Read Zotung Chin EZEKIEL 34 Bible Online

EZEKIEL 34 - Zotung Chin bible

EZEKIEL 34

¹BAWIPAW bya tuh ka kya yn thua zah:

²Ccungccapaw, Israel tuurin hae kha rawsete profehbya hotua: profehbya ho lah, tuurin hae kha hopah hae: Bawipaw PACHIA nynh hynhte a ho: Mimaw kyalya looh a dangkuh hae paw Israel tuurin hae nanning hanlan ngaethya lan kou um! Tuurin hae nynh tuu hae kha looh dang lan ccan khyh tou?

³Tuu matei kha na nia oh, tuuming boeining kha na lawku oh, tuu athopaw kha na chia oh; thuasalama tuu hae kha looh na dang khyh oh.

⁴A thawzyapaw kha thawzung na pya khyh oh, a ccihpaw kha na dansah khyh oh, vaemaw a muepaw kha na heepah khyh oh, a cceihseipaw kha na kikhae khyh oh, a zopaw kha na ccung khyh oh, minmin kha thawcci leite nangsete na uk oh.

⁵Tuurin a um khyh keiccuze tuu hae tuh pong a phiakuh hae; he a phiakuh hae tuh loramsaw hae elang looh lang a tang hae.

⁶Ka tuu hae tuh phiakuh hae zah, mua balyn vawlan te sangpyng ahangpaw miakaw vawlan khe a khiavuikuh hae; ka tuu hae tuh laephi vaw balyn khe pong phiakuh hae zah, minmin a ccungtu te a zahtu lu kheit san um khyh.

⁷Tukeiccuze, tuurin hae nanning, BAWIPAW bya hynh thaetua oh:

⁸Bawipaw PACHIA nynh a hopaw tuh: Kae tuh ka hiin thyhte, tuurin a um khyh keiccuze ka tuu hae tuh teipaw saw lang tang hae zah, loramsaw balyn hanlan looh lang a tang vae hae; ka tuurin hae nynh ka tuu hae kha ccung khyh hae, mimaw kha looh dangkuh hae zah ka tuu hae kha looh dang khyh hae;

⁹tukeiccuze, tuurin hae nanning, BAWIPAW bya hynh thaetua oh:

¹⁰Bawipaw PACHIA nynh hynhte a ho, Tuurin hae kha ka rawse hae; mih kuih kya umpaw ka tuu hae kha yn pya oh, cite minmin kha ka ngia cih hae, tuu hae looh dangpaw rya kyate ka haeungsah cih hae; tuurin hae nynh mimaw te mimaw kha looh dangkuh vae lan khyh hae. Ka tuu hae tuh minmin hanlan looh lang a tang khyh nawlan hae, mih khalang kyate ka tuu hae kha ka luesah cih hae.

¹¹Pawccecize Bawipaw PACHIA nynh hynhte a ho: Kamaw ccaccei nynh ka tuu hae kha ka ccung cih hae zah thawte ka zah cih hae.

¹²Tuurin hae nynh a phiakuh hae paw mih tuu hae kya a um lya hae khe, mih tuu hae kha thawte a ccung hae hawte, ka tuu hae kha thawte ka ccung cih hae, mae-ui zah marae amoh nin khe, minmin a phiakunaw hae hmin takyh kyate minmin kha ka luesah cih hae.

¹³Minphuin hae kyate ka poukhae cih hae, ram hae kyate ka suelua cih hae zah, mimaw ram lungkhu lang ka teekhae cih hae; Israel mua hae vawlan, vawkhu hae pepan te ram lungkhu umnaw hmin takyh kyakhe minmin kha looh ka dang cih hae.

¹⁴Ahoypaw ramnonaw khe ka paeesakuh cih hae zah, Israel mua ahang hae paw tuh minmin nynh rampaeekunaw hae athua cih; rampaeekunaw ahoynaw khe a rya cih hae zah, Israel mua hae vawlan umpaw myarya ramnonaw khe ram a paeekuh cih hae.

¹⁵Kamaw ccaccei hynh ka tuu hae a rintu ka thua cih zah, minmin kha ryanaw hmin ka pya cih hae, cite Bawipaw PACHIA nynh a ci.

¹⁶A zopaw kha ka ccung cih zah, a cceihseipaw kha ka kikhae cih, vaemaw a muepaw kha ka heepah cih zah, a thawzyapaw kha thawzung ka pya cih, thuasalama a thopaw te thawzung hoipaw kha ka roh cih. Minmin kha dingnaw te ka kua cih hae.

¹⁷Ka tuuphu hae nanning, Bawipaw PACHIA nynh hynhte a ho: Tuu te tuu laku thuasah, tuutepaw hae te miaatepaw hae laku thuasah bya ka pia cih hae:

¹⁸Ahoypaw ramnonaw kya ram na paeeku oh paw hynh zaw khyh tou? Pawccemou ram na paeeku leinaw oh kha nae ccu te na syde oh? Tui accipaw kha he na nia vae oh ze, na nia bang oh paw tui kha nae ccu te pawccemou na nuihsah oh?

¹⁹Nae ccu te na syde vae oh paw te nae ccu te na nuihsah vae oh paw tui kha tou ka tuu hae nynh a ae a neih cih hae?

²⁰Tukeiccuze, Bawipaw PACHIA nynh minmin kha hynhte a hopya hae: Athopaw tuu te angethahpaw tuu laku kya kamaw ccaccei nynh bya ka pia cih hae.

²¹Nanning nynh anyaapaw sarangpaw balyn kha phiariphiarae a phiaku mawlaezung hae, nae napang te nae raw khate na eih oh zah, nae ki te na dia oh keiccuze,

²²ka tuuphu kha ka khum cih zah, ro thua vae lan khyh hae; kamaw nynh tuu te tuu laku bya ka pia cih hae.

²³Minmin hanlan tuurin lu kheit, ka ryalahtu David kha ka nungpah cih hae zah, aning nynh looh a dang cih hae: aning nynh looh a dang cih hae zah aning tuh minmin hanlan tuurin athua cih.

²⁴Te kae, BAWIPAW tuh mih Pachia ka thua cih zah, ka ryalahtu David tuh minmin laku bawi athua cih; kae, BAWIPAW nynh phe ka ho vae.

²⁵Minmin ryte daenaw byakin kha ka rae cih zah, loramsaw hae kha ram kyate ccaring ka dee cih hae, tuhteze nynh minmin tuh ramkaw kya khyndadyh lan a um cih hae zah tuhpi kya a rya cih hae.

²⁶Minmin te ka mua po voilu lan umpaw hmin hae kha hythua ka pya cih hae; accyh thyhte khuaa ka rawsah cih zah, tuh-e khuaa tuh hythuanaw khuaa athua cih.

²⁷Ramkaw e thingku hae nynh athae thae cih hae zah, laephi nynh looh a pousah cih. Minmin tuh mih laephi kya lungdaete a um cih hae; a puihnaw hae paw mih ccong kha ka khyapah hae zah minmin kha see lang a mang hae paw kuih kyate he ka luesah hae te, kae tuh BAWIPAW ka thuapaw kha a nyh cih hae.

²⁸Minmin tuh minphuin ccangpaw hae nynh luadepaw lang tang vae lan khyh hae, ram lungkhu e sarangpaw hae nynh minmin kha tei vae lan khyh hae; lungdaete a um cih hae zah lu kheit nynh sanmah minmin kha rinaw pya vae lan khyh hae.

²⁹Myarya hoypaw thingthae-eccang kha ka voisahpah cih hae, tuhteze nynh ram lungkhu kya vuelawtuihawnaw kha teing lan khyh hae zah, minphuin ccangpaw hae nynh saryakunaw mah teing vae lan khyh hae.

³⁰Kae, BAWIPAW mih Pachia tuh minmin ryte ka um zah, Israel hae tuh ka ccungccaw hae nynh thua hae cipaw minmin nynh a nyh cih hae, cite Bawipaw PACHIA nynh a ci.

³¹Nanning tuh ka tuu hae, ram ka paeesakuh hae paw tuu hae na thua oh zah, kae tuh nae Pachia nynh ka thua, cite Bawipaw PACHIA nynh a ci.