Read Zotung Chin HOSEA 1 Bible Online

HOSEA 1 - Zotung Chin bible

HOSEA 1

¹Judah siapharan Uzziah, Jotham, Ahaz te Hezekiah siapharan hae she lya te Israel siapharan Jeroboam, Joash ccapaw she lyakhe Beeri ccapaw Hosea kalan khe BAWIPAW bya tuh yn thua.

²BAWIPAW nynh Hosea kyate masaty bya he a ho te, BAWIPAW nynh Hosea kha, “Cceih lah, ohhuanung kha zu lang dykute ohhuakunaw ccaaw hae kha saahku tua, pawccecize e ram nynh BAWIPAW kha vua zah myarya lepaw ohhuakunaw kha a rae vae,” a cipya.

³Tukeiccuze Hosea nynh cceih zah Diblaim ccanung Gomer kha zu lang a umkhae, te tuh-e nung nynh ccaawpoi zah ccapaw lu kheit a saahpya.

⁴Te BAWIPAW nynh Hosea kha, “Ccapaw kha Jezreel cite minphutua, pawccecize sosoh aro te Jezreel chiise keiccuze Jehu ciihan hae kha de ka tah cih hae, Israel hae peenaw kha ka thangsah cih.

⁵Tuin nin kya Jezreel accya khe Israel li kha ka khyapah cih,” a ci.

⁶Gomer nynh ccaaw bua poi zah ccanung kha a saah. Te BAWIPAW nynh Hosea kha, “Ccanung kha Lo-ruhamah cite minphutua, pawccecize Israel hae kha ngaethya ka umsah vae lan khyh hae zah, ka ngaethya vae lan khyh hae.

⁷Thuasalama Judah kha tuh ngaethya ka umsah cih zah BAWIPAW mih Pachia liate ka khum cih hae; li, thaloi, rhawtuk, marang, marang rhawkaw hae khate ka khum lan khyh hae,” a cipya.

⁸Gomer nynh a ccanung kha mateitui he a phia te, ccaawpoi zah ccapaw kha a saah.

⁹Te BAWIPAW nynh, “Ccapaw kha Lo-ammi cite minphutua, pawccecize nanning tuh ka ccungccaw hae na thua khyh oh zah kae tuh nae Pachia ka thua khyh,” a ci.

¹⁰Tuhzemah Israel hae tuh toutae leipaw te riatae leipaw rili laesia hawte athua cih hae; “Nanning tuh ka ccungccaw hae na thua khyh oh,” cite hopya athuanaw hae hmin kya mawkhe, “Ahiinpaw Pachia ccaaw hae,” cite hopya athua cih hae.

¹¹Judah hae te Israel hae tuh pynkheihlan suelua athua cih hae zah, minmin nynh cciakhaetu lu kheit kha a pokuh cih hae; ram kha a ccou cih hae, Jezreel nin tuh alesae cih.