Read Zotung Chin DANIEL 3 Bible Online

DANIEL 3 - Zotung Chin bible

DANIEL 3

¹Nebukhadnezzar siapharan nynh sui zohtuh ccangkheit, ahangpaw dong sung taruh, akopaw dong taruh acihpaw kha rae zah, Babilon ram Dura bialae kya a thadynsah.

²Te mangki hae, zipe hae, vuethoh hae, tuanaw pyatu hae, phua ccytu hae, byapiatu hae, upadi thya hae paw te ram lungkhu e bawi hae balyn kha Nebukhadnezzar nynh a thadynsahpaw zohtuh kha apnaw rae khylan sueluaku lan kaw a pya hae.

³Tukeiccuze mangki hae, zipe hae, vuethoh hae, tuanaw pyatu hae, phua ccytu hae, byapiatu hae, upadi thya hae paw te ram lungkhu e bawi hae balyn tuh Nebukhadnezzar siapharan nynh a thadynsahpaw zohtuh kha apnaw rae khylan a sueluakuh hae. Nebukhadnezzar nynh a thadynsahpaw zohtuh malang khe he a thadyn hae tuh,

⁴bya thaesahtu nynh thawte sia zah, “Pou bya aphuinphuin a ho hae paw minphuin hae,

⁵nanning nynh mungkae, phyly, tintang, lanchi, tyng, daw te khuakupaw aphuinphuin roi kha he na thae oh te, Nebukhadnezzar nynh a thadynsahpaw sui zohtuh kha bakhungnuate na beik cih oh.

⁶Bakhungnuate a beik leipaw tuh humhung zemah arua cciamangpaw maeephupi lungkhu lang palou vua athua cih, cite kawpya na thua oh,” a ci.

⁷Tukeiccuze ccungccaw balyn nynh mungkae, phyly, tintang, dakhin, daram te khuakupaw aphuinphuin roi kha he a thae takaw hae te, bya aphuinphuin a ho hae paw minphuin hae nynh bakhung hae zah, Nebukhadnezzar siapharan nynh a thadynsahpaw sui zohtuh kha a beik hae.

⁸Tuh ccyh lyatuin Khaldi hae nynh oun cceih hae zah, Judah hae kha sei a be hae.

⁹Minmin nynh Nebukhadnezzar kha, “Pou siapharan, na hiinshe sae vae sah!

¹⁰Pou siapharan, nang nynh kaw na tho zah, mungkae, phyly, tintang, lanchi, tyng, daw te khuakupaw aphuinphuin roi a thaepaw miakaw nynh sui zohtuh kha a bakhungnua cih zah a beik cih,

¹¹te bakhungnuate a beik leipaw miakaw tuh arua cciamangpaw maeephupi lungkhu lang vua athua cih, na ci.

¹²Pou siapharan, Babilon ram uknaw ryalaw kya na nung hae paw Judah hae: Shadrak, Meshak te Abednego nynh tuh nang kha pawlang ae ria khyh hae. Na pachia hae kha beik khyh hae zah, na thadynsahpaw sui zohtuh kha beik khyh hae,” cite a hopya hae.

¹³Tetuh Nebukhadnezzar tuh myarya a thinria zah Shadrak, Meshak te Abenego kha ko lan kaw a pya hae keiccuze ko hae zah siapharan malang a thuakhae hae.

¹⁴Nebukhadnezzar nynh minmin kha, “Pou Shadrak, Meshak te Abenego, ka pachia hae kha na bakhungnua khyh oh zah, ka thadynsahpaw sui zohtuh kha na beik khyh oh, a ci hae paw tuh thanccingpaw athua tou?

¹⁵Atu nanning nynh mungkae, phyly, tintang, lanchi, tyng, daw te khuakupaw aphuinphuin roi kha he na thae oh te, ka raepaw zohtuh kha bakhungnuate beik lan na paccynku oh ze ahoy cih. Thuasalama na beik khyh oh zetuh, arua cciamangpaw maeephupi lungkhu lang palou phung na thua cih oh, ka kuih kyate ae khum kho cih oh paw pachia hummou a um?” a cipya hae.

¹⁶Shadrak, Meshak te Abenego nynh siapharan kha, “Pou Nebukhadnezzar, e konglangte na kya daangsahkunaw byaho lanpaw kae hoi khyh.

¹⁷Pou siapharan, kae beikpaw kae Pachia nynh aruapaw maeephupi kyate thuasah, na kuih kyate thuasah oun khum ze, oun khum sah.

¹⁸Oun khum khyh zemah, pou siapharan, na pachia hae kha kae bakhungnua lae lan khyh zah, na thadynsahpaw sui zohtuh kha kae beik lae lan khyh cipaw beih nytua,” a cipya hae.

¹⁹Tetuh Nebukhadnezzar tuh Shadrak, Meshak te Abednego tungvaw a maesue phe roh lan ciate myarya a thinria zah, maeephupi kha atakaw lya laeze leit sari sosah hua oh, cite kawpya hae zah,

²⁰Shadrak, Meshak te Abednego kha khii lan te arua cciamangpaw maeephupi lungkhu lang vua khylan a rhawkaw hae kyaze a thung huaccepaw abang kha kaw a pya hae.

²¹Tukeiccuze lu thum hae kha mih angkile, mih langpatung, mih lukhung te ccangpaw mih boeining hae ryte khiide hae zah, arua cciamangpaw maeephupi lungkhu lang a vua hae.

²²Siapharan kya-e kawpyanaw tuh myarya rang zah, maeephupi tuh myarya aso keiccuze Shadrak, Meshak te Abednego a hang hae paw pise hae kha maeesoi nynh phe chia hae.

²³Tuh-e lu thum hae, Shadrak, Meshak te Abednego tuh khiidekute aruapaw maeephupi lungkhu lang a ccah hae.

²⁴Te Nebukhadnezzar siapharan tuh a ngaeangthua zah arangte a thokuh. Tuanaw pyatu hae kha, “Khiidete maee lungkhu lang ah phung oh paw kha lu thum thua khyh tou?” cite a khia hae. Minmin nynh siapharan kha, “Ahme, pou siapharan,” a cipya hae.

²⁵Aning nynh, “Khii leipaw ccungccaw lu pali nynh maee lungkhu kya a ccia hae paw te vaemaw mue leite a um hae paw kha ka muih, lu palinaw e paw tuh pachia muinsan nynh a ke,” cite a khung hae.

²⁶Nebukhadnezzar nynh arua cciamangpaw maeephupi pe langkhe naekuh zah, “Ahang Huaccepaw Pachia ryalahtu hae, Shadrak, Meshak te Abednego, oun pou oh lah, hynhlang oun cciatua oh!” a cipya hae. Tukeiccuze Shadrak, Meshak te Abednego tuh maee lungkhu te oun pou hae.

²⁷Mangki hae, zipe hae, vuethoh hae te siapharan tuanaw pyatu hae tuh pynkheihlan sueluakuh hae zah, tuh-e lu pali hae pyn kya maee nynh thungnaw ccapyh san a hoi khyhpaw kha a muih hae; mih sangrua ccangkheit san maee nynh u khyh, mih angkile kha mah u khyh zah, maee myn sanmah myn khyh hae.

²⁸Nebukhadnezzar nynh, “Shadrak, Meshak te Abednego hae Pachia tuh thehoyte um sah, a vaawccungccaw hae kha sawpyate, amaw a doliakuh hae paw a ryalahtu hae kha a khum hae. Mih Pachia laelan ccangpaw pachia kha bakhungnuate beik lae tuh, mih pyn pyaku ciate siapharan kaw kha a ei hae.

²⁹Tukeiccuze kae nynh kaw ka tho: Pawpaw tahawpaw ccungccaw, minphuin te pawpaw tahawpaw bya a hopaw athua zemah Shadrak, Meshak te Abednego hae Pachia kha thethya a hopaw tuh a kuih a ccu khya athua cih zah, a inn kha mah aronahpaw apumkuhpaw lang a tang cih; pawccecize e hawte ccungccaw a khum khopaw ccangpaw pachia um khyh,” a ci.

³⁰Te siapharan nynh Shadrak, Meshak te Abednego kha Babilon ram kya ryalaw a kaesah hae.