Read Zotung Chin EZEKIEL 9 Bible Online

EZEKIEL 9 - Zotung Chin bible

EZEKIEL 9

¹Te aning nynh ka thaenaw khe roi accae lante sia zah, “Khuapi kya-e ccungccaw theihtu hae nanning, chianawpaw nae zunghe kha ccarou ccyngkute oun naeku tua oh,” a ci.

²Te ccungccaw lu taruh tuh chianawpaw zunghe kha ccarou ccyngkute thahlang a hawipaw, thahlang koikua kalan te oun thua hae; minmin laku e lu kheit tuh laphan laaw te kuakuhpaw boeining kha lawkuh zah a tae kyakhe ccatui bawng kha a keku. Minmin tuh tee hae zah, sohin silawhang pe khe a thadyn hae.

³Israel Pachia phu-enaw tuh a la umnaw cherubim vawlan te Beikinn thuakaw kalan khe a kaethung. BAWIPAW nynh laaw te kuakuhpaw boeining a lawkuhpaw pisepaw, a tae kya ccatui bawng a kekuhpaw kha ko zah,

⁴“Jerusalem khuapi lungkhu lang la cceih lah, khuapi lungkhu e nungsikunaw balyn keiccuze a rah a khui hae paw mih terui kyakhe syntawnaw kha la raetua,” a cipya.

⁵Mingccang hae kha ka thaenaw khe hopah hae zah, “Khuapi lungkhu khe amaw kha zui oh lah, ccungccaw theih oh; haang nan oh lah, ngaethyaumsah nan oh.

⁶Atawpaw, liaccaw te ccangvae, imua taraw hae te nopi hae kha theih oh, thuasalama syntawnaw rae athua hae paw kha tuh ty nan oh. Ka beikinnthyaa kyate thoty oh,” a cipya hae. Tukeiccuze minmin nynh beikinn malang um hae paw piccan hae kyakhate a thoty hae.

⁷Te aning nynh minmin kha, “Beikinn kha thusah oh lah, michi rhua khate voidu kha phe biasah oh. Te poutaw oh!” a cipya hae. Tukeiccuze minmin nynh pou hae zah, khuapi lungkhu khe ccungccaw hae kha a chia hae.

⁸A chia cciamang lya hae khe kae tuh ka makhaete ka um, ka mae ka sahbung zah, “Pou Bawipaw PACHIA, Jerusalem tungvaw na thinrianaw kha na bu thyhte, a laehypaw Israel balyn kha na roh cih hae tou?” cite ka sia.

⁹Aning nynh kae kha, “Israel te Judah phin hae seinaw tuh myaryamaw ale; ram tuh chiise luanaw te phe beih zah, khuapi tuh dingleinaw te phe abeih; minmin nynh, ‘BAWIPAW nynh e ram hynh phe vua vae, BAWIPAW nynh muih vae khyh,’ a ci hae.

¹⁰Kae nynh minmin kha ka haang lan khyh hae, ngaethya mah ka umsah lan khyh hae, mih cyisahnaw kha mih lu vawlan ka ccawsah cih,” yn cipya.

¹¹Te laphan laaw te kuakuhpaw boeining a lawkuhpaw pisepaw, a tae kya ccatui bawng a kekuhpaw nynh, “Kaw nae pya thyhte phe ka cyi vae,” cite bya a leih.