Read Zotung Chin EZEKIEL 32 Bible Online

EZEKIEL 32 - Zotung Chin bible

EZEKIEL 32

¹Kum haw lae ningnaw, sawpaw sah haw lae ningnaw, nin kheit nin khe BAWIPAW bya tuh ka kya yn thua zah:

²Ccungccapaw, Izip siapharan Faro hanlan rah lah, hynhte hopya tua: Nang nynh minphuin hae laku kya chindeih hawte namaw te namaw kha na tuaku, thuasalama nang tuh rili kya umpaw nakaa-hupi te nynh na loku oh; vawkhu hae kyakhe tui na zeihku, na ccu te tui kha na thesakuh zah na nuihsah.

³Bawipaw PACHIA nynh a hopaw tuh: Minphuin patae a pumkunaw hae kyakhe ka miabu khate nang kha kae bong cih; miabu ryte kae suebia cih.

⁴Nang kha lae vawlan kae vua cih zah, ramkaw khe phah kae deihnah cih, azouthyapaw pavaw hae kha na tungvaw ka ccusah cih hae, laephi pynpi e loramsaw hae kha phe byn lan ka dang cih hae.

⁵Na ngesaw kha mua hae vawlan phiariphiarae ka nung cih zah, accya hae kha na rhua khate phe ka biasah cih.

⁶Aluapaw na chiise khate ram kha mua hae vawlan kyacia ka ciasah cih zah, vawkhu hae tuh na chiise te phe abeih cih hae.

⁷Nang kha he kae roh te, vaawlui kha ka bong cih zah awsi hae kha ka mohsah cih; khuanin kha maeking te ka khawsah cih zah, sawpaw nynh a awnaw kha pya lan khyh.

⁸Na luki vaawlang e awnaw balyn kha ka mohsah cih zah, na ram kha ka mohsah cih, cite BAWIPAW PACHIA nynh a ci.

⁹Na ny boi leipaw ram hae kalan, ccangpaw minphuin hae laku khe nang kha kyngte he kae cciakhae lyakhe, minphuin patae kha mih lungria ka thaesah cih hae.

¹⁰Nang keiccuze minphuin patae kha ka siisakuh cih hae; mih siapharan hae tuh nang keiccuze a thyngkuh cih hae. Nang na khuliaku nin kya, ka thaloi kha mih malang he ka he te, minmin lu kheit cci tuh mih hiinnaw elang palei a thyngkuh cih hae.

¹¹Bawipaw PACHIA nynh hynhte a ho: Babilon siapharan thaloi nynh nang kha ae thuanua cih.

¹²Minphuin hae lakuze ri lan um huacce hae paw, mih thawsae hae paw kya-e thaloi khate na ccungccaw zapi hae kha ka theih cih hae. Minmin nynh Izip a lysakunaw kha a roh cih hae zah, a ccungccaw zapi balyn tuh a zo cih hae.

¹³Tui alungnaw pepan a um hae paw a sahiin hae balyn kha ka roh cih; ccungccaw ccu nynh thuasah, sahiinpaw ccu nynh thuasah khah-e tui kha nuihsah vae lan khyh.

¹⁴Tetuh mih tui kha ccirarih lan ka ccisah cih zah, mih vawkhu hae kha chitui hawte ka luasah cih, cite Bawipaw PACHIA nynh a ci.

¹⁵Izip ram kha ccungccaw phe ka daesah zah, ram lungkhu umpaw balyn kha he ka thangsah te, ram lungkhu e ccungccaw balyn kha de he ka tah hae te, kae tuh BAWIPAW ka thuapaw kha yn nyh cih hae.

¹⁶E hynh rawkhuinaw nynh thua; e hynh hlaw lang sah athua cih. E hynh minphuin hae kya-e nopi hae nynh hlaw lang a sah cih hae. Minmin nynh Izip te a ccungccaw zapi balyn hanlan hlaw lang a sah cih hae, cite Bawipaw PACHIA nynh a ci.

¹⁷Kum haw lae ningnaw, masaty sawpaw, nin haw lae pangaw nin khe BAWIPAW bya tuh ka kya yn thua zah:

¹⁸Ccungccapaw, Izip zapi hae hanlan rawtua, Hunghua lungkhu lang a cceihbung hae paw a umnaw hae lae kaw lang e laephipi kalan khe Izip te alesaepaw minphuin hae ccanung hae kha sawbung tua hae.

¹⁹“Nang tuh ming hae laeze na puithyahua tou? Cciabung tua! Vingdungawkuh lei hae paw ryte daebabi lan la umkheih oh!” a ci.

²⁰Izip hae tuh thaloi te a chia hae paw laku khe a khuliakuh cih hae. Izip tuh thaloi rhaw kalan ap thua vae zah, a ccungccaw zapi hae ryte parouh mawte kyng hae zah a cciakhae hae.

²¹A thawsaepaw rhawbawi nynh Izip te Izip bawmtu hae kong kha Michi khua kyate a ho cih zah: “Minmin tuh a cceihbung vae hae, thaloi te chia athua hae paw, vingdungawkuh lei hae paw minmin tuh a khuliakuh hae,” a ci cih.

²²Tuin kyakhe Assiria tuh a ccungccaw zapi balyn ryte a umbua hae; mih balynte thaloi te chih hae zah, mih shawku tuh Assiaria pepan po voilu lan a um.

²³Mih shawku hae tuh Hunghua akhu huanaw khe a um hae. A ccungccaw hae shawku tuh a shawku pepan khe po voilu lan a um hae, minmin balyn tuh thaloi te chia thua hae zah a khuliakuh hae paw, a hiin hae paw ram kyakhe ri lan umpaw kha a pazaesakuh hae paw nynh thua.

²⁴Tuin kyakhe Elam tuh a um, a shawku pepan balyn khe a ccungccaw zapi balyn kha a uu hae; minmin balyn tuh thaloi te chia thua hae zah a chih hae paw, a hiin hae paw ram kya ri lan umpaw kha a pazaesakuh hae paw, lae kaw lang a rungbung hae paw vingdungawkuh lei hae paw nynh thua hae. Mih maethyanaw kha Hunghua lungkhu lang a rungbung hae paw ryte a teingkheih hae.

²⁵Minmin nynh Elam kha a chia hae paw a ccungccaw zapi balyn laku khe inaw a raepya hae, tuh-e hae shawku tuh a shawku po voilu lan a um, minmin balyn tuh vingdungawkuh lei hae paw, thaloi te a chia hae paw nynh thua hae; pawccecize minmin tuh a hiin hae paw ram kya rinaw a pazaesakuh hae paw thua hae zah, mih maethyanaw kha Hunghua lungkhu lang a rungbung hae paw ryte a teingkheih hae; chia athua hae paw laku khe minmin kha a nung hae.

²⁶Tuin kyakhe Meshek te Tubal tuh mih ccungccaw hae balyn ryte a um hae, minmin po voilu lan mih ccungccaw hae shawku tuh a um, minmin balyn tuh vingdungawkuh lei hae paw, thaloi te a chia hae paw nynh thua hae; pawccecize minmin nynh a hiin hae paw ram kyakhe rinaw kha a pazaesaku hae.

²⁷Minmin tuh langmawlya e a chih hae paw rhawkaw hae ryte ihkheih khyh hae; Michi khua lang rhawtuknawpaw zunghe ryte a rungbung hae paw tuh-e rhawkaw hae tuh mih thaloi kha mih lu kaw khe nungpah hae zah mih khawriaphua kha mih ru vawlan a khangpya hae; pawccecize tuh-e rhawkaw hae nynh a hiin hae paw ram kya rinaw a umsah hae.

²⁸Nang mah ae khya cih hae zah, vingdungawkuh lei hae paw laku khe, thaloi te a chia hae paw ryte na ihkheih cih oh.

²⁹Tuin kyakhe Edom mah a siapharan hae te a bawi hae ryte a umbua, mih thungnaw balyn ryte thaloi te a chia hae paw kya a nungbua hae; vingdungawkuh lei hae paw, Hunghua lungkhu lang a rungbung hae paw ryte a ih hae.

³⁰Tuin kyakhe thahlang e bawi hae te Sidon hae balyn tuh a umbua hae, mih thungnaw liate rinaw balyn kha a langsaku hae keiccuze chia athua hae paw ryte maethyate a rungbung hae; thaloi te a chia hae paw ryte vingdungawkuh lei hae paw thua hae zah a ih hae, Hunghua lungkhu lang a rungbung hae paw ryte maethyanaw a teing hae.

³¹Faro nynh minmin kha he a muih hae te, thaloi te a chih hae paw a ccungccaw zapi balyn hanlan Faro te a rhawkaw hae balyn tuh mih lungdaehua cih, cite Bawipaw PACHIA nynh a ci.

³²Aning nynh a hiin hae paw ram kya rinaw kha a pazaesaku; tukeiccuze Faro te a ccungccaw hae balyn tuh vingdungawkuh lei hae paw laku khe, thaloi te chia athua hae paw ryte haeungsah athua hae, cite Bawipaw PACHIA nynh a ci.