Read Zotung Chin HOSEA 5 Bible Online

HOSEA 5 - Zotung Chin bible

HOSEA 5

¹Pou ranpibawi hae, e hynh thaetua oh! Pou Israel hae, e hynh pekitua oh! Pou siapharan hae, ngaetua oh! Nanning tuh byapianaw na teing cih oh; pawccecize nanning tuh Mizpah kya syapaw kaang, Tabor mua vawlan rawkhawpaw miabu,

²Shittim kya thaepaw laekarung akhupaw lang na tang vae oh; thuasalama tuh-e hae balyn kha de ka tah cih hae.

³Efraim kha ka ny, Israel tuh ka kyate thuruh kho thua lan khyh; Pou Efraim, atumaw heize na ohhuakuh vae; Israel tuh anungsikuh vae.

⁴Mih cyisahnaw nynh minmin kha mih Pachia kalan ki lan kaw-ua khyh hae. Pawccecize ohhuakunaw thinlung tuh mih lungkhu phang um zah, BAWIPAW kha nyh khyh hae.

⁵Israel a lysakunaw nynh amaw toulou kha a rawse; Efraim tuh a cyiseinaw kyakhe a thy a pawkuh; Judah mah minmin ryte a thy a pawkuh bua.

⁶Mih vaetua phu hae te mih tuuphu hae khate BAWIPAW ccung lan a ccia hae zemah, amaw kha muih lan khyh hae; aning tuh minmin te phe sawkuh vae hae.

⁷Minmin tuh BAWIPAW tungvaw mih lungzi vae khyh; pawccecize mih ccaaw hae tuh aphung thyhte saahpaw ccaaw hae thua vae khyh hae. Sawpaw sah leihpaw nynh minmin te mih loo hae kha a roh cih hae.

⁸Gibeah kya saki tu oh, Ramah kya mungkae tu oh. Beth-aven kya rhawtuknaw roi khate siatua oh; Benjamin phin hae, nulang dotua oh!

⁹Efraim tuh detahnaw nin kya arohpaw lang a tang cih; Israel phin hae laku kya yn cyihkuh lanpaw phe ariapaw kha ka thaesah hae.

¹⁰Judah bawi hae tuh ramri a nuepaw ccungccaw hae lang a tang vae hae; ka thinrianaw kha mih tungvaw kya tui hawte ka bu cih.

¹¹Efraim tuh tuaasahkunaw a teing, byapianaw kya phe a shung, pawccecize accakaepaw nulang zuiku lan bya a paeku.

¹²Tukeiccuze kae tuh Efraim hanlan zanpaw ka lo zah, Judah hae hanlan athuhpaw nynh ka lo.

¹³Efraim nynh a ccinaw kha muihkuh zah, Judah nynh mah a vaemaw kha he a muihkuh te, Efraim tuh Assiria lang cceih zah, alesaepaw siapharan kalan ccungccaw a saw hae. Thuasalama aning nynh nanning kha ae dansah kho lan khyh oh, nae vaemaw kha ae hoysah kho lan khyh oh.

¹⁴Pawccecize kae tuh Efraim hanlan chindeih hawte ka thua zah, Judah hae hanlan chindeih nopaw hawte nynh ka thua. Kamaw ccaccei nynh thoh ka pae cih hae zah ka cciataw cih hae; minmin kha ccaring ka cciakhae cih hae zah humhung nynh mah khum vae lan khyh hae.

¹⁵Minmin nynh mih cyiseinaw kha phykute ka mae yn ccung mawlaezung hae ka umnaw kalan bua ka kithui cih. Vawsaw a teing hae keiccuze ka thawccinaw kha yn ngiakuh cih hae.