Read Zotung Chin EZEKIEL 35 Bible Online

EZEKIEL 35 - Zotung Chin bible

EZEKIEL 35

¹BAWIPAW bya tuh ka kalan yn thua zah:

²Ccungccapaw, na mae kha Seir Mua kalan khe hawi lah, profehbya kha honua tua,

³Bawipaw PACHIA nynh hynhte a ho: Pou Seir Mua, nang kha kae rawse; nang kha arohpaw te accakaepaw lang rae khylan, ka kuih kae dyngnua.

⁴Na khua hae kha ka roh cih hae; nang tuh ccungccaw adaepaw lang na tang cih zah, kae tuh BAWIPAW ka thuapaw kha na nyh cih.

⁵Nang nynh langmawlya e rhawkunaw kha phang na kyngkuh zah, Israel ccungccaw hae tungvaw shethya a thua ccyh te minmin tungvaw nyathya detahnaw ccyh kyakhe minmin kha thaloi kalan na ap hae keiccuze,

⁶Bawipaw PACHIA nynh a hopaw tuh, Kae tuh ka hiin thyhte, chiise hanlan nang kha kae paccyn cih zah, chiise nynh nang kha ae deehui cih; chiise luanaw kha na hua khyh keiccuze chiise luanaw nynh nang kha ae deehui cih.

⁷Seir Mua kha accakaepaw te arohpaw lang ka rae cih zah, tuin kya oun thua hae paw te a cceih hae paw balyn kha ka roh cih hae.

⁸Na mua hae kha michi rhua te phe ka biasah cih; na sangpyng hae vawlan, na kya-e accya hae kya te na vawkhu hae balyn kyakhe thaloi te chia athua hae paw tuh a khuliakuh cih hae.

⁹Nang kha zungzae arohpaw lang kae rae cih zah, na khuapi hae kya humhung mah um lan khyh. Tetuh kae tuh BAWIPAW ka thuapaw kha na nyh cih.

¹⁰Nang nynh, “E minphuin ccangning te e ram ramning hynh ka kya-e athua cih hae zah, aening nynh ah ccou cih oh,” cite, tuin kya BAWIPAW phang a um pite na ho keiccuze,

¹¹Bawipaw PACHIA nynh a hopaw tuh: Kae tuh ka hiin thyhte, nang nynh minmin kha na hua hae keiccuze thinrianaw te eiungnaw kha na langsaku thyhte, na tungvaw ka cyih cih; nanning kha bya he kae pia oh te, nanning kha kamaw ccaccei nynh kae nysakuh cih oh.

¹²Nang nynh, “Israel mua hae tuh ccungccaw adae vae, aening nynh ae khylan aening kalan pya athua vae hae,” cite saryanaw bya na hopaw balyn kha kae, BAWIPAW nynh phe ka thae vae, cipaw na nyh cih.

¹³Kae kha rawsete na munglae te na pookuh zah, ka thethya na hopaw kha phe ka thae.

¹⁴Bawipaw PACHIA nynh hynhte a ho: Laephi pynpi a lungtua lyakhe nang kha ccungccaw phe kae daesah cih.

¹⁵Israel hae kya-e rho kha ro athua lyaze, na lungtua hawte, na tungvaw ka cyih cih. Pou Seir Mua, nang te Edom ram balyn tuh na roh cih oh. Tetuh kae tuh BAWIPAW ka thuapaw kha na nyh cih oh.