Read Zotung Chin HOSEA 11 Bible Online

HOSEA 11 - Zotung Chin bible

HOSEA 11

¹Israel tuh a di lyakhe ka sungsah zah ka ccapaw kha Izip ram kyate ka ko.

²Minmin kha houh ka ko hae zah, ka kyate houh a cceih hae; Baal pachia hae kalan khe silawnaw rae hae zah, zohtuh hae kalan khe mynkhuhpaw kha a pya hae.

³Tuhzemah Efraim kha laanccia a ccangpahpaw tuh kamaw ka thua zah, minmin kha ka kuih te ka dua hae; thuasalama minmin ka dansah hae paw kha nyhkuh khyh hae.

⁴Ccungccaw thawccinaw rui te thuasah, sungsahnaw rui te thuasah ka cciakhae hae. Imua hae kha mih byaki kalan a hangthungtu hae hawte nynh kae tuh minmin hanlan ka thua. Minmin kha ka bakhungnua hae zah looh ka dang hae.

⁵Ka kalan kithui lan a mya hae keiccuze Izip ram lang a kithui cih hae zah Assiria tuh mih siapharan lang a tang cih.

⁶Thaloi rhaw nynh mih khuapi hae kha a thiing cih hae, khua koikua ccong hae kha a khyapah cih hae zah, ahoy leipaw mih khuakhannaw keiccuze phe a mih cih hae.

⁷Ka ccungccaw hae tuh ka kyate ccanglang maekute a cceihsei hae. Ahang Huaccepaw Pachia kha a ko hae, thuasalama aning nynh minmin kha papin hangthung khyh hae.

⁸Efraim, pawtemou nang kha kae vua kho cih? Pou Israel, pawtemou nang kha milae kalan kae ap kho cih? Admah khua hawte pawtemou nang kha kae roh kho cih? Zeboiim khua hawte pawtemou nang kha kae cyih kho cih? Ka lungkhu kya ka thinlung tuh arulaekuh vae; nang ngaethya ae umsahpaw ka thinlung tuh nebaleih.

⁹Ka thin myarya ria thyhte ka cyih lan khyh; Efraim kha bua ka roh vae lan khyh; pawccecize kae tuh Pachia ka thua zah ccungccaw ka thua khyh, nae laku a umpaw Athyaapaw Pachia ka thua zah, nae kalan thinriate kae thua lan khyh.

¹⁰Minmin tuh chindeih hawte a siapaw BAWIPAW nulang a zuikuh cih hae; aning nynh he a sia vae ze, a ccaaw hae tuh niccaw langte thyngkute oun thua cih hae.

¹¹Minmin tuh Izip ram kyate pavaw hawte arangte oun zou cih hae zah, Assiria ram kyate vahu hawte arangte oun zou cih hae; minmin kha mih inn lang ka kisah cih hae, cite BAWIPAW nynh a ci.

¹²Efraim nynh lingnaw bya te yn koihlu zah, Israel hae nynh hynhunaw bya te oun koihlu hae; thuasalama Judah tuh Pachia ryte po cceihkheih hae zah Athyaapaw Pachia tungvaw lungzinaw a hoi.