Read Zotung Chin EZEKIEL 42 Bible Online

EZEKIEL 42 - Zotung Chin bible

EZEKIEL 42

¹Te thahlang umpaw atolang e voidu kalan yn cciakhae zah, beikinn voidu te hawiliakuh zah, thahlang e inn te arawsekuhpaw akhaan hae kalan yn cciakhae.

²Tuh-e Thahlang umpaw inn tuh dong za kheit sae zah dong sung pangaw ako.

³Alungkhu lang voidu kya-e ahmin dong kuin lungkhu khe atolang voidu kya-e lung phaekuhpaw te ahawiliakuh lante innkhaan khaan thum a um.

⁴Tuh-e akhaan hae malang khe alungkhu langte laanpi ccangkheit um zah dong haw ako, dong za kheit sae zah thuakaw hae tuh thahlang khe a um hae.

⁵E inn kya-e palung khaan hae tuh alia khaan te angaelung khaan laeze adihhua hae, pawccecize tuh-e khaan hae tuh nulang asungkuh hua hae.

⁶Pawccecize tuh-e akhaan hae tuh khang thum lante um hae zah, atolang e voidu tung hae hawte tung hoi khyh hae; tukeiccuze palung khaan hae tuh alia khaan te angaelung khaan laeze adihhua.

⁷Tuh-e akhaan hae atolang voikheit voikheit langkhe, atolang e voidu kalan ahawipaw pang tuh dong sung pangaw asae.

⁸Atolang e voidu kya-e akhaan hae tuh dong sung pangaw asae hae, beikinn te a hawiliakuh hae paw akhaan hae tuh dong za kheit asae hae.

⁹E akhaan hae ccusy khe atolang e voidu kyate teethya nawlan, nithua langte teenawpaw laanpi ccangkheit a um.

¹⁰Tuh-e laanpi akopaw tuh voidu pang te phe ccawkuh. Alia lang mah, accawnghannaw hmin te ahawiliakuh lante, inn te ahawiliakuh lante akhaan hae um zah,

¹¹tuh-e akhaan hae malang khe laanpi ccangkheit a um; tuh-e hae tuh thahlang e akhaan hae te phe lokuh hae, asaepaw te akopaw mah alokuh hae, teenaw, pounaw, accinccang te thuakaw hae mah phe lokuh hae.

¹²Tukeiccuze alia lang umpaw akhaan hae lungkhu langkhe, nithua langte, laanpi athangnaw khe teenaw a um.

¹³Te aning nynh yn hopah zah, accawnghanpaw hmin kalan ahawipaw thahlang e akhaan hae te alia lang e akhaan hae tuh athyaapaw khaan thua hae zah, tuin kyakhe BAWIPAW kalan a naekuhpaw ranpibawi hae nynh athyaa huaccepaw silawnawpaw hae kha a ae cih; tuh-e hmin tuh athyaa keiccuze athyaa huaccepaw silawnawpaw hae—ccathae silawnaw, seithyaanaw silawnaw te cyiseinaw silawnaw kha tuin kya a nung cih hae, pawccecize tuh-e hmin tuh athyaapaw nynh thua.

¹⁴Ranpibawi hae nynh hmin thyaa lungkhu lang he a tee vae hae ze, tuin kya rya a lawnaw hae paw boeining hae kha khahku leite, tuin kyate atolang e voidu kalan pou lan khyh hae, pawccecize tuh-e boeining hae tuh athyaapaw nynh thua hae; atolang e ccungccaw hae kalan a pou maw hae khe, ccangpaw boeining khate a liakuh cih hae.

¹⁵Aning nynh beikinn hmin alungkhu lang kha he a tou koute nithua lang a hawipaw koikua kyate kae kha yn poukhae zah, beikinn hmin kha po voilu lan a tou.

¹⁶Tounawpaw phaeku khate nithua langsang kha tou zah, tounawpaw phaeku thyhte dong za pangaw acih.

¹⁷Te aning nynh maekute thahlang sang kha tou zah tounawpaw phaeku te dong za pangaw acih.

¹⁸Te aning nynh maekute alia langsang kha tou zah, tounawpaw phaeku te dong za pangaw acih.

¹⁹Te aning nynh maekute niccaw langsang kha tou zah, tounawpaw phaeku te dong za pangaw acih.

²⁰Aning nynh san pali mawte a tou. Dong za pangaw sae zah dong za pangaw akopaw pang tuh po voilu lan thungkuh zah, tuh-e tuh athyaapaw hmin te huatawpaw hmin kha phiathya nawlan nynh thua.