Read Zotung Chin DANIEL 12 Bible Online

DANIEL 12 - Zotung Chin bible

DANIEL 12

¹“Tuh ccyh lyatuin, na minphuin hae thungkhawtu, bawi lepaw Mikhael tuh yn langkuh cih. Minphuin hae a um takaw hae te a um boi leipaw lungriathaenaw ccyh tuh yn thua cih. Thuasalama tuh ccyh lyatuin, ccauh kya a min zei athuapaw na minphuin hae miakaw tuh luesah athua cih hae.

²Laenoi kya a ih hae paw patae tuh oun tho cih hae, abang tuh zungzae hiinnaw te a tho cih hae zah, abang tuh maethyanaw te zungzae theihryakunaw khate a tho cih hae.

³Mihaw hae tuh vaawlui a awpaw hawte a aw cih hae zah, ccungccaw patae kha dingnaw kalan a cciakhae hae paw tuh awsi hawte zungzae te zungzae cia a aw cih hae.

⁴Thuasalama Daniel, nang tuh ccyh athang mawlaezung, e bya hae hynh khawsung lah, ccauh kha tazeih khiatua. Ccungccaw patae tuh nulang malang a ccue bungthung cih hae zah hoyleinaw tuh alungthung cih,” a ci.

⁵Tetuh kae, Daniel nynh ka do zah, ccangpaw lu ning hae tuh oun langkuh hae, lu kheit tuh vawkhu hynhlang raw thadyn zah ccangpaw lu kheit tuh khuhlang raw a thadyn.

⁶Lukheitpaw nynh laaw te kuapaw boeining kha lawkuh zah vawkhu palung lang a umpaw lukheitpaw kha, “E ngaeangnaw hae athang cia hohsemou aro ung cih?” cite a khia.

⁷Laaw te kuapaw boeining kha lawkuh zah vawkhu palung lang a umpaw lukheitpaw nynh a ranglang kuih te a voilang kuih kha vaawlang hangthung zah, “Ccyh kheit, ccyh ning, te angankuh lungkhu athua cih, athyaapaw ccungccaw hae huhan a pazaeku ccyh he yn thang te, e uccaw hae balyn hynh accing cih,” cite zungzae hiinpaw Pachia min kha phyate bya a kinkupaw kha ka thae.

⁸Ka thae zemah ka thaethya khyh; tukeiccuze kae nynh, “Ka bawipaw, e uccaw hae hynh athangnaw pawtemou yn cyihkuh cih?” cite ka khia.

⁹Aning nynh, “Daniel, cciatua, pawccecize e bya hae tuh athangnaw ccyh athua mawlaezung khawsung lanpaw te tazeihkhia lanpaw nynh thua.

¹⁰Ccungccaw patae tuh thyaasah athua cih hae zah syntawtua athua cih hae, thuasalama ccungccaw hoylei hae paw nynh tuh thaethya lan khyh hae zah ahoy lei lante po a cyih cih hae. Thuasalama mihaw hae tuh a thaethya cih hae.

¹¹Tyty raepaw maee-ute silawnaw kha daesah thua zah ro a mangpaw anungsikuhpaw kha thadynsah he athua ccyh kyate nin thong kheit za ning sung takua aro cih.

¹²Nin thong kheit za thum sung thum nin pangaw cia lungzite a um hae paw tuh lungtua hae paw nynh thua hae.

¹³Thuasalama nang tuh athang cia cciatua, tynkaring lan la um; ccyh athang nin kya na lasung kha ccou khylan na thoothui cih,” a ci.