Read Zotung Chin EZEKIEL 39 Bible Online

EZEKIEL 39 - Zotung Chin bible

EZEKIEL 39

¹Ccungccapaw, Gog kha rawsete profehbya hotua, Bawipaw PACHIA nynh hynhte a ho: Meshek te Tubal hae uktu bawi Gog, nang kha kae dou!

²Nang kha kae maeleih cih zah kae dee cih, thahlang asaw huanaw kyate kae cciakhae cih zah Israel mua hae kalan khe kae cciakhae cih.

³Na ranglang kuih kya-e na li kha ka khya cih zah, na voilang kuih kya-e na the kha ka ccawsah cih.

⁴Namaw, na rhawkaw hae balyn te na umkheih oh paw ccungccaw hae tuh Israel mua hae vawlan khe na chih cih oh; nang kha saw aepaw pavaw aphuinphuin te loramsaw hae kalan khe looh lang kae pya cih.

⁵Ramkaw huataw kya na chih cih; pawccecize kae nynh phe ka ho vae, cite Bawipaw PACHIA nynh a ci.

⁶Magog ram te ngaengante um hae paw rili kin e ram hae kha maee ka sawnua cih hae; tetuh minmin nynh kae tuh BAWIPAW ka thuapaw kha a nyh cih hae.

⁷Athyaapaw ka min kha ka ccungccaw Israel hae kya ka nysah cih hae; athyaapaw ka min kha thethyasah lan ka ua vae lan khyh; te Israel hae kyakhe kae tuh Bawipaw, Athyaapaw Pachia ka thuapaw kha minphuin hae nynh a nyh cih hae.

⁸Tuh-e tuh a thua vae! Tuh-e tuh acyihkuh vae, cite Bawipaw PACHIA nynh a ci. E nin hynh ka ho vae paw nin nynh thua.

⁹Te Israel khua hae kya um hae paw tuh a pou cih hae zah rhawtuknawpaw zunghe hae—khawriaphua dihpaw te khawriaphua lepaw, the te li, ccong te ccoi hae kha kum sari lungkhu maee te a soi cih hae.

¹⁰Minmin nynh loo kya-e maeething kha lawku ho lan khyh, ramkaw e thingku kha mah nge ho lan khyh, pawccecize zunghe hae kha maeetua nawlan a mang cih hae; minmin a la luadetu hae kha a luaderu cih hae zah, mih uccaw a ccuekhaetu hae kha a ccuekhaepah ru cih hae, cite Bawipaw PACHIA nynh a ci.

¹¹Tuin nin khe Gog kha Israel ram, rili nithua lang Khuaccongtu hae Accya kyakhe uukunaw hmin ka pya cih; tuh-e hmin nynh khuaccong hae paw ccianaw kha a khaw cih, pawccecize tuin kyakhe Gog te a ccungccaw hae balyn kha uu athua hae; tuh-e hmin tuh Hamon-gog Accya cite minphu athua cih.

¹²Ram kha thyaasah khylan Israel hae nynh michi rhua kha sawpaw sah sari lungkhu a uh cih hae.

¹³Ramccungccaw balyn nynh minmin kha a uh cih hae; tuh-e ryalaw nynh minmin kha ka phu-enaw ka langsaku nin khe sawtuanaw a ccousah cih hae, cite Bawipaw PACHIA nynh a ci.

¹⁴Ram kha athyaa ccaw cite, ram lungkhu kya po cciate a uu loh lei hae paw rhaw hae rhua miakaw kha uu khylan pise hae kha taekhiate a nung cih hae; tuh-e hae nynh sawpaw sah sari lungkhu a ccung cih hae.

¹⁵Ccungtu hae nynh ram lungkhu po a ccia lya hae khe, lukhakheit nynh ccungccaw ru kha a muih lanze, tuh-e ru tuh rhua uhtu hae nynh Hamon-gog Accya kya a uu mawlaezung hae, tuh-e ru a muihtu nynh tuh-e ru pe khe syntawnaw a rae cih.

¹⁶(Hamonah khuapi mah tuin kya a umbua.) Tuhcite ram kha a thyaasah cih hae.

¹⁷Bawipaw PACHIA nynh hynhte a ho: Ccungccapaw, pavaw phuin miakaw te loramsaw balyn kalan khe hopah hae: Sueluakuh oh lah rang oh, Israel mua vawlan nanning elang ka paccynpaw silawnaw poi pi kalan khe teitei langte balyn yn sueluakuh oh lah, asaw te achii kha na ae na neih cih oh.

¹⁸Athungpaw ccungccaw hae saw kha na ae cih oh zah laephi uktu bawi hae chii kha na neih cih oh—Bashan ram e athopaw tuutepaw hae, tuutaw hae, miaatepaw hae te tangnuapaw hae saw te chii kha na ae na neih cih oh.

¹⁹Nanning elang ka paccynpaw silawnaw poi kyakhe na byn makhia oh atho kha na ae cih oh zah, na rui makhia oh achii kha na neih cih oh.

²⁰Te marang hae, marang rhawkaw hae, rhawkaw hae te rhawkaw aphuinphuin hae kha ka ccaboi kya phe byn lan na ae cih oh, cite Bawipaw PACHIA nynh a ci.

²¹Ka phu-enaw kha minphuin hae laku kya ka langsakuh cih; ka raepaw ka byapianaw te mih tungvaw ka khangpaw ka kuih kha minphuin balyn nynh a muih cih hae.

²²Tuin nin te tho zah malang vae tuh, Israel hae nynh kae tuh BAWIPAW mih Pachia ka thuapaw kha a nyh vae cih hae.

²³Israel hae tuh ka tungvaw mih lungzi khyh keiccuze mih hoyleinaw hanlan kyngte ramccang lang cciakhae athua hae paw kha minphuin hae nynh a nyh cih hae. Tukeiccuze ka mae ka retawku hae, mih rhaw hae kuih kalan ka pya hae zah, thaloi te marya a chih hae.

²⁴Mih nungsikunaw te mih seinaw thyhte mih tungvaw rya ka lah zah, ka mae kha ka retawku hae.

²⁵Tukeiccuze Bawipaw PACHIA nynh hynhte a ho: Atu tuh Jakob kha hoynaw ka pyathui cih zah, Israel hae balyn tungvaw thawccinaw ka hoi cih; athyaapaw ka min kha ka thungkhaw cih.

²⁶Humhung nynh mah rinaw pya leite mih ram kya ngaengante he a um hae te thuasah, minphuin ccangpaw hae kyate minmin kha kikhaete mih rhaw hae ram kyate ka suelua hae zah, minphuin patae muihnaw khe ka thyaanaw kha minmin liate he ka langsakuh te thuasah, mih maethyanaw te ka tungvaw mih lungzi leinaw balyn kha a ning cih hae.

²⁸Minmin kha minphuin hae laku kya see lang tang khylan ka saw hae zah, tukoute mimaw ram lungkhu lang ka suelua hae keiccuze kae tuh BAWIPAW mih Pachia ka thuapaw kha a nyh cih hae. Minmin kha lu kheit sanmah nulang ka nungsya lan khyh hae;

²⁹Israel hae tungvaw ka muisaw kha he ka bu te, minmin kha papinmaw ka mae ka retawkuh vae lan khyh hae, cite Bawipaw PACHIA nynh a ci.