Read Zotung Chin DANIEL 6 Bible Online

DANIEL 6 - Zotung Chin bible

DANIEL 6

¹Darias nynh a peenaw a uk lanpaw mangki za kheit lu kuin kha a peenaw pynpi po lekuh lan a nung hae,

²tuh-e hae a uk lanpaw lupi lu thum kha nung hae zah, tuin kyaze Daniel tuh a umbua; siapharan rynaw kha accing kho nawlan, mangki hae nynh lupi hae kalan a thaesah cih hae.

³Athyaapaw muisaw tuh Daniel kya a um keiccuze Daniel tuh ccangpaw lupi hae te mangki hae balyn laeze langkuh hua zah, siapharan nynh a peenaw pynpi a uktu lang nung lante a paccyn.

⁴Tukeiccuze lupi hae te mangki hae nynh Daniel kha rawsete peenaw te asekuh lante a seinaw kha a ccungpya hae. Thuasalama Daniel tuh a lungzipaw thua zah, a tungvaw kya sawphahkunaw thuasah, seinaw thuasah ccapyh san a um khyh keiccuze a seinaw kha muih kho khyh hae.

⁵Minmin nynh, “Daniel a Pachia kawbya te asekuh lante a seinaw kha ah muihpya khyh oh zetuh, e Daniel hynh a seinaw ccapyh san ah muih vae lan khyh oh,” cite a hoku hae.

⁶Tukeiccuze lupi hae te mangki hae tuh aruh lante paccynte siapharan kalan cceih hae zah, “Pou Darias siapharan, na hiinshe sae vae sah!

⁷Namaw kalan thua leite ccangpaw ccungccaw kalan thuasah, pachia kalan thuasah nin sung thum lungkhu saw a sangpaw tuh chindeih khia lungkhu lang vua athua cih, cite phungzae ccangkheit kha siapharan nynh a rae cih zah a tynsah cih, cipaw kha ram lungkhu e lupi hae balyn, zipe hae, mangki hae, tuanaw pyatu hae te uktu bawi hae nynh nawccawnaw kae hoi.

⁸Tukeiccuze, pou siapharan, nang nynh kaw beih tho lah, na minthuhku tua, tuhteze nynh rulae kho leipaw Media hae te Persia hae upadi thyhte rulae kho thua lan khyh,” a cipya hae.

⁹Tukeiccuze Darias siapharan nynh minthuhkuh zah kaw a tho.

¹⁰Siapharan nynh minthuh zah kaw a tho vae cipaw kha Daniel nynh a ny zemah, a inn langkhe leih ki zah, a inn avawlan khaan kya Jerusalem lang a hawipaw thanlan-aw kha hungte, leih a la cyimae hawte, nin kheit ze vae thum, ccukharutungte Pachia kalan sawsang zah the a hoysah.

¹¹Daniel nynh a Pachia kalan sawsang zah thawccinaw a ngiakupaw kha a dokhawtu hae nynh oun thua hae zah a muihbia hae.

¹²Tetuh siapharan kalan oun cceih hae zah, “Pou siapharan! Namaw kalan thua leite ccangpaw ccungccaw kalan thuasah, pachia kalan thuasah nin sung thum lungkhu saw a sangpaw tuh chindeih khia lungkhu lang vua athua cih, cite na minthuhkute kaw na tho vae khaw?” cite kaw a thopaw konglang kha a hopya hae. Siapharan nynh, “Athua, arulaekuh kho leipaw Media hae te Persia hae upadi thyhte atyn,” a ci.

¹³Tetuh minmin nynh siapharan kha byakhungru hae zah, “Pou siapharan, Judah ram kyate kyngte cciakhae athuapaw Daniel nynh nang kha thuasah, minthuhkute kaw na thopaw kha thuasah pawlangria khyh zah, nin kheit ze vae thum saw a sang,” a cipya hae.

¹⁴Siapharan nynh tuh-e bya tuh he a thae te, myarya a lungriathae. Daniel kha khum lan tuakuh zah, khuanin accaw mawlaezung Daniel kha luesah lan thawte a zuaku.

¹⁵Tetuh Daniel a dokhawtu hae nynh siapharan kalan cceih hae zah, “Pou siapharan, siapharan nynh a rae vae paw kawthonaw thuasah, phungzae thuasah rulae kho thua khyh, cite Media hae te Persia hae kawbya kya a um cipaw beih nytua,” a cipya hae.

¹⁶Te siapharan nynh kawpya hae thyhte, Daniel kha cciakhae hae zah chindeih khia lungkhu lang a vua hae. Siapharan nynh Daniel kha, “Lungzite rya na lawpyapaw na Pachia nynh nang kha ae luesah vae sah!” a cipya.

¹⁷Lungtungpi kha lah hae zah chindeih khia a khawsung kou hae te, Daniel tuh a lue kho khyh nawlan, siapharan nynh a minkhianawpaw tazeih te a kuihkaw e bawi hae tazeih kha a khia.

¹⁸Te siapharan tuh a inn lang cceih zah zidae looh-ae a sung; hoysahnaw mah rae khyh zah i mah ih kho khyh.

¹⁹Te, khua he yn dae te, siapharan tuh tho zah chindeih khia kalan rangsakute a cceih.

²⁰Daniel a umnaw chindeih khia kalan he a naekuh te, Daniel kalan khe thinphangte sia zah, “Ahiinpaw Pachia seepaw, pou Daniel, lungzite rya na lawpyapaw na Pachia nynh nang kha chindeih hae kyate ae khum kho tou?” a cipya.

²¹Daniel nynh siapharan kha, “Pou siapharan, na hiinshe sae vae sah!

²²Ka Pachia nynh a vaawccungccaw hae kha yn saw hae zah, chindeih hae khalang kha a hu hae keiccuze chindeih hae nynh vawsaw oun pya khyh hae, pawccecize kae tuh Pachia malang seinaw ka hoi khyh; pou siapharan, nang na malang mah hoyleinaw ka rae khyh,” a ci.

²³Tetuh siapharan tuh myaryamaw a lungtua zah Daniel kha chindeih khia lungkhu te pousah lan kaw a pya hae. Tukeiccuze Daniel tuh chindeih khia lungkhu te a pousah hae, a Pachia kha a doliaku keiccuze vaemaw ccapyh san mue khyh.

²⁴Siapharan nynh kawpya hae zah, Daniel sei a be hae paw kha kote mimaw, mih ccaaw hae te mih zu hae ryte chindeih khia lungkhu lang a vua hae. Chindeih khia lungkhu laekhu a thua maw hae khe, chindeih hae nynh zounua hae zah mih ru balyn kha zoihtatyh lan a khya hae.

²⁵Tetuh Darias nynh laephi pynpi phe lekuh lan ccungccaw balyn, minphuin hae te bya aphuinphuin a ho hae paw kalan ccaw a zei: Nae kya hiin hoynaw um vae sah!

²⁶Ka uknaw ram pynpi kya-e ccungccaw hae nynh Daniel Pachia malang khe ri te sawtua lan kaw kae pya oh: Pawccecize aning tuh ahiinpaw Pachia, zungzae tynpaw Pachia nynh thua. A peenaw tuh papin roh lan khyh zah, a uknaw tuh thang lan khyh.

²⁷Aning nynh khum hae zah a luesah hae, muihsahnaw te ngaeangthua lan umpaw kha vaaw te lae kya a rae; chindeih thungnaw kyate Daniel kha a khum vae.

²⁸Tukeiccuze Daniel tuh Darias nynh a uk lungkhu te Persia paw Sairas nynh a uk lungkhu tuh hiinhoyte a um.