Read Zotung Chin HOSEA 13 Bible Online

HOSEA 13 - Zotung Chin bible

HOSEA 13

¹Efraim nynh bya a ho vae ze, ming hae tuh a thyngkuh hae; Israel hae nynh aning kha a hangthung hae; thuasalama Baal kha a beik keiccuze sei zah a chih.

²Atu mah po sei hae zah zohtuh kha a raeku hae, mih hawnaw thyhte ngun zohtuh hae kha raekuh hae zah, kuihhae hoy hae paw nynh zohtuh hae kha a rae hae. “E zohtuh hae kalan silawnaw rae oh,” a ci hae. Ccungccaw hae nynh vaetuataw zohtuh hae kha a myng hae!

³Tukeiccuze minmin tuh awkhua e vuiraw hawte thuasah, taloi azopaw dangtui hawte thuasah, huimin kyate khiccungkhiapaw nynh a zoukhaepaw ccatanphue hawte thuasah, thanlan-aw kyate apoupaw maeekhuh hawte thuasah a zo cih hae.

⁴Tuhzemah kae tuh Izip ram kyate ae cciakhaepaw BAWIPAW na Pachia nynh ka thua; kamaw laelan ccangpaw Pachia kha nang nynh na hoi khyh, kamaw laelan ccangpaw khumtu um khyh.

⁵Ram arounaw ramkaw kya looh ae dangpaw tuh kamaw nynh ka thua.

⁶Looh he ka dang hae tuh a byn hae; mih vueso zah lysakunaw thinlung a hoi hae keiccuze kae kha yn ning hae.

⁷Tukeiccuze kae tuh minmin hanlan chindeih hawte ka thua cih, kaesing hawte laanpi pe khe ka buh cih hae.

⁸A taw a luapya hae paw vong hawte minmin kha ka zounua cih hae zah, ka pue ka bou cih hae; tuin kyakhe chindeih hawte ka tei cih hae, loramsaw nynh minmin kha a bou hae hawte ka bou cih hae.

⁹Pou Israel, nang kha kae roh cih; hum nynh mou ae bawm kho cih?

¹⁰Nang ae khum kho cih paw na siapharan tuh atu teimou a um? “Siapharan te uktu bawi hae kha yn pya,” cite na ho hae paw nang ae uktu bawi hae tuh na khuapi hae kya a um hae tou?

¹¹Ka thinria pite siapharan kha kae pya zah, ka thin phe u lante aning kha bua ka law.

¹²Efraim a hoyleinaw kha tungde thua zah, a seinaw kha ccyke athua.

¹³Neitangia ccinaw nynh aning kha a thuanua vae, thuasalama aning tuh angaeepaw ccapaw nynh thua; pui azaw ccyh lya a nung vue kyate a pui leipaw imua hawte nynh athua.

¹⁴Minmin kha Sheol thungnaw kyate ka shawkhaw cih hae tou? Chinaw kyate ka shawkhaw cih hae tou? Pou chinaw, na kya-e shethya hae tuh teimou a um hae? Pou Sheol, na kya-e ronaw tuh teimou a um? Ngaethyaumsahnaw tuh ka muih leinaw kya thuruh athua.

¹⁵Efraim tuh phaeku hae laku kya hinlalyh lan a um zemah, nithua lang e khisan tuh yn zaw cih, BAWIPAW kya-e khisan tuh ramkaw langte yn zaw cih zah, a tuisung te a tuidy hae tuh karae arou cih. Tuh-e khisan nynh aphutepaw uccaw a tungkupaw miakaw kha pong a mung cih.

¹⁶Samaria nynh a Pachia kha a dou keiccuze detahnaw a teing cih; minmin tuh thaloi te a chih cih hae, mih ccaaw taraw hae tuh palae tui lan deihnaw athua cih hae zah, ccaawpoipaw mih nopi hae tuh mih vue kha seii athua cih hae.