Read Zotung Chin EZEKIEL 5 Bible Online

EZEKIEL 5 - Zotung Chin bible

EZEKIEL 5

¹Pou ccungccapaw, thaloi hepaw kha lawku tua; sang ngotu kya-e sangteih hawte mang lah, na sang te na khawming kha ngoku tua; te khin nawlan zawccu kha lawkuh lah, na sang kha pum thum lang phia lah nungtua.

²Khuapi koihlu ccyh he accing te, na sang pum thum pum kheit kha khuapi lungkhu khe maee te na u cih; pum thum pum kheit kha na lah cih zah khuapi lungkhu phe lekuh lan thaloi te na aw cih; pum thum pum kheit kha khivae kya na vua cih zah, kae nynh mah tuh-e sang nulang khe thaloi te ka zui cih.

³Te tuh-e sang kya-e beihtaraw kha na lah cih zah na angkiccua adung khe na tungde cih.

⁴Tuh-e sang kya-e abang kha bua na lah cih zah, maee kya phungte na u cih; tuin kyate maee nynh Israel phin balyn kha a pounua cih hae.

⁵Bawipaw PACHIA nynh hynhte a ho: E hynh Jerusalem nynh thua; minphuin hae ngaelung khe ka nung cih zah, ram hae nynh po a koihlu cih hae.

⁶Aning tuh minphuin ccangpaw hae te a pepan po koihlu hae paw ram hae laeze hoyleinaw a rae huapaw lang tang zah, ka phungzae te ka phungbya hae kha a dou, ka phungzae hae kha vua zah ka phungbya hae kha zui khyh.

⁷Tukeiccuze Bawipaw PACHIA nynh hynhte a ho: Nae pepan po ae koihlu oh paw minphuin hae laeze vawsawnaw na thuakhaehua oh zah, ka phungbya hae kha zui leite ka phungzae hae kha mah na kyngkuh khyh oh, thuasalama nae pepan po ae koihlu oh paw minphuin hae kya-e phungzae hae kha na zui oh;

⁸tukeiccuze Bawipaw PACHIA nynh hynhte a ho: Kamaw ccaccei nynh kae ccianua cih oh; minphuin hae nynh a muihnaw hae khe, nae kya byapianaw ka rae cih.

⁹Nae nungsikunaw balyn keiccuze papin ka rae boi leipaw te bua ka rae vae cih leipaw byapianaw kha nae tungvaw ka rae cih.

¹⁰Thanccingte, pou Jerusalem, nang na ngaelung khe nungpaaw hae nynh mih ccaaw hae kha a ae cih hae zah, ccaaw hae nynh nungpaaw hae kha a ae cih hae; na tungvaw byapianaw ka rae cih zah, na kya ahiinhypaw miakaw kha teitei lang balyn phiariphiarae pong ka nung cih hae.

¹¹Tukeiccuze Bawipaw PACHIA nynh a hopaw tuh, kae tuh ka hiin thyhte, thanccingte, athupaw na uccaw balyn te thuasah, na nungsikunaw balyn te thuasah ka beikinnthyaa kha na thusah vae keiccuze kae theih cih; nang kha kae haang lan khyh zah ngaethya kae umsah lan khyh.

¹²Na ccungccaw hae pum thum pum kheit tuh shethya khate a chih cih hae, tuhkhyhze na ngaelung kyakhe ccakanccinaw khate maemih athua cih hae; pum thum pum kheit tuh na pepan khe thaloi te a chih cih hae; pum thum pum kheit kha teitei lang balyn pong ka phiasakuh cih hae zah, mih nulang te thaloi khate ka zui cih hae.

¹³Tetuh ka thinrianaw tuh accing cih, ka bungpawnaw kha mih tungvaw ka langsakuh cih zah, ka lungrya achih cih; mih tungvaw ka thinrianaw he accing te, kae, BAWIPAW nynh tuathyanaw te nynh ka ho cipaw kha a nyh cih hae.

¹⁴Tuhpiaze na pepan umpaw minphuin ccangpaw hae laku thuasah, na pe po cceih hae paw balyn muihnaw kya thuasah nang kha ccungccaw adaenaw te saryapaw uccaw lang kae rae cih.

¹⁵Thinria bungpaw te thuasah, myarya ccihpaw detahnaw te thuasah na tungvaw khe byapianaw he ka rae te, nang tuh na pepan umpaw minphuin ccangpaw hae kyakhe saryapaw te nuinsepaw, raeringnaw pyanawpaw te ri lan umpaw lang na tang cih. E bya hynh kae, BAWIPAW nynh ka ho vae.

¹⁶Nanning kha ro khylan, ka kaw cih paw ronawpaw the, chinawpaw ccakanccinaw the te kae kaw cih oh; ccakanccinaw kha nae tungvaw houhouh ka thuasah cih zah, nae looh bawmnaw kha ka paetaw cih.

¹⁷Ccakanccinaw te sarepaw hae kha kae sawnua cih oh zah, nae ccaaw hae kha ae luade cih oh; shethya te chiise luanaw nynh ae teenua cih oh; nae tungvaw kya thaloi rhaw ka thuasah cih. Kae, BAWIPAW nynh ka ho vae, a ci.