Read Zotung Chin EZEKIEL 37 Bible Online

EZEKIEL 37 - Zotung Chin bible

EZEKIEL 37

¹BAWIPAW kuih tuh ka tungvaw yn um, te BAWIPAW muisaw nynh yn cciakhae zah, ru phe beihpaw accya ngaelung khe yn nung.

²Tuh-e ru hae balyn kyakhe po voilu lan yn cciakhae; tuh-e accya kyakhe ru patae um zah, tuh-e ru hae tuh karae arou hae.

³BAWIPAW nynh kae kha, “Ccungccapaw, e ru hae hynh a hiin kho cih hae tou?” cite yn khia zah kae nynh, “Pou Bawipaw PACHIA, namaw nynh phe na ny,” ka cipya.

⁴Tetuh BAWIPAW nynh kae kha yn hopah zah, “E ru hae hynh profehbya hopya tua hae: Pou aroupaw ru hae, BAWIPAW bya hynh thaetua oh.

⁵E ru hae kha Bawipaw PACHIA nynh hynhte a hopya hae: Nae lungkhu lang hy kha ka teesah cih zah na hiin cih oh.

⁶Nae kyakhe tharui ka saesah cih, ngesaw ka thuasah cih zah ving te kae bong cih oh, nae lungkhu kya hy ka nung cih zah na hiin cih oh; te kae tuh BAWIPAW ka thuapaw kha na nyh cih oh,” a ci.

⁷Kaw yn pya thyhte kae nynh profehbya ka ho; profehbya ka ho lyakhe vaekheihmawte roi tuh myarya yn ccae, te ru hae tuh sueluakuh hae zah ccangkheit te ccangkheit oun tungkuh vae hae.

⁸Ka do zah minmin kya tharui yn um, ngesaw mah yn um zah ving nynh minmin kha a bong hae; thuasalama minmin kya hy um khyh.

⁹Tetuh BAWIPAW nynh kae kha yn hopah zah, “Ccungccapaw, hy kha profehbya hopah, hy kha profehbya hopya tua: Bawipaw PACHIA nynh hynhte a ho: Pou hy, teitei langte balyn yn thua lah, e michi hae hynh a hiin ccaw hae, mih hysuesah tua hae,” a ci.

¹⁰Aning nynh kaw yn pya thyhte profehbya ka ho, te hy tuh mih lungkhu lang tee zah a hiin hae, mih ccu te thadyn hae zah myarya lungpaw rhawkawphu zeih acih hae.

¹¹Te BAWIPAW nynh kae kha, “Ccungccapaw, e ru hae hynh Israel hae balyn kha nynh thua hae. Minmin nynh, ‘Aening ru tuh karae rou vae zah aening ngaehoinaw tuh phe zo vae; aening tuh khaleih mawte vua ah thua vae oh,’ a ciku hae.

¹²Tukeiccuze minmin kha profehbya hopah hae, Bawipaw PACHIA nynh hynhte a ho: Pou ka ccungccaw hae, nae shawku hae kha ka hung cih zah, nanning kha poh kae thuaa cih oh; te nanning kha Israel ram lang kae kikhae cih oh.

¹³Pou ka ccungccaw hae, nae shawku hae kha ka hung zah nanning kha poh he kae thuaa oh te, kae tuh BAWIPAW ka thuapaw kha na nyh cih oh.

¹⁴Nae lungkhu khe ka muisaw kha ka sang cih zah na hiin cih oh, te naemaw laephi kya kae nung cih oh; tetuh kae, BAWIPAW nynh phe ka ho vae zah ka cyih cih cipaw kha na nyh cih oh,” cite BAWIPAW nynh a ci.

¹⁵BAWIPAW bya tuh ka kya yn thua zah:

¹⁶Ccungccapaw, ccungngue ccangkheit kha lawkuh lah, a vawlan khe, “Judah te a ruiban Israel hae hanlan,” cite zeitua; tukoute ccangpaw ccungngue kha lah lah, a vawlan khe, “Josef (Efraim ccungngue) te a ruiban Israel hae balyn hanlan,” cite zeitua;

¹⁷khah-e ccungngue hae kha na kuih kya ccungngue ccangkheit lang a tang nawlan, piade hae.

¹⁸Na ccungccaw hae nynh nang kha, “E hynh paw suilan mou athua cipaw nae langsapakuh lan khyh tou?” cite he ae khia hae te,

¹⁹minmin kha hopya tua hae, Bawipaw PACHIA nynh hynhte a ho: Josef ccungngue (Efraim kuih kya umpaw) te a ruiban Israel minphuin hae kha ka lah vae cih hae; te khah-e ccungngue te Judah ccungngue kha ka pyde cih zah, ka kuih kya ccungngue ccangkheit lang a tang ccaw hae cite ccungngue ccangkheit lang ka rae cih hae.

²⁰Ccaw na zeinawpaw ccungngue hae tuh minmin nynh a muihnaw hae na kuih kya he a um hae te,

²¹minmin kha hopah hae, Bawipaw PACHIA nynh hynhte a ho: Israel ccungccaw hae kha a thuanaw hae minphuin hae laku kyate ka ko cih hae, mih umnaw takyh kyate ka suelua cih hae zah mimaw ram lang ka cciakhae cih hae.

²²Tuh-e ram lungkhu Israel mua hae vawlan khe minphuin phuin kheit lang ka rae cih hae; minmin balyn kha siapharan lu kheit nynh a uk cih hae. Minphuin ccangning lang papin tang vae lan khyh hae zah peenaw ccangning lang papinmaw phiakuh thui vae lan khyh hae.

²³Mih zohtuh hae, anungsikuhpaw mih uccaw hae te mih seinaw hankhakheit khate mimaw toulou kha papin thusakuh thui vae lan khyh hae. A khuliakunaw hae zynseinaw balyn kyate ka khum cih hae zah ka thyaasah cih hae. Tetuh minmin tuh ka ccungccaw hae athua cih hae zah, kae tuh mih PACHIA ka thua cih.

²⁴Ka ryalahtu David tuh minmin a uktu hae siapharan athua cih; mih balynte tuurin lu kheit rou kha a hoi cih hae. Ka phungzae hae kha a zui cih hae zah ka phunglang hae kha raeringkute a zui cih hae.

²⁵Ka ryalahtu Jakob ka pyapaw ram, nae minpaaw hae nynh a umnaw hae ram kyakhe a um cih hae; minmin, mih ccaaw hae te mih mintaw hae tuh tuin kya zungzae a um cih hae; ka ryalahtu David tuh mih uktu bawi athua zungzae cih.

²⁶Minmin ryte daenaw byakinnaw kha ka rae cih; tuh-e tuh minmin ryte ka raepaw zungzae tynpaw byakinnaw athua cih; minmin kha hythua ka pya cih hae zah ka pungzaesah cih hae, ka beikinnthyaa kha minmin laku kya ka nung zungzae cih.

²⁷Ka umnaw hmin tuh minmin kya a um cih; kae tuh mih Pachia ka thua cih zah, minmin tuh ka ccungccaw hae athua cih hae.

²⁸Tuhcite ka beikinnthyaa tuh minmin laku kya zungzae he a um te, minphuin hae nynh kae, BAWIPAW nynh Israel kha ka thyaasah cipaw a nyh cih hae.