la maeku hae paw mih hoyleinaw kha Israel hae nynh a tuathui cih hae. Tetuh minmin nynh kae tuh Bawipaw PACHIA ka thuapaw kha a nyh cih hae.

¹⁷Kum kuin lae sarinaw, sawpaw sah kheitnaw, masaty nin khe BAWIPAW bya tuh ka kya yn thua zah:

¹⁸Ccungccapaw, Babilon Siapharan Nebukhadnezzar nynh a rhawkaw hae tuh Tair kha thawte rhaw a tuksah hae; rhawkaw miakaw tuh mih lu-o zah, mih raw pong kuakuh; tuhzemah aning te a rhawkaw hae tuh Tair dounaw mee kha Tair kyate paw sanmah mue khyh hae.

¹⁹Tukeiccuze Bawipaw PACHIA nynh hynhte a ho: Izip ram kha Babilon Siapharan Nebukhadnezzar ka pya cih; aning nynh Izip sisua kha luadete a lawkuh cih zah a phukuh cih; tuh-e tuh a rhawkaw hae mih ryalaw mee lang a tang cih.

²⁰Thawte rya a lawnaw mee lang Izip ram kha aning ka pya vae, pawccecize minmin nynh ka hanlan rya a law hae, cite Bawipaw PACHIA nynh a ci.

²¹Tuin nin khe Israel hae hanlan aki ka saesah cih zah, nang kha minmin laku kya byahonaw kaw kae pya cih. Tetuh minmin nynh kae tuh BAWIPAW ka thuapaw kha a nyh cih hae.