Read Zotung Chin EZEKIEL 41 Bible Online

EZEKIEL 41 - Zotung Chin bible

EZEKIEL 41

¹Te inn khaanpi lungkhu lang yn teekhae zah, tung hae kha a tou hae; tung voikheit lang tuh dong taruh cci athaaw.

²Teenaw tuh dong haw ako; voikheit lang te voikheit lang a umpaw teenaw tuh dong pangaw cci ako. Hminthyaa tuh tou zah asaepaw dong sung pali, akopaw dong kuin acih.

³Te akhaan lungkhu lang a tee, teenaw kya-e tung hae kha tou zah dong ning cci acih; teenaw tuh dong taruh ako; teenaw voikheit lang te voikheit lang umpaw pang hae tuh dong sari cci acih hae.

⁴Hminthyaa athangnaw umpaw akhaan tuh tou zah, asaepaw dong kuin, akopaw dong kuin acih. E hynh hmin thyaa huaccepaw, cite yn hopya.

⁵Te beikinn pang kha tou zah dong taruh athaaw; beikinn po voilu lan umpaw akhaan hae tuh dong pali cci ako hae.

⁶Tuh-e akhaan hae tuh khaan kheit vawlan khaan kheit cite khang thum lante um hae zah, khang kheit cci kya akhaan taraw sung thum cci a um. Beikinn po voilu lan umpaw pang hae kyakhe akhaan hae kha dounawpaw hae a um, tetuh tuh-e akhaan taraw hae tuh beikinn pang nynh dou ho vae khyh.

⁷Beikinn po voilu lan umpaw akhaan hae tuh khang kheitnaw kyate khang ningnaw kalan, khang ningnaw kyate khang thumnaw kalan a kaeku thyhte, beikinn po voilu lan umpaw akhaan hae tuh houhouh ako hae. Alia khang kyate palung khang lang kha angaelung e laanpi kyate kae athua.

⁸Beikinn po voilu lan kaenawpaw kha mah ka muih; akin lang e akhaan hae athonaw aleihpaw tuh dong taruh asaepaw ccungngue ccangkheit cih ako hae.

⁹Akin lang umpaw akhaan hae atolang e pang tuh dong pangaw athaaw; beikinn akin lang umpaw akhaan hae te

¹⁰voidu kya-e akhaan hae laku e accawnghannaw hmin tuh beikinn po voilu lan, teitei langte balyn dong kuin ako.

¹¹Akin lang e akhaan hae tuh accawnghanpaw hmin kalan khe hungkuh hae zah, thuakaw ccangkheit tuh thahlang khe hawi zah ccangpaw thuakaw ccangkheit tuh alia langkhe a hawi; te accawnghanpaw hmin tuh po voilu lan dong pangaw ako.

¹²Beikinn voidu kalan hawite niccaw langsang a umpaw inn tuh dong sung sari ako; tuh-e inn pang tuh po voilu lan dong pangaw thaaw zah, dong sung takua asae.

¹³Te beikinn kha tou zah dong za kheit asae; voidu te koihnawpaw a umbia lante inn tuh dong za kheit acih;

¹⁴beikinn malang nithua lang te voidu tuh dong za kheit acih.

¹⁵Niccaw lang e voidu kalan a hawipaw inn, voikheit voikheit lang umpaw zekaw taraw hae ryte dong za kheit acih. Beikinn lungkhu e hminthyaa, alungkhu lang e akhaan te atolang e tee takawnaw akhaan tuh thingphe te a ccaan hae,

¹⁶te tuh-e akhaan ccangthum kya po voilu lan a umpaw abypaw thanlan-aw hae kha thing te po voilu lan a raede hae. Laekhu kyate thanlan-aw kyacia (thanlan-aw hae kha phe bong lante),

¹⁷thuakaw aluki cia, alungkhu lang e akhaan te atolang cia beikinn kha thing te po voilu lan a ccaan hae. Te alungkhu lang umpaw akhaan te hminthyaa kya-e pang vawlan balyn khe azuh kha a soi hae.

¹⁸Tuh-e azuh tuh cherubim zuh te ungcci ku hae zuh thua zah, cherubim ccangning laku khe ungcci ku kukheit cci kha po a soi hae. Cherub ccangkheit nynh mitmae ccangning cci a hoi hae:

¹⁹ccungccaw mae tuh ungcci ku kalan khe hawi zah, chindeih mae tuh ccangpaw ungcci ku kalan khe a hawi. Tuhcite beikinn balyn tuh po voilu lan azuh karynte a soi hae;

²⁰laekhu kyate thuakaw luki cia beikinn pang kyakhe cherubim zuh te ungcci ku zuh kha karynte a soi hae.

²¹Hminthyaa thuakaw tung hae tuh asaepaw te akopaw phe lokuh hae. Hmin thyaapaw malang khe thing te raepaw silawhang alopaw a um,

²²tuh-e tuh dong thum ahang, dong ning sae zah dong ning ako; apaki, a ccusy te a pang hae tuh thingphe te araekuhpaw nynh thua. “E hynh BAWIPAW malang a umpaw ccaboi nynh thua,” cite yn hopya.

²³Hminthyaa te hmin thyaa huapaw kya tuh thuakaw ccangning cci a um.

²⁴Thuakaw hae tuh thuakawphe phe ning cci um zah, thuakaw ccangkheit hanlan kangzae ccangning cci a um.

²⁵Beikinn pang kya azuh kha karynte a soi hae hawte, hminthyaa thuakaw hae kyakhe cherubim zuh te ungcci ku azuh hae kha karynte a soi hae; atolang umpaw tee takawnaw akhaan malang khe thing te raepaw dawkupaw a um.

²⁶Tee takawnaw khaan pang kyakhe voikheit voikheit langte abypaw thanlan-aw te ungcci ku azuh hae a um.