Read Zotung Chin EZEKIEL 48 Bible Online

EZEKIEL 48 - Zotung Chin bible

EZEKIEL 48

¹E hae hynh Israel phin hae min nynh thua: Thahlang ramri tuh Hethlon laanpi, Lebo-hamath kyate Hazar-enon kyacia (tuh-e tuh Damaskas ramri, thahlang Hamath kyacia), nithua langte niccaw lang cia tuh Dan loram athua cih.

²Dan ramri te kyngkuh zah, nithua langte niccaw lang cia, Asher loram athua cih.

³Asher ramri te kyngkuh zah, nithua langte niccaw lang cia, Naftali loram athua cih.

⁴Naftali ramri te kyngkuh zah, nithua langte niccaw lang cia, Manasseh loram athua cih.

⁵Manasseh ramri te kyngkuh zah, nithua langte niccaw lang cia, Efraim loram athua cih.

⁶Efraim ramri te kyngkuh zah, nithua langte niccaw lang cia, Reuben loram athua cih.

⁷Reuben ramri te kyngkuh zah nithua langte niccaw lang cia, Judah loram athua cih.

⁸Judah ramri te kyngkuh zah nithua langte niccaw lang cia, taekhiate na nung oh paw loram athua cih, tuh-e loram akopaw tuh dong thong kuin lae pangaw athua cih zah, asaepaw tuh nithua langte niccaw lang cia, Israel phin hae kya-e loram hae te alokuh cih, tuh-e loram angaelung khe beikinnthyaa a um cih.

⁹BAWIPAW elang taekhiate na nung cih oh paw loram tuh dong thong kuin lae pangaw asae cih zah dong thong kuin ako cih.

¹⁰E hae hynh athyaapaw loram lante neekupaw athua cih zah: ranpibawi hae hanlan tuh thahlang khe dong thong kuin lae pangaw, niccaw langkhe dong thong haw ako cih, nithua langkhe dong thong haw ako cih zah alia langkhe dong thong kuin lae pangaw asae cih, tuh-e loram angaelung khe BAWIPAW beikinnthyaa a um cih.

¹¹E athyaapaw loram hynh Israel hae nynh a cciasei lya hae ze, Levi phin hae nynh cciasei leite ka rya a lah hae paw Zadok ciihan, thyaasah athua hae paw ranpibawi hae hanlan athua cih.

¹²Tuh-e loram tuh loram kyaze hmin thyaa huaccepaw thua zah, Zadok ciihan hae hanlan taekhiate a nung hae paw loram athua cih zah, Levi phin hae ramri te akyngkuh cih.

¹³Ranpibawi hae kya-e loram te akyngkuhpaw Levi phin hae loram tuh dong thong kuin lae pangaw sae zah dong thong haw ako cih. Asaepaw abalynte dong thong kuin lae pangaw athua cih zah, dong thong kuin ako cih.

¹⁴Tuh-e laephi tuh zua lan khyh hae, hankhakheit te mah rulae lan khyh hae; ram kyaze ahoy huaccepaw e laephi tuh lukhakheit min lante paleih lan khyh hae, pawccecize BAWIPAW elang athyaapaw loram nynh thua.

¹⁵A laehypaw loram, dong thong pangaw ko zah dong thong kuin lae pangaw asaepaw tuh khuapi hanlan mang lanpaw huatawpaw laephi athua cih zah, zapi umnaw hanlan te khuapi rae nawlan athua cih. Tuh-e loram angaelung khe khuapi a um cih;

¹⁶khuapi ako-aby tuh: thahlang tuh dong thong pali za pangaw, alia lang tuh dong thong pali za pangaw, nithua lang tuh dong thong pali za pangaw, niccaw lang tuh dong thong pali za pangaw athua cih.

¹⁷Khuapi tuh zapi hanlan laephi a hoi cih zah: thahlang tuh dong za ning sung pangaw, alia lang tuh dong za ning sung pangaw, nithua lang tuh dong za ning sung pangaw, niccaw lang tuh dong za ning sung pangaw athua cih.

¹⁸Athyaapaw laephi te akyngkuh lante po saepaw laephi tuh nithua lang dong thong haw, niccaw lang dong thong haw athua cih zah, athyaapaw laephi te po akyngkuh cih. Tuin kyate apoupaw ccathae tuh khuapi kya-e ryalahtu hae elang looh athua cih.

¹⁹Khuapi kya-e ryalahtu hae, Israel phin hae balyn nynh tuh-e laephi kya looh a ccou cih hae.

²⁰Akopaw te asaepaw phe lokuh lante dong thong kuin lae pangaw acihpaw, taekhiate na nung cih paw laephi balyn tuh khuapi laephi ryte athyaapaw laephi athua cih hae.

²¹Athyaapaw laephi kalansang te alaepaw laephi te khuapi laephi kalansang te alaepaw laephi tuh uktu bawi laephi athua cih. Athyaapaw laephi kyate nithua lang ramri kyacia dong thong kuin lae pangaw, niccaw lang tuh niccaw lang ramri kyacia dong thong kuin lae pangaw, Israel phin hae kya-e laephi hae te ngingrarih lan a umpaw laephi tuh uktu bawi laephi athua cih. Athyaapaw laephi tuh angaelung umpaw beikinn kya-e beikinnthyaa ryte,

²²te Levi phin hae laephi te khuapi kya-e laephi tuh uktu bawi kya-e laephi angaelung khe a um cih. Uktu bawi laephi tuh Judah ram te Benjamin ram laku khe a um cih.

²³Tuhlaepaw Israel phin hae tuh: nithua langte niccaw lang cia Benjamin loram athua cih.

²⁴Benjamin ramri te kyngkuh zah, nithua langte niccaw lang cia, Simeon loram athua cih.

²⁵Simeon ramri te kyngkuh zah, nithua langte niccaw lang cia, Issakhar loram athua cih.

²⁶Issakhar ramri te kyngkuh zah, nithua langte niccaw lang cia Zebulun loram athua cih.

²⁷Zebulun ramri te kyngkuh zah, nithua langte niccaw lang cia Gad loram athua cih.

²⁸Gad loram alia lang ramri tuh Tamar kyate Meribath-kadesh tui kyacia, tuin kyate Izip Accya dykyh thyhte Rili Lepaw kyacia phe a thua.

²⁹E ram tuh Israel phin hae kha rho lang na nee lan hae paw ram thua zah, e hae hynh mih loram nynh thua hae, cite Bawipaw PACHIA nynh a ci.

³⁰E hae tuh khuapi kya-e pounaw nynh thua hae: Thahlang sang tuh dong thong pali za pangaw ko zah,

³¹Reuben koikua, Judah koikua te Levi koikua cite koikua ccangthum a um cih, Israel phin hae min thyhte khuapi koikua hae min kha bing athua.

³²Nithua langsang tuh dong thong pali za pangaw ko zah, Josef koikua, Benjamin koikua te Dan koikua cite koikua ccangthum a um cih.

³³Alia langsang tuh dong thong pali za pangaw ko zah, Simeon koikua, Issakhar koikua te Zebulun koikua cite koikua ccangthum a um cih.

³⁴Niccaw langsang tuh dong thong pali za pangaw ko zah, Gad koikua, Asher koikua te Naftali koikua cite koikua ccangthum a um cih.

³⁵Khuapi tuh po voilu lante dong thong haw lae tarya acih cih. Tuh-e ccyh kyate khuapi min tuh Tuin kya BAWIPAW a um, ci athua vae cih.