Read Zotung Chin EZEKIEL 43 Bible Online

EZEKIEL 43 - Zotung Chin bible

EZEKIEL 43

¹Te nithua lang a hawipaw koikua kalan khe kae kha yn cciakhae.

²Israel Pachia phu-enaw tuh nithua langte yn cceih zah, a roi tuh tui alepaw roi te nynh aloku; laephi tuh a phu-enaw khate phaephae a ak.

³Ka muihpaw vizin tuh aning nynh khuapi kha ro khylan yn ccia lyaze ka muihpaw vizin te nynh aloku; Kebar vawkhu kin ka muihpaw vizin te lokuh zah, ka mae kha ka tebung.

⁴BAWIPAW phu-enaw tuh nithua lang hawipaw koikua kyate beikinn lang a tee lyakhe,

⁵muisaw nynh kae kha yn hangthung zah, alungkhu lang e voidu lungkhu lang yn cciakhae; BAWIPAW phu-enaw tuh beikinn kya phe abeih.

⁶Ccungccapaw tuh ka pe a thadyn lyakhe lukhakheit nynh beikinn kyate bya yn hopyapaw kha ka thae.

⁷Aning nynh kae kha: Ccungccapaw, e hmin tuh ka bawitungkhung a umnaw hmin, ka ccu ka synaw hmin, Israel ccungccaw hae kya zungzae ka um cihnaw hmin nynh thua. Israel hae te mih siapharan hae nynh mih ohhuakunaw khate thuasah, a chi hae ze mih siapharan hae rhua khate thuasah athyaapaw ka min kha thusah vae lan khyh hae.

⁸Mih thuakaw kha ka thuakaw pe nungte mih thuakaw tung kha ka thuakaw tung pe bing hae zah, kae te minmin laku kya pang ccangkheit kyalya he a um tuh, a cyisei hae paw mih nungsikunaw khate ka min thyaapaw kha a thusah hae; tukeiccuze ka thinria zah ka ro hae.

⁹Atu tuh, mih zohtuh beiknaw kha vua hae sah lah, mih siapharan hae rhua kha kae te asawkunaw langkhe vua hae sah, te kae tuh minmin laku kya zungzae ka um cih.

¹⁰Ccungccapaw, Israel hae kha beikinn muihsah hae lah, beikinn pungsan kha tou hae sah; te mih hoyleinaw keiccu mih maethah sah.

¹¹A cyi hae paw balyn keiccuze mih mae he thah te, beikinn pungsan te beikinn uccaw hae, teenaw te pounaw thuakaw hae, beikinn accinccang balyn, a phungzae balyn te beikinn saknaw paccynnaw miakaw te aphunglang balyn kha na nysah cih hae; beikinn saknaw paccynnaw te a phungzae balyn kha minmin nynh muihthyate a zuithya nawlan hae, mih muihnaw khe na zeipah cih hae.

¹²E hynh beikinn phunglang nynh thua: Beikinn umnaw mua dung balyn tuh po voilu lan athyaa huaccepaw athua cih. E hynh beikinn phunglang nynh thua.

¹³E hae hynh silawhang adi-ale kha dong te toupaw nynh thua (e dong tuh dong kheit zapae acih): Silawhang accusy tuh dong kheit hang zah dong kheit ako, po voilu lan arae tuh khaw kheit ako. E hynh silawhang ahangpaw nynh thua.

¹⁴Silawhang tuh laekhu umpaw accusy kyate ane huanaw adung tuh dong ning sawkuh zah dong kheit ako; adih huapaw adung te ale huapaw adung tuh dong pali sawkuh zah dong kheit ako;

¹⁵silawhang tuh dong pali ahang; silawhang ahangnaw kyate aki ki pali tuh asaethung.

¹⁶Silawhang tuh asaepaw te akopaw alokuh cih, dong haw lae ning asae cih zah dong haw lae ning ako cih, po voilu lan arae tuh khaw ning ako cih.

¹⁷Adung tuh asaepaw te akopaw alokuh cih, dong haw lae pali asae cih zah, dong haw lae pali ako cih, po voilu lan arae tuh khaw ning ako cih, silawhang po voilu lan accusy tuh dong kheit acih cih. Silawhang kya-e kaenawpaw tuh nithua lang a hawi cih.

¹⁸Te aning nynh kae kha yn hopah zah: Ccungccapaw, Bawipaw PACHIA nynh hynhte a ho: E hae hynh silawhang hanlan phungzae hae nynh thua: Maee-ute silawnawpaw kha a vawlan pyanaw hanlan te sachii kha hei khylan silawhang kha he na rae nin khe,

¹⁹ka rya kha lawpya khylan ka kalan a naekuh hae paw Levi phin ranpibawi Zadok ciihan hae kalan khe seithyaanaw silawnaw hanlan tangnuapaw taraw kha na pya cih hae, cite Bawipaw PACHIA nynh a ci.

²⁰Te sachii abang kha na lah cih zah, silawhang a ki kipali, adung lang e apaki ccangpali te po voilu lan arae kha na noi cih; tuhcite silawhang kha na thyaasah cih zah seishawnaw na raepah cih.

²¹Seithyaanaw silawnaw lanpaw tangnuapaw kha na lah cih zah hmin thyaapaw atolang, beikinn voidu lungkhu nungpyapaw hmin kyakhe maee te u athua cih.

²²Nin ningnaw khe douccahpaw miaatepaw khate seithyaanaw silawnaw hanlan si na law cih; silawhang kha tangnuapaw te thyaasah athua hawte silawhang kha miaatepaw chii te na thyaasah cih.

²³Silawhang kha he na thyaasah koute, douccahpaw tangnuapaw taraw te sahiin phu kya-e douccahpaw tuutepaw khate si na law cih.

²⁴Khah-e hae kha BAWIPAW malang na pya cih, te ranpibawi hae nynh khah-e hae kha loi a phing cih hae zah, maee-ute silawnaw lante BAWIPAW kalan a pya cih hae.

²⁵Nin sari lungkhu nin takyhte seithyaanaw silawnaw hanlan miaatepaw sa kheit kha na pya cih, sahiin phu kya-e douccah hae paw tangnuapaw taraw sa kheit te tuutepaw sa kheit kha mah na pya cih.

²⁶Nin sari lungkhu silawhang hanlan seishawnaw a raepah cih hae zah a thyaasah cih hae, tuhcite silawhang kha thyaasah oh.

²⁷Tuh-e nin hae tuh he alia te, nin taryanaw te vae tuh ranpibawi hae nynh silawhang vawlan khe nae kya-e maee-ute silawnaw te ccawkunaw silawnaw hae kha a rae cih hae; te nanning kha kae ccou cih oh, cite Bawipaw PACHIA nynh a ci.