Read Zotung Chin EZEKIEL 3 Bible Online

EZEKIEL 3 - Zotung Chin bible

EZEKIEL 3

¹Aning nynh yn hopah zah, pou ccungccapaw, na kalan pya athuapaw kha aetua; e ccakue hynh aetua, te cceih lah, Israel phin kha hopah hae, yn cipya.

²Tukeiccuze ka khalang tuh ka aw zah, ae lanpaw ccakue kha aning nynh yn pya.

³Aning nynh kae kha yn hopah zah, Ccungccapaw, kae pyapaw e ccakue hynh ae lah, bynsaku tua, yn cipya. Tetuh ccakue tuh ka ae zah, ka khalang kya khoitui hawte a e.

⁴Aning nynh kae kha yn hopah zah: Ccungccapaw, Israel phin kalan cceih lah, ka bya hynh hopya tua hae.

⁵Thaethya arupaw bya a ho hae paw kalan te arupaw bya a ho hae paw kalan nang kha kae saw khyh, Israel phin kalan nynh kae saw—

⁶mih bya na thaepya kho lei hae paw, thaethya arupaw bya a ho hae paw te arupaw bya a ho hae paw minphuin patae kalan nang kha kae saw khyh. Thanccingte, tuh-e hae kalan kae la saw lanze, na bya kha ae ngaepah cih hae.

⁷Thuasalama Israel phin nynh na bya kha ae ngaepah lan khyh hae, pawccecize Israel phin balyn tuh mih bungle zah mih lungkhung keiccuze ka bya kha ngae ry khyh hae.

⁸Minmin hawte a bunglepaw te a lungkhungpaw lang kae rae vae.

⁹Na terui kha rihlung laeze a tang huapaw, lung a tang huaccepaw lang kae rae vae; minmin kha rih nan hae, mih maesue keiccuze na lungroh nan sah, pawccecize minmin tuh dou a mangpaw phin nynh thua hae, yn cipya.

¹⁰Aning nynh kae yn hopyapaw tuh: Ccungccapaw, kae hopya lanpaw ka bya balyn hynh na nakaring te thae lah, na thinlung kya lawku tua;

¹¹te kyng hae zah ramccang lang a cciakhae hae paw na ccungccaw hae kalan cceih lah, hopah hae. Minmin nynh a ngae hae zemah thuasah, a ngae khyh hae zemah thuasah, “Bawipaw PACHIA nynh hynhte a ho,” cite hopah hae.

¹²Tetuh muisaw nynh kae kha yn hangthung zah, BAWIPAW phu-enaw tuh a umnaw kyate he a hangku lyakhe, myarya ccaepaw siho kha ka nulang khe ka thae;

¹³tuh-e siho tuh ahiinpaw ahysuepaw hae nynh ccangkheit te ccangkheit mih sake a nuihkuh hae paw siho, mih pe umpaw leccu hae roi te siho myarya ccaepaw nynh thua.

¹⁴Muisaw nynh kae kha yn hang zah ccaring yn cciakhae; kae tuh ka thinlungccih zah ka bungzou, BAWIPAW kuih tuh ka tungvaw myarya a kuihlungccih.

¹⁵Kyngte ramccang lang a cciakhae hae paw Khebar vawkhu pe, Tel-abib khua um hae paw kya ka thua zah, nin sari lungkhu ngaeangthuate minmin kya ka um.

¹⁶Nin sari koute BAWIPAW bya tuh ka kya yn thua:

¹⁷Ccungccapaw, nang kha Israel phin a rintu lang kae rae vae; ka bya na thae takyhte, ka kyate yn thuapaw raeringnaw kha na pya cih hae.

¹⁸“Na chih ccaccing cih,” cite ccungccaw hoyleipaw ka hopyapaw kha nang nynh raeringnaw na pya khyh ze thuasah, ccungccaw hoyleipaw kha a hiinnaw khum khylan raeringnaw bya na hopya khyh ze thuasah, tuh-e ccungccaw hoyleipaw tuh a hoyleinaw keiccu a chih cih; thuasalama a chiise kha nang kae ngia cih.

¹⁹Thuasalama ccungccaw hoyleipaw kha raeringnaw na pya zah, a hoyleinaw kyate thuasah, ahoy leipaw a cyisahnaw kyate thuasah a maeleihku khyh lanze a hoyleinaw keiccu aning tuh a chih cih, thuasalama nang na hiinnaw tuh na khumku vae.

²⁰Tukoute miding tuh a dingnaw kyate maeleihkuh zah hoyleinaw kha a rae ze thuasah, a malang khe thykupawkunaw kha ka nungkhaw ze thuasah aning tuh a chih cih; aning kha raeringnaw na pya khyh keiccuze a seinaw hanlan a chih cih, a la rae vae paw a dingnaw kha liathuipya thua lan khyh; thuasalama a chiise kha nang kae ngia cih.

²¹Tuhzemah, miding kha a sei khyh nawlan raeringnaw na pya zah a sei khyh lanze, raeringnaw kha a lawku keiccuze a hiin ccaccing cih, te nang na hiinnaw tuh na khumku vae.

²²BAWIPAW kuih tuh ka tungvaw a um; te aning nynh kae kha, Thokuh lah, accya langkhe cciatua, tuin kya nang kha bya kae hopah cih, yn cipya.

²³Tukeiccuze ka thokuh zah accya lang ka cceih; tuin kyakhe Khebar vawkhu kin ka muih boi paw phu-enaw te alokuhpaw BAWIPAW phu-enaw tuh a thadyn; te ka mae kha ka sahbung.

²⁴Muisaw tuh ka lungkhu lang tee zah kae kha yn thadynsah; te kae kha bya yn hopah zah: Cceih lah, na inn lungkhu khe khawsungku tua.

²⁵Ccungccapaw, ccungccaw hae kalan na ccia kho khyh nawlan arui te khii na thua cih;

²⁶bya na ho khyh nawlan te minmin kha na thuihei khyh nawlan hae, na lae kha na dankhaling kya kae besakuh cih; pawccecize minmin tuh dou a mangpaw nynh thua hae.

²⁷Thuasalama bya kae hopya ze, na mung kha kae hungpah cih zah, nang nynh minmin kha, “Bawipaw PACHIA nynh hynhte a ho,” cite na hopah cih hae; a ngae rypaw nynh ngae sah lah, a ngae ry leipaw nynh ngae nan sah; pawccecize minmin tuh dou a mangpaw nynh thua hae.