Read Zotung Chin EZEKIEL 36 Bible Online

EZEKIEL 36 - Zotung Chin bible

EZEKIEL 36

¹Ccungccapaw, Israel mua hae kha profehbya hopya tua hae: Pou Israel mua hae, BAWIPAW bya hynh thaetua oh.

²Bawipaw PACHIA nynh a hopaw tuh: Rhaw hae nynh, “Alei! Zungzae tynpaw mua hae tuh kaening kya-e nynh athua vae hae,” cite ae hopya oh keiccuze,

³profehbya kha hotua: Bawipaw PACHIA nynh hynhte a ho: Nanning tuh ccangpaw minphuin hae kya-e thua khylan te minphuin hae laku thethya hopaw te saryapaw lang na tang ccaw oh cite, nanning kha ae maemih oh zah, teitei langte balyn ae syro oh keiccuze,

⁴pou Israel mua hae, Bawipaw PACHIA bya hynh thaetua oh: Mua hae te sangpyng hae, vawkhu hae te accya hae, po voilu lan um hae paw ccangpaw minphuin hae nynh luadepaw te saryapaw lang a tang vae hae paw arohpaw hmin hae te ccuetawpaw khua hae kalan khe Bawipaw PACHIA nynh hynhte a hopya hae:

⁵Bawipaw PACHIA nynh a hopaw tuh: Ccangpaw minphuin hae te Edom hae balyn tungvaw khe eiung thinriate bya ka ho cih, Edom hae nynh myarya lungtuakhaekute theihryanaw byaho hae zah ka ram kha luadete mimaw ram lang a lawku hae.

⁶Tukeiccuze Israel ram konglangte profehbya ho lah, mua hae te sangpyng hae, vawkhu hae te accya hae kha hopya tua hae, Bawipaw PACHIA nynh hynhte a ho: Nanning tuh minphuin ccangpaw hae nynh saryakunaw kha na teing oh keiccuze eiung thinriate bya ka ho cih;

⁷tukeiccuze Bawipaw PACHIA nynh hynhte a ho: Na pepan po voilu lan um hae paw minphuin hae toulou kha saryakunaw a teing cih hae cite bya ka kinku.

⁸Thuasalama, pou Israel mua hae, na karan hae tuh atoih cih zah, ka ccungccaw Israel hae hanlan na thingthae tuh athae cih; pawccecize minmin tuh aro mawze inn lang oun ki cih hae.

⁹Dotua oh, kae tuh nae hanlan nynh ka thua; nae kalan ka maeleihkuh cih zah nanning tuh loo lang pho na thua cih oh zah ccacii tu na thua cih oh;

¹⁰nanning Israel hae balyn kha milu kae pungzaesah cih oh; khua hae kya ccungccaw a um cih zah arohpaw hmin hae kha raethui athua cih.

¹¹Nae tungvaw khe ccungccaw te sahiinpaw hae kha ka pungzae sah cih hae. Minmin tuh a lungthung cih hae zah a pungthung cih hae; alia vae paw nae ccyh lya hawte kae umsah cih oh zah, langmawlya laeze ahoy huapaw kha kae raepah cih oh. Tetuh kae tuh BAWIPAW ka thuapaw kha na nyh cih oh.

¹²Ka ccungccaw Israel hae kha nanning vawlan khe ka cciakhae cih hae, nanning tuh minmin kya-e na thua cih oh zah, mih rho na thua cih oh. Mih ccaaw hae kha na theih vae lan khyh oh.

¹³Bawipaw PACHIA nynh hynhte a ho: Minmin nynh nang kha, “Nang nynh ccungccaw hae kha na ae hae, na minphuin athuapaw imua hae kha na chia hae,” cite ae ci hae;

¹⁴tukeiccuze nang nynh ccungccaw hae kha na ae vae lan khyh hae zah, na minphuin athuapaw imua hae kha na theih vae lan khyh hae, cite Bawipaw PACHIA nynh a ci;

¹⁵minphuin ccangpaw hae nynh saryakunaw bya kha kae thaesah vae lan khyh zah, ccungccaw hae nynh theihryakunaw kha na teing vae lan khyh; na minphuin kha na thy na pawsakuh vae lan khyh, cite Bawipaw PACHIA nynh a ci.

¹⁶BAWIPAW bya tuh ka kya yn thua zah:

¹⁷Ccungccapaw, Israel hae nynh mimaw laephi kya he a um hae te, mih hiinzia te mih cyisahnaw khate ram kha a thusah hae; ka muihnaw kya mih ozia tuh nopi nynh nopiny a ny lya-e nungsikunaw te nynh aloku.

¹⁸Tukeiccuze minmin nynh ram lungkhu kya a luasah hae paw chiise keiccu te ram a thusahnaw hae paw zohtuh hae keiccuze mih tungvaw kya ka thinrianaw ka bunua hae.

¹⁹Minphuin hae laku kya phiariphiarae ka nung hae zah ram hae kya ka phiasaku hae; mih ozia te mih cyisahnaw thyhte bya ka pia hae.

²⁰Thuasalama minphuin hae kya he a thua hae te, a thuanaw takyh hae kyakhe ming hae nynh, “E hae hynh BAWIPAW ccungccaw nynh thua hae, tuhzemah a ram kyate a pou vae hae,” cite a ho hae keiccuze, minmin nynh athyaapaw ka min kha a thusah hae.

²¹Thuasalama Israel hae nynh a thuanaw hae minphuin hae laku kya a thusah hae paw ka min athyaapaw hanlan ka thinphang.

²²Tukeiccuze Israel hae kha hopya tua hae, Bawipaw PACHIA nynh hynhte a ho: Pou Israel hae, e ka cyipaw hynh nanning hanlan thua khyh, thuasalama na thuanaw oh minphuin hae laku kya na thusah vae oh paw ka min athyaapaw hanlan nynh thua.

²³Minphuin hae laku kya na thusah oh zah athu vae paw ka min alesaepaw kha ka thyaasah cih; ka thyaanaw kha mih malang khe nanning liate he ka langsakuh te, minphuin hae nynh kae tuh BAWIPAW ka thuapaw kha a nyh cih hae, cite Bawipaw PACHIA nynh a ci.

²⁴Minphuin hae kyate nanning kha kae ko cih oh, ram takyh kyate kae suelua cih oh zah, naemaw ram lang kae cciakhae cih oh.

²⁵Nanning kha tui ccipaw te kae hei cih oh zah nae nungsikunaw balyn kyate na thyaa cih oh, nae zohtuh balyn kyate kae thyaasah cih oh.

²⁶Thinlung thawpaw kae pya cih oh zah, nae lungkhu kya tuanaw thawpaw kae sang cih oh; nae pyn kyate lung thinlung kha ka lah cih zah, ngesaw thinlung kha kae pya cih oh.

²⁷Ka muisaw kha nae lungkhu kya ka sang cih, ka phungbya hae kha kae zuisah cih oh zah ka phungzae hae kha raeringkute na zui cih oh.

²⁸Tetuh nae minpaaw hae ka pya hae paw ram kya na um cih oh; nanning tuh ka ccungccaw hae na thua cih oh zah, kae tuh nae Pachia ka thua cih.

²⁹Na nungsikunaw oh balyn kyate kae khum cih oh, ccathae kha ka ko cih zah patae ka voisah cih, nae kya ccakannaw ka umsah lan khyh.

³⁰Thingthae kha patae ka thaesah cih zah loo kyate looh patae ka voisah cih; tuhteze nynh minphuin hae laku kya ccakanccite maethyanaw kha papin bua na teing vae lan khyh oh.

³¹Tetuh ahoy leipaw nae ozia athahpaw te ahoy leipaw nae cyisahnaw kha na liathui cih oh zah, nae hoyleinaw te anungsikuhpaw nae cyisahnaw keiccuze naemaw toulou nae luathuakuh cih.

³²E ka cyi lanpaw hynh nanning hanlan thua khyh cipaw nyh oh, cite Bawipaw PACHIA nynh a ci. Pou Israel hae, nae maethah sah lah, lungrote um oh.

³³Bawipaw PACHIA nynh hynhte a ho: Nae hoyleinaw balyn kyate he kae thyaasah oh nin khe, khua hae kya ccungccaw ka umsah cih zah arohpaw hmin hae kha raethui athua cih.

³⁴Po a cceih hae paw balyn nynh a muihnaw hae khe vua athua vae paw ram tuh, vuapaw ram thua vae leite, loo lang pho athuathui cih.

³⁵Tetuh minmin nynh, “Vua athua vae paw e ram tuh Eden khokhu hawte nynh athua vae; alakawpaw, vuapaw te aroh vae paw khua hae tuh atu ccungccaw um vae hae zah rhawlungrua mah a um vae,” cite a ho cih hae.

³⁶Tetuh kae, BAWIPAW nynh aroh vae paw hmin hae kha ka raethui zah, vua athua vae paw loo kyakhe ccacii ccouthui athua vae cipaw kha nae pepan po voilu lan um hae paw ccangpaw minphuin hae nynh a nyh cih hae; kae, BAWIPAW nynh phe ka ho vae zah, ka cyih cih.

³⁷Bawipaw PACHIA nynh hynhte a ho: E hynh Israel hae hanlan cyipya khylan ngiakunaw kaw ka ua ung cih hae: Tuuphu hawte milu ka lungsah thung cih hae.

³⁸Silawnaw hanlan mangpaw tuuphu hawte thuasah, poitua lyaze Jerusalem e tuuphu hawte, arohpaw khua hae tuh ccungccaw zapi khate phe abeih cih. Tetuh minmin nynh BAWIPAW ka thuapaw kha a nyh cih hae.