Read Zotung Chin EZEKIEL 40 Bible Online

EZEKIEL 40 - Zotung Chin bible

EZEKIEL 40

¹See lang kae tangnaw kum kuin lae pangawnaw, masaty sawpaw nin haw nin, Jerusalem khuapi a lawnaw hae te kum haw lae pali accing nin ccaccei khe, BAWIPAW kuih tuh ka tungvaw yn um zah, tuh-e khuapi kalan khe yn cciakhae.

²Pachia kya-e vizin kyakhe aning nynh kae kha Israel ram lang yn cciakhae zah, myarya hangpaw mua vawlan khe yn nung, tuh-e mua vawlan alia langkhe khuapi te alokuhpaw inn hae a um hae.

³Tuh-e khuapi kalan khe he yn cciakhae tuh, sohin hawte a muinsan phaephae akpaw ccungccapaw lu kheit a um, a kuih kyakhe laawrui te tounawpaw ccungngue ccyngkuh zah koikua kya phang a thadyn.

⁴Tuh-e paw nynh kae kha, “Ccungccapaw, hoyte do lah, pekite ngaetua, kae muihsah cih paw balyn kyakhe na thinlung kha nungtua, pawccecize tuh-e tuh nang kha muihsah khylan nynh hynhlang kae cciakhae; na muihpaw balyn kha Israel hae kya na ho cih,” yn cipya.

⁵Beikinn atolang khe po voilu lan lungrua a um. Ccungccapaw kuih kya umpaw tounawpaw ccungngue tuh dong taruh asae, tuh-e dong tuh asaepaw phuin thua zah, tuh-e dong kheit tuh dong kheit te zong kheit asae; aning nynh a toupaw lungrua tuh ccungngue ccangkheit thaaw zah ccungngue ccangkheit ahang.

⁶Te nithua lang hawipaw sakoih kalan khe cceih zah, a nawkui kyate a kae koute teenaw sakoihzung kha tou zah, ccungngue ccangkheit acih.

⁷Akhaan hae um zah, khaan kheit ze tounawpaw ccungngue ccangkheit cci ko zah asae; akhaan hae laku kya tuh dong pangaw cci asawkuh; teenaw sakoihzung te alungkhu lang umpaw tee takawnaw akhaan tuh tounawpaw ccungngue ccangkheit asae.

⁸Te aning nynh sakoih tee takawnaw akhaan alungkhu lang kha tou zah dong kheit acih.

⁹Sakoih tee takawnaw akhaan kha tou zah dong tarya acih; a tung hae tuh dong ning cci ahang hae; thuakaw tee takawnaw akhaan tuh thuakaw alungkhu lang nynh a um.

¹⁰Nithua lang e sakoih voikheih langkhe akhaan khaan thum um zah akopaw phe lokuh hae; voikheit langsang e tung hae mah ahangpaw phe lokuh hae.

¹¹Te aning nynh teenaw sakoih kha tou zah dong haw acih; sakoih akopaw kha tou zah dong haw lae thum acih.

¹²Tuh-e akhaan hae malang khe voikheit langkhe pang anepaw dong kheit cih paw a um; akhaan akopaw te asaepaw tuh dong taruh cci acih.

¹³Oute akhaan khaan kheit nulang e pang te ccangpaw khaan kheit nulang e pang kha tou zah akopaw dong kuin lae pangaw acih.

¹⁴Tee takawnaw akhaan kha mah tou zah dong kuin acih; te voidu po voilu lan umpaw tung hae koute sakoih a um.

¹⁵Teenaw kya a umpaw sakoih malang kyate alungkhu lang e tee takawnaw akhaan tuh dong sung pangaw asawkuh.

¹⁶Akhaan hae te sakoih alungkhu langte po voilu lan umpaw mih tung hae kyakhe thanlan-aw hae a um hae, tee takawnaw akhaan hae mah alungkhu langte po voilu lan thanlan-aw hae a um; tung hae kyakhe ungcci ku azuh kha a soi hae.

¹⁷Te aning nynh kae kha atolang e voidu lungkhu langkhe yn cciakhae; tuin kya akhaan hae a um hae, voidu po voilu lan lung phaekuhpaw a um; tuh-e lung phaekuhpaw vawlan khe akhaan sung thum a um.

¹⁸Tuh-e lung phaekuhpaw tuh sakoih po a um thyhte po a um; tuh-e tuh ane huapaw lung phaekuhpaw nynh thua.

¹⁹Te aning nynh ane huapaw sakoih alungkhu langte alungkhu lang e voidu atolang amalang kha tou zah dong za kheit asawkuh.

²⁰Te aning nynh thahlang hawipaw atolang e voidu sakoih ahangpaw te akopaw kha a tou.

²¹Akhaan hae tuh voikheit langte khaan thum cci um hae zah, tung hae, tee takawnaw akhaan hae tuh masaty e sakoih kya-e hae te phe lokuh hae; ahangpaw dong sung pangaw cih zah akopaw dong kuin lae pangaw acih.

²²A thanlan-aw hae, tee takawnaw akhaan hae, a ungcci ku hae tuh nithua lang hawipaw sakoih kya-e hae te alokuh hae. Tuh-e sakoih kalan kaenaw tuh nawkui thyh sari um zah, tee takawnaw akhaan tuh alungkhu langkhe nynh a um.

²³Nithua lang hawte, niccaw lang e sakoih te arawsekunaw khe alungkhu lang e voidu kalan teenawpaw sakoih ccangkheit a um; aning nynh sakoih te sakoih laku kha tou zah dong za kheit acih.

²⁴Te aning nynh alia langkhe yn cciakhae zah, alia lang tuin sakoih ccangkheit a um; aning nynh tung hae te tee takawnaw khaan hae kha tou zah, tuh-e hae tuh ccangpaw hae te adi-ale phe lokuh hae.

²⁵Tuh-e sakoih po voilu lan thuasah, tee takawnaw akhaan kya thuasah ccangpaw hae hawte thanlan-aw hae um zah, asaepaw dong sung pangaw, akopaw dong kuin lae pangaw acih.

²⁶Tuh-e kalan kaenaw tuh nawkui thyh sari um zah, tee takawnaw khaan tuh alungkhu langte nynh a um. Tung voikheit voikheit langkhe ungcci ku azuh kha a soi hae.

²⁷Alungkhu lang e voidu alia langkhe sakoih ccangkheit a um; sakoih ccangkheit te ccangkheit kha alia langkhe po toubung zah dong za kheit acih.

²⁸Alia lang e sakoih kyate alungkhu lang e voidu kalan khe yn teekhae zah, alia lang e sakoih kha a tou; tuh-e tuh ccangpaw hae te ako aby phe lokuh.

²⁹A khaan hae, a tung hae te tee takawnaw akhaan hae tuh ccangpaw hae te adi-ale phe lokuh; te tuh-e sakoih po voilu lan thuasah, tee takawnaw akhaan kya thuasah thanlan-aw hae a um; tuh-e tuh dong sung pangaw sae zah dong kuin lae pangaw ako.

³⁰Dong kuin lae pangaw sae zah dong pangaw akopaw tee takawnaw akhaan hae tuh po voilu lan a um hae.

³¹Tee takawnaw akhaan tuh atolang e voidu kalan hawi zah, a tung hae vawlan khe ungcci ku zuh asoikuh, te nawkui tuh thyh tarya acih.

³²Te nithua lang umpaw alungkhu lang e voidu kalan khe yn cciakhae, sakoih kha tou zah ccangpaw hae te adi-ale phe lokuh.

³³A khaan hae, a tung hae te tee takawnaw akhaan hae tuh ccangpaw hae te adi-ale phe lokuh; te tuh-e sakoih po voilu lan thuasah, tee takawnaw akhaan kya thuasah thanlan-aw hae a um; tuh-e tuh dong sung pangaw sae zah dong kuin lae pangaw ako.

³⁴Tee takawnaw akhaan tuh atolang e voidu kalan hawi zah, voikheit voikheit langte a tung hae vawlan khe ungcci ku zuh asoikuh, te nawkui tuh thyh tarya acih.

³⁵Te thahlang e sakoih kalan khe yn cciakhae, te tuh-e sakoih tuh tou zah ccangpaw hae te adi-ale phe lokuh.

³⁶A khaan hae, a tung hae te tee takawnaw akhaan hae tuh ccangpaw hae te adi-ale phe lokuh zah, po voilu lan thanlan-aw hae a um; tuh-e tuh dong sung pangaw sae zah dong kuin lae pangaw ako.

³⁷Tee takawnaw akhaan tuh atolang e voidu kalan hawi zah, voikheit voikheit langte a tung hae vawlan khe ungcci ku zuh asoikuh, te nawkui tuh thyh tarya acih.

³⁸Sakoih tee takawnaw akhaan kyakhe akhaan khaan kheit um zah, tuin kyakhe maee-ute silawnawpaw kha a sing hae.

³⁹Te sakoih tee takawnaw akhaan voikheit voikheit langkhe ccaboi ccangning um zah, tuh-e hae vawlan khe maee-ute silawnawpaw, seithyaanaw silawnawpaw te cyiseinaw silawnawpaw kha chia athua hae.

⁴⁰Thahlang sakoih teenaw kya umpaw tee takawnaw akhaan atolang khe ccaboi ccangning a um; sakoih tee takawnaw akhaan voikheit lang raw khe ccaboi ccangning a um.

⁴¹Sakoih atolang te ccaboi ccangpali, alungkhu langte ccaboi ccangpali, abalyn ccangtarya um zah, tuh-e hae vawlan khe silawnawpaw hae kha chia athua.

⁴²Maee-ute silawnaw lanpaw a-awkuhpaw lungphe ccaboi ccangpali a um, tuh-e hae tuh asaepaw dong kheit lae angankuh, akopaw dong kheit lae angankuh, ahangpaw dong kheit acih hae, tuh-e hae vawlan khe maee-ute silawnaw te silawnaw hanlan mangpaw uccaw hae kha a nung hae.

⁴³Ccaboi rae vawlan khe zapae akopaw khate po voilu lan a heede hae. Te tuh-e ccaboi hae vawlan khe silawnawpaw saw kha a nung hae.

⁴⁴Alungkhu lang e sakoih atolang kya alungkhu lang e voidu kyakhe hlawsahthya hae paw elang akhaan hae a um, khaan kheit tuh thahlang e sakoih pe khe um zah alia lang a hawi, khaan kheit tuh nithua lang e sakoih pe khe um zah thahlang a hawi.

⁴⁵“Alia lang a hawipaw hynh-e akhaan tuh beikinn kya ryalahpaw ranpibawi elang thua zah,

⁴⁶thahlang a hawipaw akhaan tuh silawhang kya ryalahpaw ranpibawi elang nynh thua; e ranpibawi hae tuh BAWIPAW kha ryalawpya khylan a kalan a naekuh cih hae paw Levi phin kya-e Zadok ciihan hae kyalya kha nynh athua hae,” cite yn hopya.

⁴⁷Aning nynh voidu kha tou zah, asaepaw dong za kheit, akopaw dong za kheit, asaepaw te akopaw phe lokuh; silawhang tuh beikinn malang khe a um.

⁴⁸Te beikinn tee takawnaw akhaan kalan khe yn cciakhae, tee takawnaw akhaan kya-e tung hae kha tou zah, dong pangaw cci athaaw; thuakaw tuh dong haw lae pali ko zah, thuakaw voikheit lang tuh dong thum cci athaaw.

⁴⁹Tee takawnaw akhaan tuh dong kuin sae zah, dong haw lae ning ako; nawkui kaenaw tuh thyh haw acih; thuakaw tung hae pe khe voikheit voikheit langte tung hae a um.