Read Zotung Chin EZEKIEL 7 Bible Online

EZEKIEL 7 - Zotung Chin bible

EZEKIEL 7

¹BAWIPAW bya tuh ka kya yn thua zah:

²Pou ccungccapaw, Bawipaw PACHIA nynh Israel ram kha hynhte a hopya: Athang vae! Ram aki ki pali tungvaw kya athangnaw tuh athua vae.

³Athangnaw tuh atu na tungvaw a thua vae, ka thinrianaw kha na tungvaw kae sawnua cih; na cyisahnaw thyhte bya kae pia cih, na nungsikunaw balyn hanlan nang kha de kae tah cih.

⁴Nang kha kae haang lan khyh, ngaethya kae ungsah lan khyh. Na nungsikunaw tuh na kya phang um zah, na cyisahnaw keiccu de kae tah cih. Tetuh BAWIPAW ka thuapaw kha na nyh cih.

⁵Bawipaw PACHIA nynh hynhte a ho: Ronaw phuin kheit koute phuin kheit yn thua! Dotua, ronaw yn thua.

⁶Athangnaw a thua vae, athangnaw a thua vae. Nang kha ae thonuakuh vae; dotua, yn thua vae!

⁷Pou ram lungkhu um hae paw, nae ronaw nynh ae thuanua vae oh. Accyh zaw vae, mua vawlan lungpawnaw thua leite, keisukeilae umnaw nin kha anae vae.

⁸Aro mawze ka thinrianaw kha nae tungvaw ka bu cih; ka thinrianaw kha nae tungvaw kae ccingsah nua cih oh. Nae cyisahnaw thyhte bya kae pia cih oh zah, nae nungsikunaw balyn keiccu de kae tah cih oh.

⁹Nanning kha kae haang lan khyh oh zah, ngaethya kae umsah lan khyh oh. Na nungsikunaw tuh nae laku kya a um keiccuze nae cyisahnaw thyhte de kae tah cih oh. Tetuh nanning de ae tah oh paw tuh kae, BAWIPAW nynh ka thua cipaw na nyh cih oh.

¹⁰Dotua, tuh-e nin! Dotua, tuh-e nin tuh yn thua vae! Nang na ronaw ccyh yn thua vae. Tungbang tuh apaw paw vae, lysakunaw tuh atoih vae.

¹¹Puathonaw tuh hoyleinaw tungbang lang a lethung vae. Minmin tuh lu kheit sanmah hiinhy lan khyh hae, mih hoirumnaw, mih sisua mah laehy vae khyh; minmin laku kya phu-enaw um khyh.

¹²Accyh azaw vae, anin yn nae vae; a retu tuh a lungpaw nan sah, a zuatu mah a ngaethah nan sah, pawccecize Pachia thinrianaw tuh minmin zapi balyn tungvaw khe a um.

¹³A zuatu nynh a la zua vae paw uccaw kalan aning nynh a hiinshe lungkhu bua kithui vae lan khyh. Pawccecize tuh-e zapi balyn te asekuhpaw vizin tuh ccing leite um lan khyh. Mih hoyleinaw keiccuze mih hiinnaw kha tynsakuh kho khyh hae.

¹⁴Minmin nynh saki kha tu hae zah, atyn-are kha a paccyn hae; thuasalama humhung mah rhawtuknaw kalan cceih khyh, pawccecize ka thinrianaw tuh tuh-e zapi balyn tungvaw phang a um.

¹⁵Atolang khe thaloi a um, alungkhu khe shethya te ccakannaw a um; ramkaw kya a umpaw tuh thaloi te a chih, khuapi kya a umpaw tuh ccakan te shethya nynh a chia.

¹⁶A hiinhy hae paw tuh a lue hae lanze, accya kya umpaw vahu hawte mua vawlan khe muih athua cih hae, mih balyn mawte mih hoyleinaw keiccu a rah a khui cih hae.

¹⁷Mih kuih tuh a thawzyabung cih zah, mih ccukharu balyn tuh tui lang a tang cih.

¹⁸Minmin nynh buriboei kha a zingkuh cih hae zah, rinaw nynh minmin kha a bong cih hae. Mih balyn mawte mih maethah cih zah, mih lu a okuh cih hae.

¹⁹Mih ngunphua kha laanpi lang a vua cih hae, mih sui tuh athupaw lang ria athua cih. BAWIPAW a thinria nin kya tuh mih ngunphua te mih sui nynh minmin kha khum kho khyh hae. Tuh-e te mih vueso lan khyh zah, byn lan khyh hae. Pawccecize tuh-e tuh mih hoyleinaw kyate yn thuapaw thykupawkunaw nynh thua.

²⁰Apuithyapaw mih ccaankunawpaw khate lysakuh hae zah, anungsikuhpaw mih zohtuh hae, luathua-ae-ui umpaw mih uccaw hae kha a raeku hae; tukeiccuze tuh-e tuh minmin hanlan athupaw uccaw lang ka rae cih.

²¹Tuh-e tuh ramccang hae kalan te laephi vaw e ccungccaw hoylei hae kalan khe luadepaw uccaw hawte ka ap cih hae zah, minmin nynh a thusah cih hae.

²²Minmin kyate ka mae kha ccanglang ka hawitaw cih hae, tetuh aphutepaw ka hmin kha a thusah cih hae; puathonaw tuh tuh-e hmin lungkhu lang a tee cih, minmin nynh tuh-e hmin tuh a thusah cih hae.

²³Sivawrui bawtary kha raetua! Pawccecize ram tuh ccungccaw chiapaw seinaw te phe abeih; khuapi tuh tuaasahkunaw te phe abeih.

²⁴Mih inn hae kha lawpya khylan athah huaccepaw minphuin hae kha kae thuasah cih hae. Athungpaw ccungccaw hae lysakunaw kha ka thangsah cih zah, mih hminthyaa hae kha thusah athua cih hae.

²⁵Lungriathaenaw he yn thua te, minmin nynh daenaw kha a ccung cih hae, thuasalama muih lan khyh hae.

²⁶Ronaw kha ccangkheit koute ccangkheit, laanbya kha ccangkheit koute ccangkheit yn langkuh cih; profeh kyate vizin kha a ccung cih hae; ranpibawi kyate ccangpyanaw tuh um vae lan khyh zah, piccan hae kyate tuanaw pyanaw mah um vae lan khyh.

²⁷Siapharan tuh a rah a khui cih, bawi tuh lungrote a um cih zah, ram lungkhu e ccungccaw hae kuih tuh athyngkuh cih. Mih cyisahnaw thyhte mih tungvaw ka cyih cih; minmin nynh bya a pia hae thyhte mimaw kha bya ka pia cih hae. Te BAWIPAW ka thuapaw kha minmin nynh a nyh cih hae, a ci.