Read Zotung Chin EZEKIEL 33 Bible Online

EZEKIEL 33 - Zotung Chin bible

EZEKIEL 33

¹BAWIPAW bya tuh ka kya yn thua zah:

²Pou ccungccapaw, ccungccaw hae kha hopya tua hae. Ram ramkhakheit tungvaw thaloi rhaw kha ka thuasah lanze, ram kya-e ccungccaw hae nynh minmin laku e lukhakheit kha rhawviatu lang a nung hae;

³tuh-e rhawviatu nynh ram kalan yn cceihpaw thaloi rhaw kha he a muih te, mungkae tu zah ccungccaw hae kha raeringnaw a pya hae;

⁴lukhakheit nynh tuh-e mungkae roi tuh mang a thae pite raeringku leite um zah, rhaw nynh thuanuate amaw kha a chia lanze, a chiise tuh amaw lu vawlan nynh a um.

⁵Mungkae roi kha mang a thae pite a raeringku khyh keiccuze a chiise tuh amaw tungvaw nynh a um. Thuasalama aning nynh a raeringku lanze, a hiinnaw kha a lue cih.

⁶Thuasalama rhawviatu nynh thaloi rhaw yn thuapaw kha mang a muih pite mungkae kha a tu khyh keiccuze ccungccaw hae tuh raeringku leite um hae zah, thaloi rhaw nynh thuanuate minmin laku e lukhakheit tuh a chi lanze, tuh-e paw tuh amaw a seinaw keiccu nynh a chi, thuasalama a chiise mee tuh rhawviatu kha ka ngia cih.

⁷Tukeiccuze, ccungccapaw, nang kha Israel hanlan rhawviatu lang kae rae vae; ka mung kya-e bya kha na thae takyh te minmin kha raeringnaw na pya cih hae.

⁸Kae nynh ccungccaw hoylei hae paw kha, “Pou ccungccaw hoylei hae, na chih ccaccing cih oh,” cite ka hopah hae zah, ccungccaw hoylei hae paw kha mih hoyleinaw kyate maeleihku khylan na hopya khyh hae ze, minmin tuh mih hoyleinaw keiccu a chih cih hae, thuasalama mih chiise mee tuh nang kha kae ngia cih.

⁹Thuasalama ccungccaw hoylei hae paw kha mih seinaw kyate maeleihku khylan raeringnaw na pya hae zah, mih hiinzia kyate a maeleihku khyh hae ze, minmin tuh mih hoyleinaw keiccu a chih cih hae, thuasalama nang tuh na hiinnaw kha na khumku vae.

¹⁰Ccungccapaw, nang nynh Israel hae kha hynhte hopya tua hae: Nanning nynh, “Aening cyiseinaw te aening seinaw nynh aening kha phang oun ne zah, ah thawthang vae, pawtemou ah hiin kho cih oh?” na ciku oh.

¹¹Bawipaw PACHIA nynh a hopaw tuh, Kae tuh ka hiin thyhte, ccungccaw hoyleipaw nynh a chipaw kha ka lungrythua khyh, thuasalama tuh-e ccungccaw hoyleipaw nynh a hiinzia kyate maeleihkuh zah a hiinpaw kha ka ry; maeleihkuh oh, ahoy leipaw nae hiinzia kyate maeleihkuh oh. Pou Israel hae, pawccemou na chih cih oh?

¹²Ccungccapaw, na ccungccaw hae kha hynhte hopah hae, Miding nynh a mesei lanze, a dingnaw nynh amaw kha khum lan khyh; ccungccaw hoyleipaw nynh a hoyleinaw kyate a maeleihku lanze, a hoyleinaw nynh aning kha thykupawkunaw pya lan khyh; miding tuh a sei lanze, hiin kho lan khyh.

¹³Miding tuh a hiin ccaccing cih cite ka ho salamah, a dingnaw kha doliakuh zah hoyleinaw a rae lanze, a dingnaw kha tuapya thui thua lan khyh; a la cyipaw hoyleinaw keiccuze aning tuh a chih cih.

¹⁴Tukoute, ccungccaw hoyleipaw kha, “Nang tuh na chih ccaccing cih,” cite ka hopah salamah, a seinaw kyate maeleihkuh zah atazaepaw te ahmepaw kha a cyi ze thuasah,

¹⁵ponpaw uccaw kha lawku leite bua pyathui zah, a luadepaw uccaw kha pyathuite, hoyleinaw kha rae vae leite hiinnaw phunglang kha a zui ze thuasah aning tuh a hiin ccaccing cih zah chih lan khyh.

¹⁶Aning nynh a la raepaw seinaw ccangkheit sanmah liathuipya thua lan khyh; aphung thyhte cyih zah ahmepaw kha a rae keiccuze aning tuh a hiin ccaccing cih.

¹⁷Tuhzemah na ccungccaw hae nynh, “Bawipaw nynh a cyipaw tuh hme khyh,” a ci hae, thuasalama minmin nynh a cyi hae paw khaw hme khyh.

¹⁸Miding nynh a dingnaw kyate maeleihkuh zah hoyleinaw kha a rae lanze, tuh-e hoyleinaw hanlan aning tuh a chih cih.

¹⁹Ccungccaw hoyleipaw nynh a hoyleinaw kyate maeleihkute aphung thyhte cyih zah ahmepaw kha a rae lanze, tuh-e liate aning tuh a hiin cih.

²⁰Tuhzemah nanning nynh, “Bawipaw nynh a cyipaw tuh hme khyh,” na ci oh. Pou Israel hae, na cyisahnaw thyhte nanning balyn kha bya kae pia cih oh!

²¹Oun kyng hae zah oun cciakhaenaw hae te, kum haw lae ningnaw kum, sawpaw sah hawnaw, nin pangaw nin khe Jerusalem kyate yn lue zah yn ccuepaw lu kheit nynh kae kha, “Jerusalem khuapi tuh aroh vae,” yn cipya.

²²Tuh-e yn ccuepaw yn thua maw zete ccyh mawte BAWIPAW kuih tuh ka tungvaw a um vae; thuasalama awkhua ccyh kya tuh-e paw he yn thua te nynh kae kha byaho khonaw yn pya; tetuh ka mung kha hungpya thua zah byaho kho leite ka um vae khyh.

²³BAWIPAW bya tuh ka kya yn thua zah:

²⁴Ccungccapaw, Israel ram e arohpaw hmin hae kya a um hae paw nynh, “Abraham tuh a makhae kyalya a la thua zemah e ram hynh a la ccou; thuasalama aening tuh patae ah cih vae oh; ram hynh ccou khylan pya ah thua ccaccing vae oh,” a ci hae.

²⁵Tukeiccuze minmin kha hopah hae, Bawipaw PACHIA nynh hynhte a ho: Nanning nynh achii ryte asaw kha na ae oh zah, zohtuh hae kalan khe nae mit dothungte chiise na luasah oh; te nanning nynh ram kha na ccou cih oh tou?

²⁶Nae thaloi kha na doliaku oh, anungsikuhpaw kha na rae oh zah, nae innpaw paw zu kha mang na thusah oh pite ram kha na ccou cih oh tou?

²⁷E hynh minmin kha hopah hae, Bawipaw PACHIA nynh hynhte a ho: Kae tuh ka hiin thyhte, arohpaw hmin hae kya a um hae paw tuh thaloi te a chih ccaccing cih hae; ramkaw um hae paw kha loramsaw hae kalan ka pya cih hae zah ka teisah cih hae; rhawlungrua lungkhu te lungkarung kya um hae paw tuh shethya khate a chih cih hae.

²⁸Ram kha arohpaw te accakaepaw lang ka rae cih, a lysakunawpaw a thungnaw tuh athang cih. Israel mua hae tuh ccungccaw a cceih bungthungpaw a um lei lan ciate ccungccaw adaepaw lang a tang cih.

²⁹Minmin nynh anungsikuhpaw a rae hae paw balyn keiccuze ram kha arohpaw te accakaepaw lang he ka rae te, kae tuh BAWIPAW ka thuapaw kha a nyh cih hae.

³⁰Ccungccapaw, na ccungccaw hae nynh nang na kong kha inn thuakaw pe te pang pe khe innpaw raveihte lu kheit te lu kheit hokuh hae zah, “Rang oh, BAWIPAW kyate paw bya mou yn thua cipaw kha thaetua oh sih,” a ciku hae.

³¹Minmin tuh ka ccungccaw hae hawte oun thua cih hae zah, na malang khe ka ccungccaw hae hawte a haung cih hae, te na bya kha a thae cih hae, thuasalama zui lan khyh hae. Mih munglae tuh myarya anawthya, thuasalama mih thinlung tuh mih uccaw amia muenaw kyakhe nynh a um.

³²Minmin hanlan tuh nang hynh sungsakunaw hlaw a sahthyapaw, a roi hoypaw te tintang hoyte a khuathyapaw hawte nynh na thua; na hopaw kha a thae hae zemah zui lan khyh hae.

³³E balyn hynh yn ccing ccaccing cih, he yn ccing te, minmin laku kya profeh a la umpaw kha a nyh cih hae.