Read Zotung Chin EZEKIEL 44 Bible Online

EZEKIEL 44 - Zotung Chin bible

EZEKIEL 44

¹Te aning nynh kae kha beikinnthyaa atolang e sakoih, nithua lang a hawipaw kalan khe yn cciakhae; tuh-e sakoih tuh phe khawkuh.

²BAWIPAW nynh kae kha yn hopah zah: E sakoih hynh khaw athua cih zah hung thua lan khyh, e kyate lu kheit nynh sanmah tee lan khyh; pawccecize BAWIPAW , Israel Pachia tuh tuh-e sakoih kyate a tee vae keiccuze khaw athua cih.

³Uktu bawi rou nynh uktu bawi athua keiccuze BAWIPAW malang looh ae khylan tuin kya a haung cih; aning tuh sakoih tee takawnaw akhaan kya-e laanpi kyate a tee cih zah tuin kyamawte a pou cih.

⁴Te thahlang e sakoih kalan cceihpaw laanpi kyate beikinn malang khe aning nynh kae kha yn cciakhae; BAWIPAW beikinn tuh BAWIPAW phu-enaw te phe abiapaw kha ka muih; te ka mae ka tebung.

⁵BAWIPAW nynh kae kha yn hopah zah: Ccungccapaw, hoyte yn do lah, syntawku tua, kae hopah cih paw BAWIPAW beikinn a phungzae balyn te a phunglang balyn konglang kha hoyte ngaetua; beikinn lungkhu lang tee lan ua athua cih hae paw te beikinnthyaa lungkhu lang tee lan ua athua cih lei hae paw balyn kha hoyte syntawku tua.

⁶Rhawtho a mangpaw Israel phin kha hopya tua, BAWIPAW nynh hynhte a ho: Pou Israel hae, nae nungsikunaw balyn kha zaw ccavae sah,

⁷ka looh, atho te achii kha he nae pya vae oh ze, thinlung kya te ngesaw kya vingdungawkuh lei hae paw ramccang hae kha ka beikinnthyaa kya um lan na ua oh zah, ka beikinn kha na thusah oh, nae nungsikunaw balyn khate ka byakinnaw kha na ro oh.

⁸Ka kya-e athyaapaw silawnaw hae kha na zui khyh oh; ka beikinnthyaa kya ramccang hae kha nae hanlan ryalahtu lang na nung oh.

⁹Bawipaw PACHIA nynh hynhte a ho: Israel hae laku um hae paw ramccang hae balyn kyaze thinlung kya te ngesaw kya vingdungawkuh leipaw ramccangpaw nynh ka beikinnthyaa lungkhu lang tee lan khyh.

¹⁰Thuasalama Israel hae nynh he a cceihsei hae te, mih zohtuh hae nulang zuikute ka kyate cceihsei hae zah ka kyate asawkuh hae paw Levi phin hae tuh detahnaw a teing cih hae.

¹¹Minmin nynh beikinn sakoih hae kha do-oihte beikinn kya rya a lah cih hae zah, ka beikinnthyaa kya ryalahtu athua cih hae; maee-ute silawnaw te ccungccaw hae nynh silawnaw hae paw kha a theih cih hae, ccungccaw hae hanlan rya a lawpah cih hae.

¹²Minmin nynh ccungccaw hae hanlan mih zohtuh hae malang khe ryalawpah hae zah, Israel hae kha hoyleinaw lungkhu lang a khuliasaku hae, tukeiccuze minmin tuh detahnaw a teing cih hae, cite Bawipaw PACHIA nynh minmin konglangte bya ka kinku a ci.

¹³Ka rya kha lawpya khylan ranpibawi lante ka kalan naekuh lan khyh hae; athyaa huaccepaw uccaw hae, ka kya-e athyaapaw uccaw hae pe lang naekuh lan khyh hae; maethyanaw a ccou cih hae zah a cyi hae paw nungsikunaw hanlan a teing cih hae.

¹⁴Tuhzemah beikinn do-oih khylan a lungkhu kya ryalaw lanpaw balyn kha law khylan minmin kha ka nung cih hae.

¹⁵Israel ccungccaw hae nynh ka kyate a cciasei lya hae ze, ka beikinnthyaa a do-oih hae paw Levi phin, Zadok ciihan ranpibawi hae nynh ka rya kha lawpya khylan ka kalan a naekuh cih hae; kae kha atho te achii pya khylan ka malang a thadyn cih hae, cite Bawipaw PACHIA nynh a ci.

¹⁶Ka ryalaw khylan te ryalaw ka naw hae paw kha law khylan ka beikinnthyaa lungkhu lang a tee cih hae paw te ka ccaboi kalan a naekuh cih hae paw tuh minmin nynh athua hae.

¹⁷Alungkhu lang e sakoih hae lungkhu lang he a tee hae ze, laphan laaw te kuakuhpaw boeining kha a lawkuh cih hae; alungkhu lang e voidu sakoih hae kya te alungkhu kya rya a law lya hae khe tuuming boeining kha lawkuh lan khyh hae.

¹⁸Mih lu kya laphan laaw te kuakuhpaw pungde kha a khungkuh cih hae zah mih tae kya laphan laaw ccuhoih kha a hoihkuh cih hae; vaesaw a pousah thyapaw boeining kha lawkuh lan khyh hae.

¹⁹Minmin nynh ccungccaw hae a umnaw hae atolang e voidu lungkhu lang he a pou hae te, rya thyaapaw a lawnaw hae paw boeining hae kha a khahkuh cih hae zah, athyaanaw khaan kya a nung cih hae; te ccangpaw boeining kha a lawkuh cih hae, tuhteze nynh athyaapaw kha mih boeining khate ccungccaw hae kalan cciakhaesei lan khyh hae.

²⁰Mih sang kha ngokuh lan khyh hae zah, sae mah saesakuh lan khyh hae; azawnaw te a ngokuh cih hae.

²¹Ranpibawi nynh alungkhu lang e voidu lungkhu lang he a tee ze, misutui kha neih lan khyh.

²²Nomaenung kha thuasah, vawpaw te a mahkuh hae paw nopi kha thuasah zu lang dykuh lan khyh, Israel phin liaccady khyhze ranpibawi nynh a chitawpaw nomaenung kha zu lang a dykuh cih.

²³Minmin nynh ka ccungccaw hae kha athyaapaw te athyaa leipaw laku alaenaw kha a ccangpah cih hae zah, athyaapaw te athyaa leipaw laku phiathyanaw kha a muihsah cih hae.

²⁴Pekumaekunaw a um ze, byapiatu lang a tang cih hae zah, ka phungzae thyhte bya a pae cih hae. Ccyh khyapaw ka poi hae balyn te asekuhpaw ka kawbya hae te ka phunglang hae kha a zui cih hae zah, ka sabbath hae kha thyaararih lan a sung cih hae.

²⁵Michi rhua kalan naekute mimaw toulou kha thusakuh lan khyh hae; tuhzemah nung, paaw, ccapaw, ccanung, u te neitaw, vawpaw a hoi leipaw ccianung hanlan kha tuh a thusakuh kho hae.

²⁶Mithyaapaw lang a tang koute amaw hanlan nin sari a riapah cih hae.

²⁷Hminthyaa lungkhu kya ryalaw khylan alungkhu lang e voidu lungkhu, hminthyaa lungkhu lang a tee nin khe, a seithyaanaw silawnaw kha a rae cih, cite Bawipaw PACHIA nynh a ci.

²⁸E hynh mih rho athua cih: Kae hynh mih rho nynh ka thua; Israel ram kya ccoupaw rho kha minmin na pya lan khyh oh; kae hynh mih ccoupaw rho nynh ka thua.

²⁹Minmin nynh ccathae silawnawpaw, seishawnaw silawnawpaw te cyiseinaw silawnawpaw kha a ae cih hae; Israel ram e athyaapaw uccaw miakaw tuh mih kya-e athua cih.

³⁰Aphuinphuin kya-e thaety hae balyn kya-e masaty huapaw, na hlu oh paw aphuinphuin balyn kya-e ahlu miakaw tuh ranpibawi hae kya-e athua cih; nae inn kya hythuanaw a um nawlan sanlou lang nonpaw vaekhui kya-e masatypaw vaekhui kha mah ranpibawi kalan na pya cih oh.

³¹Amaw chi lan chihpaw khyhze loramsaw nynh a teipaw pavaw thuasah, sarangpaw thuasah ranpibawi hae nynh ae lan khyh hae.