Read Zotung Chin EZEKIEL 45 Bible Online

EZEKIEL 45 - Zotung Chin bible

EZEKIEL 45

¹Ram kha rho lang he na neekuh oh te, athyaapaw loram ramkheit kha BAWIPAW elang na phiapah cih oh, tuh-e loram tuh dong thong kuin lae pangaw asae cih zah, dong thong kuin[6] ako cih; tuh-e loram pynpi tuh athyaapaw loram athua cih.

²E loram lungkhu hin dong za pangaw sae zah dong za pangaw akopaw, asaepaw te akopaw phe lokuhpaw kha beikinnthyaa hanlan athua cih zah, po voilu lan dong sung pangaw accawnghan cih.

³Athyaapaw loram lungkhu khe dong thong kuin lae pangaw sae zah dong thong haw akopaw hmin hminkheit kha na tou cih zah, alungkhu khe beikinnthyaa, hmin thyaa huaccepaw a um cih.

⁴Tuh-e loram tuh ram lungkhu ze athyaapaw loram athua cih zah, BAWIPAW kha ryalawpya khylan amaw kalan naekuh hae zah, beikinnthyaa kya ryalah hae paw ranpibawi hae hanlan athua cih; tuh-e loram tuh ranpibawi hae inn hanlan te beikinnthyaa elang athyaapaw hmin athua cih.

⁵Dong thong kuin lae pangaw sae zah, dong thong haw akopaw ccangpaw hmin kha beikinn kya ryalah hae paw Levi phin hae mih umnaw lanpaw khua athua cih.

⁶Athyaapaw loram te po piakuh lante, dong thong pangaw ko zah dong thong kuin lae pangaw asaepaw hmin kha khuapi hanlan na ia cih oh; tuh-e tuh Israel phin balyn kya-e athua cih.

⁷Athyaapaw loram hanlan te khuapi hanlan ia athuapaw hmin kalansang tuh uktu bawi kya-e athua cih zah, tuh-e ram tuh athyaapaw loram te khuapi hanlan iapaw hmin kalan a hawipaw athua cih, niccaw lang athangnaw ramri cia aphah cih, te nithua langkhe a maeleihkuh cih zah athangnaw ramri cia athua cih.

⁸Tuh-e tuh Israel ram kya aning nynh a hoipaw athua cih. Ka kya-e uktu bawi nynh ka ccungccaw hae kha tuaasah boi vae lan khyh hae; thuasalama Israel phin hae kha mih phin raveih thyhte ram kha na nee cih oh.

⁹Bawipaw PACHIA nynh hynhte a ho: Pou Israel uktu bawi hae, zaw ccavae sah! Puathonaw te tuaasahkunaw kha vua oh lah, adingpaw te akyhpaw kha cyih oh. Ka ccungccaw hae kha dee nan vae oh, cite Bawipaw PACHIA nynh a ci.

¹⁰Ahmepaw zawccu te khinlung, ahmepaw ephah te ahmepaw bath kha na mang cih oh.

¹¹Ephah te bath tuh tounaw kya phe lokuh cih hae, bath ccangkheit tuh homer pumhaw pumkheit athua cih zah, ephah ccangkheit tuh mah homer pumhaw pumkheit athua cih; homer tuh ccungccaw zapi nynh mang huapaw tounawpaw athua cih.

¹²Shekel ccangkheit tuh gerah kuin lae pangaw te alokuh cih. Shekel sung taruh tuh nanning hanlan mina ccangkheit te alokuh cih.

¹³E hynh na rae lan oh paw silawnaw nynh thua: chanvuih thuasah, barli thuasah homer ccangkheit kyaze ephah pum taruh pum kheit,

¹⁴chitui tuh kor kheit kyaze bath pumhaw pumkheit (kor kheit tuh bath ccanghaw nynh thua);

¹⁵te Israel hae a umnaw hae kyate tuu za ning umpaw aphu kyate tuu sa kheit athua cih. E hynh minmin hanlan seingaethyanaw raenaw lanpaw ccathae silawnaw, maee-ute silawnaw te ccawkunaw silawnaw hanlan nynh thua hae, cite Bawipaw PACHIA nynh a ci.

¹⁶E ram kya-e ccungccaw balyn nynh hynh-e silawnawpaw hae hynh Israel uktu bawi kalan a cciakhae cih hae.

¹⁷Uktu bawi ryalaw tuh beiknaw poi hae, sawpaw sah leihpaw, sabbath hae, Israel phin kya-e accyh khyapaw poi hae kyakhe maee-ute silawnaw, ccathae silawnaw te niapaw silawnaw hae kha a rae cih: Israel phin hanlan seingaethyanaw rae khylan seithyaanaw silawnaw, ccathae silawnaw, maee-ute silawnaw te ccawkunaw silawnaw hae kha a rae cih.

¹⁸Bawipaw PACHIA nynh hynhte a ho: Masaty sawpaw, nin kheit nin khe douccahpaw tangnuapaw taraw sa kheit kha na lah cih oh zah beikinnthyaa kha na thyaasah cih oh.

¹⁹Ranpibawi nynh seishawnaw silawnawpaw sachii abang kha a lah cih zah, beikinn thuakaw tung hae, silawhang apaki ki pali te alungkhu lang e voidu sakoih tung hae kha a noi cih.

²⁰Cyiseinaw khyhze sawphahkunaw keiccuze a seipaw miakaw hanlan tuh-e sawpaw nin sari nin khe tuhcih maminte na cyipah cih oh; tuhcite beikinn elang seingaethyanaw kha na rae cih oh.

²¹Masaty sawpaw, nin haw lae pali nin khe kawtaw poi kha na tua cih oh, nin sari lungkhu ransi phing leipaw sanlou kha na ae cih oh.

²²Tuin nin khe uktu bawi nynh amaw te ram lungkhu e ccungccaw balyn elang seithyaanaw silawnaw hanlan tangnuapaw taraw khate si a law cih.

²³Poi nin sari lungkhu nin takyhte BAWIPAW kalan maee-ute silawnaw lante douccahpaw tangnuapaw taraw sa sari te tuutepaw sa sari khate si a law cih; seithyaanaw silawnaw hanlan miaatepaw sa kheit khate nin takyh si a law cih.

²⁴Tangnuapaw sa kheit hanlan ephah ccangkheit, tuutepaw sa kheit hanlan ephah ccangkheit, ephah ccangkheit hanlan chitui hin kheit khate ccathae silawnaw kha aning nynh a rae cih.

²⁵Sawpaw sah sarinaw, nin haw lae pangaw nin kyate poi nin sari lungkhu seithyaanaw silawnaw, maee-ute silawnaw te ccathae silawnaw te chitui silawnaw kha uktu bawi nynh tuhcih maminte a rae cih.