Read Zotung Chin EZEKIEL 6 Bible Online

EZEKIEL 6 - Zotung Chin bible

EZEKIEL 6

¹BAWIPAW bya tuh ka kya yn thua zah:

²Pou ccungccapaw, na mae kha Israel kya-e mua hae kalan khe hawi lah, profehbya honua hae.

³Pou nanning Israel mua hae, Bawipaw PACHIA bya hynh thaetua oh! Bawipaw PACHIA nynh mua hae te sangpyng hae kalan te vahya te accya kyakhe hynhte a ho: Kae, kamaw ccaccei nynh nae tungvaw kya thaloi ka thuasah cih zah, nae kya-e ahangpaw hmin hae kha ka roh cih.

⁴Nae silawhang hae tuh ccungccaw adae cih zah, nae kya-e mynkhuhpaw unawpaw tung hae tuh khya athua cih; chiapaw nae ccungccaw hae tuh nae zohtuh hae malang khe ka khulia cih hae.

⁵Israel hae rhua kha mih zohtuh hae malang khe ka nung cih; nae ru hae kha nae silawhang pepan khe phiariphiarae ka nung cih.

⁶Teitei na um oh zemah nae khua hae tuh ccungccaw adae cih zah, ahangpaw nae hmin hae tuh aroh cih, tuhteze nynh nae silawhang hae tuh a umhan cih zah aroh cih, nae zohtuh hae tuh akhya cih zah aroh cih, nae kya-e mynkhuhpaw unawpaw tung hae tuh bae athua cih zah nae ryalaw tuh azo cih.

⁷Chiapaw ccungccaw hae tuh nanning laku khe a khuliakuh cih hae; tetuh BAWIPAW ka thuapaw kha na nyh cih oh.

⁸Thuasalama abang kha ka haang cih hae. Nanning laku e abang tuh minphuin ccangpaw hae laku khe thaloi rhaw kyate a lue cih hae zah, ram hae kalan khe pong a phiakuh cih hae.

⁹Ka kyate a maeleihkuhpaw mih thinlung sei rynaw keiccu thuasah, mih zohtuh hae nulang a maeleihkuhpaw, sei rynaw mih mitdae keiccu thuasah kae hynh pawtemou yn ro hae cipaw kha a lue hae paw nynh kyng athuanaw hae minphuin hae laku khe kae kha yn liathui cih hae. Tetuh minmin nynh a cyisei hae paw hoyleinaw te mih nungsikunaw balyn keiccuze mimaw toulou nynh mih nungsikunaw kha a rihkuh cih hae.

¹⁰Te BAWIPAW ka thuapaw kha minmin nynh a nyh cih hae; mih tungvaw kya e shethya thuasah lanpaw hynh alakaw lan ka sii huataw khyh hae.

¹¹Bawipaw PACHIA nynh hynhte a ho: Israel phin kya-e athupaw anungsikuhpaw balyn hanlan ngaethya lan kou um! cite ho oh lah, nae kuih biate nae ccu te suakuh oh. Pawccecize minmin tuh thaloi, ccakan te shethya khate a chih cih hae.

¹²Asawnaw kya um hae paw tuh shethya te a chih cih hae zah, anaenaw kya um hae paw tuh thaloi te a chih cih hae; ahiinhypaw miakaw te haang athua hae paw tuh ccakanccinaw te a chih cih hae. Tuhcite ka thinrianaw kha mih tungvaw ka ccingsah cih.

¹³Silawhang hae pepan, zohtuh hae laku kya, ahangpaw sangpyng miakaw vawlan, mua dung hae balyn vawlan, hinlalyhpaw thingku kaw miakaw, anaw bungpaw phaesi thing miakaw kaw te minmin nynh mih zohtuh hae balyn kha mynkhuhpaw a pyanaw hae hmin miakaw kyakhe chiapaw mih ccungccaw hae nynh he a huekuh hae tuh, kae hynh BAWIPAW nynh ka thua cipaw na nyh cih oh.

¹⁴Minmin kha ka kuih ka dyngnua cih hae zah, khuasahnaw hae balyn pong lekuh lan, ramkaw kyate Riblah kyacia, ram kha ccungccaw adaenaw te ccungkia leipaw ram lang ka rae cih. Tetuh minmin nynh BAWIPAW ka thuapaw kha a nyh cih hae.