Read Zotung Chin EZEKIEL 30 Bible Online

EZEKIEL 30 - Zotung Chin bible

EZEKIEL 30

¹BAWIPAW bya tuh ka kya yn thua zah:

²Ccungccapaw, profehbya hotua, Bawipaw PACHIA nynh hynhte a ho: “Ezou, yn thuapaw nin hanlan ngaethya lan kou um!” cite rah oh.

³Pawccecize nin tuh anae vae, BAWIPAW nin tuh anae vae; tuh-e nin tuh mae-ui nin, minphuin hae hanlan ronaw nin athua cih.

⁴Izip kya thaloi te chiakunaw a um cih zah, Ethiopia ram kya lungriathaenaw a um cih, chiapaw ccungccaw hae tuh Izip ram kya he a chih hae te, a uccaw hae kha ccaring cciakhaepya athua cih zah, athonaw aleihpaw kha ropya athua cih.

⁵Ethiopia, Put, Lud te Arabia balyn, Libia ram e ccungccaw hae, a pankheih hae paw ram kya-e ccungccaw hae tuh minmin ryte thaloi te a chih cih hae.

⁶BAWIPAW nynh hynhte a ho: Izip kha a bawm hae paw tuh a chih cih hae zah, Izip nynh a lysakunawpaw tuh a ccahbung cih; Migdol kyate Sai-en cia thaloi te a chih cih hae, cite Bawipaw PACHIA nynh a ci.

⁷Ccangpaw arohpaw ram hae kyakhe Izip hae tuh aroh cih hae zah, mih khuapi hae tuh arohpaw khuapi hae kya a umbua cih hae.

⁸Izip ram kha maee ka tyhnua zah Izip a bawm hae paw tuh he a roh hae te, kae tuh BAWIPAW ka thuapaw kha a nyh cih hae.

⁹Tuin nin vae tuh, pawningkhua a nyh lei hae paw Ethiopia hae kha mih rikawthuasah khylan ka saw hae paw locceihtu hae tuh sanphalung te a cceih cih hae; Izip ram a ro nin khe lungriathaenaw nynh mih tungvaw a thuanua cih hae; pawccecize tuh-e ccyh tuh anae vae!

¹⁰Bawipaw PACHIA nynh hynhte a ho: Babilon Siapharan Nebukhadnezzar kuih khate Izip zapi hae kha phe ka thangsah cih hae.

¹¹Minphuin hae kyaze ri lan um huaccepaw Nebukhadnezzar te a ccungccaw hae kha Izip ram ro khylan cciakhae athua cih hae; Izip ram kha thaloi a thuaanuakuh cih hae zah a chia hae paw michi rhua khate ram kha phe a biasah cih hae.

¹²Vawpi hae kha ka kansah cih hae zah ram kha hoyleinaw a rae hae paw kuih kalan ka zua cih; ramccang hae kuih khate ram te ram lungkhu e atyn-are kya ronaw ka thuasah cih. Kae, BAWIPAW nynh phe ka ho vae.

¹³Bawipaw PACHIA nynh hynhte a ho: Zohtuh hae kha ka roh cih zah Memfis kya umpaw azuh hae kha phe ka thangsah cih; Izip ram kya uktu bawi um vae lan khyh; tuhcite Izip ram kya rinaw ka umsah cih.

¹⁴Pathros ram kha ka roh cih zah, Zoan khua kha maee te ka soi cih, Thebes khua tungvaw byapianaw ka rae cih.

¹⁵Izip ram kyaze athung huapaw Pelusium khua tungvaw ka thinrianaw ka bu cih zah, Thebes zapi hae kha ka theih cih hae.

¹⁶Izip ram kha maee te ka soi cih; Pelusium khua tuh riathaenaw myarya a teing cih; Thebes khua kya-e khualungrua tuh ating cih zah, Memfis tuh khuadae ccyh kya heize rhaw hae nynh a tuk cih hae.

¹⁷On khua te Pi-beseth khua e ccangvae hae tuh thaloi te a chih cih hae; khuapi hae tuh kyngku khylan mimaw nynh a cceih cih hae.

¹⁸Izip uknaw kha he ka roh te, Tehafnehes khua kya khuadae tuh phe amoh cih, a lysakunaw tuh phe athang cih; khuapi kha maeking te bong athua cih zah, a ccanung athua hae paw khua hae kha kyngte cciakhae athua cih hae.

¹⁹Tuhcite Izip tungvaw byapianaw ka rae cih. Tetuh kae tuh BAWIPAW ka thuapaw kha a nyh cih hae.

²⁰Kum haw lae kheitnaw, masaty sawpaw, nin sari nin khe BAWIPAW bya tuh ka kya yn thua zah:

²¹Ccungccapaw, Izip siapharan Faro kuih kha ka khya vae; thaloi kyng lan ciate a thawsae ccaw cite a vaemaw a dan nawlan heepya thua khyh.

²²Tukeiccuze Bawipaw PACHIA nynh hynhte a ho: Izip siapharan Faro kha ka rawse, athungpaw a kuih te khya athua vae paw a kuih kha parouhte ka khya cih hae zah, a kuih kyate thaloi kha ka ccawsah cih.

²³Izip hae kha minphuin hae laku kya phiariphiarae ka nung cih hae zah, ram hae kya ka phiasakuh cih hae.

²⁴Babilon siapharan kuih kha a thaw ka saesah cih zah, ka thaloi kha a kuih kya ka nung cih; thuasalama Faro kuih kha tuh ka khya cih zah, vaemaw keiccu vyavya chihpaw nynh a hawkhaeku hawte Babilon siapharan malang khe a hawkhaekuh cih.

²⁵Babilon siapharan kuih kha a thaw ka saesah cih, thuasalama Faro kuih tuh accahbung cih. Ka thaloi kha Babilon siapharan kuih kya he ka nung te, minmin nynh kae tuh BAWIPAW ka thuapaw kha a nyh cih hae. Aning nynh Izip ram kha tuh-e thaloi tuh a hangnua cih,

²⁶Izip hae kha minphuin hae laku kya phiariphiarae ka nung cih hae zah ram hae kya ka phiasakuh cih hae. Tetuh kae tuh BAWIPAW ka thuapaw kha a nyh cih hae.