Read Zotung Chin EZEKIEL 47 Bible Online

EZEKIEL 47 - Zotung Chin bible

EZEKIEL 47

¹Te aning nynh kae kha beikinn thuakaw kalan khe yn kikhae; tuin kyakhe beikinn thuakaw zakaw kyate tui tuh nithua langkhe alua (pawccecize beikinn tuh nithua langkhe a hawi); beikinn thuakaw alia lang athangnaw akawlan, silawhang alia lang kyate tui tuh aluabung.

²Te thahlang sakoih laanpi kyate kae kha yn poukhae zah, nithua lang hawipaw atolang umpaw sakoih atolang khe yn voilukhae zah yn cciakhae; te alia langsang khe tui tuh pou zah alua.

³Ccungccapaw tuh a kuih kya arui ccyngkute nithua lang cceih zah, dong thong kheit a tou koute kae kha tui tuh po yn kesah, tuh-e tui tuh ka ccumali kyacia akhu.

⁴Dong thong kheit bua tou zah, tui kha bua yn kesah, tuh-e tui tuh ka ccukharu cia akhu. Dong thong kheit bua tou zah, tui kha bua yn kesah; tuh-e tui tuh ka cce kyacia akhu.

⁵Dong thong kheit bua tou zah, khuraw lang ka zua kho leipaw vawpi nynh thua vae, pawccecize tui tuh akhu vae; tuh-e tui tuh zua kho um leipaw vawpi, ohku khinpaw nynh thua vae.

⁶Aning nynh kae kha, “Ccungccapaw, e hynh na muih vae khaw?” yn cipya. Te aning nynh vaw kin dykyhte po yn kikhae.

⁷Ka ki lyakhe vaw kin dykyh kya thingku lepaw patae kha sirawkhuraw po ka muih.

⁸Aning nynh kae kha, “E tui hynh nithua lang lua zah Arabah lang aluabung; te rili kya he apyakuh te, a-yhkuhpaw rili tuh tui thawpaw lang a tang cih.

⁹E tui aluanaw miakaw kyakhe ahiinpaw ahysuepaw miakaw tuh ahiin cih, e tui nynh aluanaw kya tuh ngasaw patae a um cih. Tuh-e tui tuh tui thawpaw lang a tang cih zah, vaw nynh aluanaw kya tuh atyn-are ahiin cih.

¹⁰En-gedi kyate En-eglaim kyacia rili kin khe ccungccaw hae tuh thadynte ngasaw a baw cih hae; tuin kya tuh paih a rawnaw hae hmin athua cih; tuin kya-e ngasaw aphuinphuin tuh Rili Lepaw kya-e ngasaw hae hawte myarya alung cih hae.

¹¹Thuasalama kuatui te tuinoh kya-e tui tuh tui thawpaw lang tang lan khyh; tuhcihmawte loi lang a um cih hae.

¹²Vawpi sirawkhuraw te akin khe thingku phuinccing tuh looh lang apo cih. Tuh-e thing anaw hae tuh naan lan khyh zah athae hae tuh thuh lan khyh, sawpaw sah takyhte thae hoypaw kha athae cih hae, pawccecize tuh-e hae elang beikinnthyaa kyate aluapaw tui nynh thua. Tuh-e thingthae hae tuh looh lang a tang cih hae zah, thingnaw hae tuh dannaw lang a tang cih hae,” yn cipya.

¹³Bawipaw PACHIA nynh hynhte a ho: E hynh Israel phin phinhaw lae ning nynh ram kha rho lang na neeku nawlan oh paw ramri hae nynh thua. Josef nynh loram ram ning a ccou cih.

¹⁴Ram hynh phe ngankuh lante na neekuh cih oh; e ram hynh nae minpaaw hae kha pya lan bya ka kinpyaku vae hae, te e ram hynh nae rho lang a tang cih.

¹⁵E hynh ram a ramri athua cih: Thahlang tuh Rili Lepaw kyate Hethlon laanpi pe, Lebo-hamath te Zedah kyacia,

¹⁶Berothah, Sibraim (e hynh Damaskas ramri te Hamath ramri laku a umpaw nynh thua), Hauran ramri pe umpaw Hazer-hattikon kyacia athua cih.

¹⁷Tukeiccuze ramri tuh rili kyate Damaskas ramri thahlang umpaw Hazar-enon, te thahlang tuh Hamath ramri cia athua cih. E hynh thahlang sang nynh thua.

¹⁸Nithua lang ramri tuh, Hauran te Damaskas laku athua cih; Gilead te Israel loram laku Jordan vaw thyhte athua cih; nithua lang e rili te Tamar kyacia athua cih. E hynh nithua langsang ramri athua cih.

¹⁹Alia lang ramri tuh, Tamar kyate Meribath-kadesh tui kyacia athua cih, tuin kyate Izip Accya dykyh thyhte Rili Lepaw kyacia athua cih. E hynh alia langsang ramri athua cih.

²⁰Niccaw lang ramri tuh, Rili Lepaw athua cih zah, Lebo-hamath te arawsekunaw cia athua cih. E hynh niccaw langsang ramri athua cih.

²¹Tuhcite e ram hynh Israel phin hae nynh ccarou na neekuh cih oh.

²²E ram hynh naemaw te nae kya umbua hae zah ccaaw a saah vae hae paw ramccang hae kha rho lang na neekuh cih oh. Minmin tuh Israel ramccungccaw hawte athua cih hae; minmin tuh Israel minphuin hae kya rho kha neebua athua cih hae.

²³Ramccang hae tuh a umbuanaw hae phin miakaw kya mih rho kha na neebua cih oh, cite Bawipaw PACHIA nynh a ci.