Read Zotung Chin EZEKIEL 38 Bible Online

EZEKIEL 38 - Zotung Chin bible

EZEKIEL 38

¹BAWIPAW bya tuh ka kya yn thua zah:

²Ccungccapaw, Magog ram umpaw Meshek te Tubal uktu bawi Gog kha na mae hawinua lah, profehbya honua tua:

³Bawipaw PACHIA nynh hynhte a ho: Pou Meshek te Tubal uktu bawi athuapaw Gog, nang kha kae rawse.

⁴Nang kha kae maeleihsakuh cih, na khaw kha bawnawpaw te kae baw cih zah, na rhawkaw hae balyn, marang hae, marang rhawkaw hae, rhaw uccaw phe ccing lan a lawkuh hae paw tuh-e rhawkaw hae balyn, te khawriaphua, khawriaphua dihpaw te thaloi ccyngkuh hae paw ccungccaw zapi patae ryte nang kha kae cciakhae cih oh.

⁵Persia, Kush te Put minphuin hae mah a umbua hae, tuh-e hae balyn tuh khawriaphua te sivawlukhung ccarou a hoi hae;

⁶Gomer te a rhawkaw hae balyn, thahlang adianaw umpaw Beth-togarmah te a rhawkaw hae balyn—ccungccaw patae tuh na kya a cceihbua hae.

⁷Nang te na kya a pumkuh hae paw zapi balyn tuh raeringkuh oh lah, paccynkute um oh, minmin hanlan rintu lang umtua.

⁸Ninsaw patae aro koute nang kha sueluabua na thua cih; nyalang kum patae aro te, rhaw kyate muethui koute raethuipaw ram kha na ccianua cih, tuh-e ram tuh minphuin patae kyate sueluapaw ccungccaw hae a umnaw hae ram, khaw cia ccungccaw adae vae paw Israel mua hae vawlan umpaw ram nynh thua; tuh-e hae tuh minphuin hae kyate poukhaepaw ccungccaw hae thua hae zah, atu tuh mih balynte khyndadyh lan a um vae hae.

⁹Nang tuh khise hawte malang na cceih cih; nang, na rhawkaw hae balyn te na kya umbua hae paw ccungccaw patae tuh ram a bongpaw maeking hawte na thua cih oh.

¹⁰Bawipaw PACHIA nynh hynhte a ho: Tuin nin vae tuh na lungkhu kya tuanaw patae yn thungkuh cih zah, ahoy leipaw paccynnaw kha na paccyn cih.

¹¹Nang nynh, “Khualungrua koihkuh leipaw khua taraw hae umnaw ram kha ka ccianua cih; khualungrua, koikua khyhze koikua ccong um leite khyndadyh lante daebabi lan um hae paw kha ka tuk cih hae,” na ci;

¹²mih uccaw kha luadete lawku lan thuasah, langmawlya tuh la roh zah atu ccungccaw a um vae paw hmin hae, minphuin hae kyate suelua thua hae zah, sahiin te uccaw a hoi hae paw te laephi angaelung um hae paw kha tuk lan thuasah na tuakuh cih.

¹³Sheba hae, Dedan hae, Tarshish kungku hae te arawthungpaw a ngawphue hae balyn nynh nang kha, “Uccaw luadete cciakhae khylan nae thua vae tou? Luadepaw uccaw hae, sui te ngun, sahiin te uccaw hae, luadepaw uccaw patae kha cciakhae khylan tou na ccungccaw zapi hae kha na pum hae?” ae ci cih hae.

¹⁴Tukeiccuze, ccungccapaw, profehbya ho lah, Gog kha hopya tua: Bawipaw PACHIA nynh hynhte a ho: Ka ccungccaw Israel hae tuh ngaengante a um nin hae khe, nang nynh nae thokuh cih zah,

¹⁵nang te ccungccaw patae tuh marang ccikuh hae paw, zapi patae, athungpaw rhawkaw hae ryte thahlang asaw huanaw na hmin kyate nae thua cih oh;

¹⁶maeking nynh ram kha a bong hawte ka ccungccaw Israel hae kha na ccianua cih hae. Nyalang ccyh kya ka ram dou khylan nang kha kae cciakhae cih, tuhteze nynh, pou Gog, minphuin hae malang khe ka thyaanaw kha nang na liate he ka langsakuh te, minphuin hae nynh kae kha yn nyh cih hae.

¹⁷Bawipaw PACHIA nynh hynhte a ho: Israel hae dou khylan nang kha kae cciakhae cih, cite langmaw lyaze profehbya ho hae paw ka ryalahtu Israel profeh hae kyate bya ka la honuathepaw kha nang na thua khyh tou?

¹⁸Bawipaw PACHIA nynh a hopaw tuh: Gog nynh Israel ram kha ccianuate he yn tuk nin khe, myaryamaw ka thinria cih.

¹⁹Ka thinrianaw tuh maee lang ruate bya ka ho: Tuin nin khe Israel ram kya innry thawte asuekuh cih;

²⁰rili kya-e ngasaw hae, vaawlang e pavaw hae, ramkaw e sarangpaw hae, lae vawlan avawpaw balyn te laephi vawlan e ccungccaw hae balyn tuh ka malang a thyngkuh cih hae, mua hae tuh a ting cih hae, theihpang hae tuh a khuliakuh cih hae zah khualungrua miakaw tuh a ting cih hae.

²¹Ka mua hae balyn vawlan khe Gog kha rawsete thaloi kha ka konua cih; ccungccaw hae tuh lu kheit te lu kheit thaloi te a baekuh cih hae, cite Bawipaw PACHIA hynh a ho.

²²Shethya te chiise luanaw khate Gog kha bya ka pia cih; amaw, a rhawkaw hae te amaw kya umbua hae paw ccungccaw patae tungvaw khe thawte arahpaw khuaa, hya, maee te kemaee kha ka ccawsah cih.

²³Tuhcite ka lesaenaw te ka thyaanaw kha ka langsakuh cih zah minphuin patae malang khe kamaw kha ka nysakuh cih hae. Tetuh kae tuh BAWIPAW ka thuapaw kha a nyh cih hae.