Read Zotung Chin EZEKIEL 46 Bible Online

EZEKIEL 46 - Zotung Chin bible

EZEKIEL 46

¹Bawipaw PACHIA nynh hynhte a ho: Nithua lang a hawipaw alungkhu lang e voidu sakoih tuh ryalaw nin nintaruh lungkhu khaw athua cih; thuasalama sabbath nin te sawpaw sah leihpaw nin kya tuh hung athua cih.

²Uktu bawi tuh atolang te tee takawnaw akhaan thuakaw kyakhate a tee cih zah, thuakaw tung pe khe a thadyn cih. Ranpibawi hae nynh uktu bawi kya-e maee-ute silawnaw te ccawkunaw silawnaw kha a rae cih hae, te aning tuh teenaw sakoih kyakhe a bakhung cih. Te aning tuh a pou cih, thuasalama sakoih tuh zete cia khaw thua lan khyh.

³Ram lungkhu e ccungccaw hae tuh sabbath nin hae te sawpaw sah leihpaw nin hae kyakhe tuh-e teenaw sakoih kya BAWIPAW malang khe a bakhung cih hae.

⁴Uktu bawi nynh sabbath nin kya BAWIPAW kalan a raepaw maee-ute silawnaw tuh douccahpaw tuutaw sa taruh te douccahpaw tuutepaw sa kheit athua cih hae;

⁵te ccathae silawnaw tuh tuutepaw sa kheit te vaekhui ephah ccangkheit, tuutaw ryte a ry zeihte a pya cih, te vaekhui ephah ccangkheit cci kyaze chitui hin kheit a umbia cih.

⁶Sawpaw sah leihpaw nin khe abalynte douccah hae paw tangnuapaw taraw sa kheit, tuutaw sa taruh te tuutepaw sa kheit kha a pya cih;

⁷ccathae silawnaw tuh tangnuapaw te vaekhui ephah ccangkheit, tuutaw ryte a ry zeih a pya cih, te vaekhui ephah ccangkheit cci kyaze chitui hin kheit a umbia cih.

⁸Uktu bawi tuh he a tee vae ze, tee takawnaw akhaan thuakaw kyate a tee cih zah, a pou zemah tuin kyate a pou cih.

⁹Ram lungkhu e ccungccaw hae tuh accyh khyapaw poi kya BAWIPAW malang he a ccia vae hae ze, beik khylan thahlang e sakoih kyate a teepaw miakaw nynh alia lang e sakoih kyate a pou cih; te alia lang e sakoih kyate a teepaw miakaw nynh thahlang e sakoih kyate a pou cih: a teenaw hae sakoih laanpi kyate ki leite malang lawbabin lan cciate a pou cih hae.

¹⁰Minmin a tee hae ze uktu bawi tuh a teebua cih zah, a pou hae ze a poubua cih.

¹¹Beiknaw poi te accyh khyapaw poi kyaze ccathae silawnaw hanlan tangnuapaw taraw sa kheit te vaekhui ephah ccangkheit, tuutepaw sa kheit te vaekhui ephah ccangkheit, tuutaw ryte a pya ry zeihte a pya cih, te vaekhui ephah ccangkheit te chitui hin kheit a umbia cih.

¹²Lungthote silawnaw thuasah, maee-ute silawnaw thuasah, ccawkunaw silawnaw thuasah uktu bawi nynh BAWIPAW kalan lungthote silawnaw kha he a rae vae ze, nithua lang hawipaw sakoih kha hungpya athua cih; amaw kya-e maee-ute silawnaw khyhze ccawkunaw silawnaw kha sabbath nin kya a rae hawte a rae cih. Te a pou cih zah, a pou koute sakoih kha khaw athua cih.

¹³Maee-ute silawnaw hanlan douccahpaw, kum kheit acihpaw tuutaw sa kheit kha nin takyhte awkhua takyh kya BAWIPAW kalan a pya cih.

¹⁴Tuh-e tuutaw ryte ccathae silawnaw hanlan ephah pum taruh pum kheit, vaekhui nonnaw hanlan chitui hin kheit kya-e pum thum pum kheit kha BAWIPAW kalan ccathae silawnaw tuh awkhua takyh a rae cih, e hynh zungzae hanlan phungzae nynh thua.

¹⁵Tuhcite awkhua takyh kya tyty raepaw maee-ute silawnaw tuh tuutaw, ccathae silawnaw te chitui kha pya athua cih.

¹⁶Bawipaw PACHIA nynh hynhte a ho: Uktu bawi nynh a rho kha a ccapaw lukhakheit kalan lasung lang a pya ze, tuh-e tuh a ccapaw kya-e athua vae cih zah, rho lang a muepaw nynh thua vae.

¹⁷Thuasalama a rho kha a ryalahtu lukhakheit kalan lasung lang a pya ze, a lue kum kyacia rou nynh a kya-e lang a tang cih; te tuh-e tuh uktu bawi kalan a kithui cih; a ccaaw hae rou nynh a rho kha a ccou kho hae.

¹⁸Uktu bawi nynh ccungccaw hae rho hankhakheit kha nangsete lawkude lan khyh; amaw a uccaw lungkhu e kha nynh a ccaaw hae kha rho lang a pya cih hae, tuhteze nynh ka ccungccaw hae tuh mih uccaw kha shung lan khyh hae.

¹⁹Te aning nynh kae kha sakoih kalansang umpaw teenaw kyate yn cciakhae zah, thahlang hawipaw, ranpibawi hae kya-e athyaapaw khaan lungkhu langkhe yn teekhae; te tuh-e akhaan hae niccaw lang athangnaw kya umpaw hmin hminkheit kha ka muih.

²⁰Aning nynh kae kha, “E hmin tuh ranpibawi hae nynh cyiseinaw silawnaw te seithyaanaw silawnaw kya mangpaw saw kha a thung cihnaw hae hmin te ccathae silawnaw lang pyapaw kha maee te a rua cihnaw hae hmin nynh thua, ccungccaw hae kha thyaasah khylan tuh-e uccaw hae tuh atolang e voidu kalan na poukhae lan khyh oh,” yn cipya.

²¹Te atolang e voidu kalan yn cciakhae zah, tuh-e voidu apaki ki pali kyakhe yn cciakhae; te tuh-e voidu apaki ccangkheit cci kyakhe voidu adihpaw ccangkheit cci a um,

²²tuh-e voidu adihpaw hae tuh dong sung pali cci sae hae zah, dong sung thum cci ako hae, asaepaw te akopaw phe lokuh hae.

²³Tuh-e apaki ki pali hae alungkhu langte po voilu lan lung te raepaw pang ccarou um zah, tuh-e pang hae ccusy khe po voilu lan takua hae a um.

²⁴Te aning nynh kae kha, “E hmin hae hynh ccungccaw hae kya-e silawnawpaw hae kha beikinn kya ryalahtu hae nynh a thungnaw hae anghyngnaw hmin nynh athua hae,” yn cipya.