Read Zotung Chin DANIEL 4 Bible Online

DANIEL 4 - Zotung Chin bible

DANIEL 4

¹Nebukhadnezzar siapharan nynh bya aphuinphuin ho hae paw laephi pynpi e minphuin hae balyn kalan khe: Nae kya daenaw um sah!

²Ahang Huaccepaw Pachia nynh rya yn lawpyapaw muihsahnaw hae te ngaeang lan umpaw balyn kha hothui ka ry.

³Pachia nynh a raepaw muihsahnaw hae tuh pawcih baban mou lesae zah, ngaeangnaw a raepaw tuh pawcih baban mou huhan a hoi! A peenaw tuh zungzae tynpaw peenaw thua zah, a kya-e kawhoinaw tuh she takyh kya atyn, a ci.

⁴Kae, Nebukhadnezzar tuh ka inn kya ngaengan thawdangte ka um zah, ka siapharan inn kya hiinhoyte ka um.

⁵Kae yn risahpaw maan ccangkheit ka sah; ka i lyakhe ri lan umpaw vizin kha ka muih.

⁶Tukeiccuze ka maan kha leihpya khylan Babilon ram e mihaw hae balyn kha ka malang thuakhae lan kaw ka tho.

⁷Te mitleihthya hae paw, beidinhothya hae paw, Khaldi hae te apawe hae paw tuh oun thua hae zah, ka maan kha ka hopya hae, thuasalama ka maan kha yn leihpah kho khyh hae.

⁸Nyathyakou khe ka pachia min liate Belteshazzar cite ko thua zah athyaapaw pachia hae muisaw te phe beihpaw Daniel tuh ka malang yn thua zah, ka maan kha ka hopya:

⁹“Mitleihthya hae paw lupi athuapaw, pou Belteshazzar, nang tuh athyaapaw pachia hae muisaw te phe na beih zah, nang na hanlan tuh myaryamaw arupaw byakhupaw um khyh cipaw ka ny. Maan ka sahpaw hynh ngaetua lah, yn leihpya tua.

¹⁰Ka i lya ka muihpaw vizin tuh hynhte nynh thua; laephi ngaelung khe myarya hangpaw thingku ku kheit a um.

¹¹Thingku tuh lethung zah myarya a bong, adungpaccy tuh vaawlui phe phah zah, laephi pynpi adianaw kyate muih kho athua.

¹²Tuh-e thing anaw hae tuh myarya puithya, a thae tuh myarya lung zah, ahysuepaw balyn hanlan looh lang phe azaw. Loramsaw hae nynh a mynzia kaw khe a um hae, vaawlang e pavaw hae nynh akaran kya mih bu luakuh hae zah, khah-e thingku khate ahysuepaw balyn kha kua athua hae.

¹³Ka ih zah vizin ka muih lyakhe ngawran he ka do tuh, vaawlang te yn rungbungpaw athyaapaw rhawviatu lu kheit a um.

¹⁴Aning nynh thawte sia zah a hopaw tuh: ‘Thingku kha nge lah, akaran hae kha loi hae, anaw kha sia lah, athae kha phiariphiarae nung hae. Sarangpaw hae tuh tuh-e thingku kaw kyate ccue hae sah lah, pavaw hae tuh akaran hae kyate zou hae sah.

¹⁵Thuasalama a ccungmuing te a tharui kha sivawrui te sohinrui khate khii lah, laephi kya cciataw, nebaleihpaw lonua kya cciatawtua. Vaawlang e dangtui nynh aning kha ccawphu sah. Laephi kya-e lonua hae kyakhe loramsaw hae ryte umkheih hae sah.

¹⁶Kum sari lungkhu ccungccaw thinlung hoi leite, sarangpaw thinlung hoi sah.

¹⁷Ahang Huaccepaw Pachia nynh ccungccaw hae peenaw kha a uk cipaw te tuh-e peenaw tuh a pya rypaw ccungccaw kha pya zah, anyaa huapaw ccungccaw hae kha mah a pya hae cipaw kha ccungccaw balyn nynh a ny ccaw hae cite, thingku ngawtu hae nynh tuhcite byapia hae, tuh-e byapaenaw tuh athyaapaw vaawccungccaw hae kya-e kawpyanaw liate nynh thua,’ a ci.

¹⁸E hynh kae, Nebukhadnezzar Siapharan nynh maan ka sahpaw nynh thua. Atu tuh Belteshazzar, nang nynh ka maan kha leihtua; ka peenaw lungkhu umpaw mihaw hae balyn nynh ka maan kha a leih kho khyh hae zemah, nang tuh athyaapaw pachia hae muisaw te phe na bia keiccuze maan kha na leih kho,” a cipya.

¹⁹Te Belteshazzar cikuhpaw Daniel tuh sosoh lungkhu myarya a lungriathae zah a thinphang. Siapharan nynh, “Belteshazzar, ka maan te asuilan nynh na thin ae phangsah nan sah,” a cipya. Belteshazzar nynh, “Ka bawipaw, na maan hynh nang ae hua hae paw elang thua sah lah, na maan asuilan hynh na rhaw hae elang thua vae sah!

²⁰Na maan kya na muihpaw thingku, myarya le zah, anaw myarya abongpaw, adungpaccy tuh vaawlui phe phahpaw, laephi pynpi adianaw kyate muih kho athuapaw,

²¹anaw tuh myarya puithya zah athae myarya alungpaw, ahysuepaw balyn hanlan looh lang phe azawpaw, aku kaw khe loramsaw hae um hae zah, vaawlang e pavaw hae nynh akaran kyakhe bu a luakunaw hae paw thingku tuh—

²²namaw nynh na thua, pou siapharan! Nang tuh na le zah na thung. Na lesaenaw tuh houhouh le zah vaawlui phe aphah, na uknaw tuh laephi adianaw cia phe a thua.

²³Siapharan nynh a do lyakhe, athyaapaw ngawtu lu kheit tuh vaawlang te yn rungbung zah, ‘Khah-e thingku kha nge lah rotua, thuasalama a ccungmuing te a tharui kha tuh laephi kya cciatawtua, sivawrui te sohinrui ryte khiide lah, ramkaw e lonua kya cciatawtua, kum sari lungkhu vaawlang e dangtui nynh ccawphu sah lah, loramsaw hae ryte umkheih hae sah,’ a ci—

²⁴Pou siapharan, e hynh na maan asuilan thua zah, tuh-e tuh Ahang Huaccepaw Pachia nynh ka bawipaw siapharan na tungvaw kya a thuasah lanpaw nynh thua:

²⁵Ccungccaw hae laku kyate nang kha dee na thua cih zah, loramsaw hae ryte na umkheih cih oh. Ahang Huaccepaw Pachia nynh ccungccaw hae peenaw kha uk zah, tuh-e peenaw tuh a pya rypaw kha a pya cipaw na ny mawlaezung, tangnuapaw hawte lonua kha na boukuh cih zah, kum sari lungkhu vaawlang e dangtui nynh ae ccawphu cih.

²⁶Thingku a ccungmuing te a tharui kha cciataw lan kawpya athua, cipaw asuilan tuh, Pachia nynh laephi pynpi a uk cipaw he na nyh te, na peenaw kha namaw hanlan bua atyn cih cinawpaw nynh thua.

²⁷Tukeiccuze, pou siapharan, tuanaw kae pyapaw hynh beih lawku tua: dingnaw raenaw khate na seinaw kha shawkhawkuh lah, tuaasahkunaw a teing hae paw tungvaw thawccinaw hoinaw khate na hoyleinaw kha shawkhawku tua, tuhteze nynh na hiin hoynaw ccyh asae cih,” a ci.

²⁸E hae balyn nynh Nebukhadnezzar siapharan tungvaw a thuanua.

²⁹Sawpaw sah haw lae ning he athang te, siapharan tuh Babilon e a siapharan inn innccuvaw khe cceih zah,

³⁰“E hynh alesaepaw Babilon, siapharan umnawpaw khuapi lang cite athungpaw ka huhan te aphu-epaw ka lesaenaw hanlan ka raepaw thua khyh tou?” a ci.

³¹Tuh-e bya a ho lyakhe, vaawlang te roi roikheit yn ccae zah: “Pou Nebukhadnezzar siapharan, ka bya hynh ngaetua: Na peenaw tuh na kyate lawpya athua vae!

³²Nang kha ccungccaw hae kyate ccaring dee na thua cih zah, loramsaw hae ryte na umkheih cih oh. Ahang Huaccepaw Pachia nynh ccungccaw hae peenaw kha uk zah, tuh-e peenaw tuh a pya rypaw kha a pya cipaw na ny mawlaezung tangnuapaw hawte lonua kha na boukuh cih,” a cipya.

³³Tuh-e bya tuh Nebukhadnezzar tungvaw palou accing. Aning kha ccungccaw hae kyate dee thua zah, tangnuapaw hawte lonua kha a boukuh, vaawlang e dangtui nynh a pyn kha phe a ciasah; a ming tuh mosipi ming hawte sae zah, a kuihting te a ccuting tuh pavaw ccuting hawte asae.

³⁴Tuh-e ccyh he athang te, kae, Nebukhadnezzar tuh vaawlang khe ka do zah, ka lungccingthui. Ahang Huaccepaw Pachia kha the ka hoysah, zungzae hiinpaw Pachia kha sawtuate the ka hoysah. Pawccecize a uknaw tuh zungzae tynpaw uknaw thua zah, a peenaw tuh she takyh kya atyn.

³⁵Laephi ccungccaw balyn tuh alakawpaw lang ria thua hae zah, vaawccungccaw hae te laephi ccungccaw hae kha a ry hawte a cyi hae. Humhung nynh mah a kuih kha khee kho khyh zah, “Pawmou na cyi?” cite a hopah khopaw um khyh.

³⁶Tuh ccyh lyakhe, ka lungkyhthui zah, ka peenaw a phu-e nawlan ka lesaenaw te ka sung-enaw kha ka muethui. Tuanaw yn pyatu hae te ka kuihkaw e bawi hae nynh kae kha yn cciadue hae zah, ka peenaw kya uknaw kaw kha pyathui ka thua, langmawlya laeze ka huhan tuh houh alehua.

³⁷Atu kae, Nebukhadnezzar nynh vaaw Siapharan kha the ka hoysah, ka hangthung zah saw ka tua; pawccecize a cyipaw balyn tuh kyh zah, a laanpi tuh ading; a lysakuh hae paw kha a nyaasah bung kho hae.