Read Zotung Chin JOEL 2 Bible Online

JOEL 2 - Zotung Chin bible

JOEL 2

¹Zion kya mungkae tu oh; athyaapaw ka mua vawlan khe raeringnaw roi kha ccaesah oh! Ram kya um hae paw balyn tuh thyngkuh hae sah, pawccecize BAWIPAW nin tuh anae vae—

²tuh-e nin tuh mohnaw te mae-uinaw nin, maeking azi nin te marae zipingpaw mohnaw nin nynh thua! Mankakungpaw tuh mua hae vawlan a pazaeku hawte, lung hae zah athungpaw rhawkaw hae tuh oun cceih hae; tuhcihawpaw tuh langmawlya mah um boi khyh zah, malang ccyh kya mah um boi vae lan khyh.

³Mih malang khe maee rua zah, mih nulang khe maeesoi arua. Mih malang e ram tuh Eden khokhu te alokuh, thuasalama mih nulang e tuh pawpaw mah um leipaw ramkaw te nynh aloku, minmin kyate a luepaw um khyh.

⁴Minmin tuh marang muinsan te lokuh hae zah, rhawtuknawpaw marang hae hawte a ccue hae.

⁵Marangle hae siho hawte thuasah, athupaw maee-upaw siho hawte thuasah mua dung hae vawlan khe a thohkuh hae, rhawtuk lan a paccynkuh hae paw athungpaw rhawkaw hae hawte ataruinte a um hae.

⁶Mih malang khe ccungccaw hae tuh mih lungriathae zah, mih mae tuh dawkadae lan acih.

⁷Mih rawthunghua hae paw hawte ccue hae zah, rhawkaw hae hawte khualungrua kya a kae hae. Mih ccianaw kyate ccanglang maeku leite, mih laanpi raveih kha lawbabin lan a zui hae.

⁸Lu kheit te lu kheit eihkuh sei khyh hae, mawmaw laanpi raveih kha a zui hae; zunghe hae kya po cceih hae zah, minmin kha khee kho khyh hae.

⁹Khuapi kha naangbia hae zah, khualungrua vawlan a kae hae; inn tungvaw lang kae hae zah, miruh hawte thanlan-aw kyate a tee hae.

¹⁰Mih malang khe laephi tuh hy zah, vaawlui tuh a thyngkuh. Khuanin te sawpaw tuh moh hae zah, awsi hae tuh aw khyh hae.

¹¹BAWIPAW nynh a rhawkaw hae malang khe a roi a saw; a rhawkaw hae tuh myarya alung hae! A kaw a ngae hae paw tuh riatae um khyh hae. BAWIPAW nin tuh lesae zah ri lan a um ccaccing; hum nynh mou a teing kho cih?

¹²Tuhzemah atu heize BAWIPAW nynh a hopaw tuh, looh-aesung te, ngaethya rawkhuite, nae thinlung balyn te ka kalan oun ki oh;

¹³nae boeining kha seii leite, nae thinlung kha seii oh. BAWIPAW nae Pachia kalan kithui oh, pawccecize aning tuh thawccih thyapaw te ngaethyaumsah thyapaw thua zah, a lungsaepaw, atynpaw sungsahnaw te phe beihpaw, detahnaw kyate a synkuhpaw nynh thua.

¹⁴BAWIPAW nae Pachia hanlan ccathae silawnaw te niapaw silawnaw kha nanning nynh na pya nawlan oh, Pachia tuh lungpaleihkute yn ki cih zah, hythuanaw a cciataw te cciataw khyh kha hummou a ho kho?

¹⁵Zion kya mungkae tu oh; Looh-aesung ccyh kha thaesah oh, athyaapaw pumkunaw kha rae oh.

¹⁶Ccungccaw hae kha suelua oh lah, ccungccaw zapi hae kha thyaasah oh; mih kum tang hae paw kha pum oh lah, imua hae kha suelua oh, nosi hae kha heize nae by kya pomte suelua oh. Zudy ccangvaepaw tuh a khaan lungkhu te pou sah lah, akaenung liaccanung tuh zokhawboei lungkhu te pou sah.

¹⁷Ranpibawi hae te BAWIPAW ryalahtu hae tuh tee takawnaw akhaan te silawhang laku khe rah hae sah lah, “Pou BAWIPAW , na ccungccaw hae hynh ngaethya beih umsah hae, na rho ccungccaw hae hynh a nuinse hae paw lang oun rae nan lah, ccangpaw minphuin hae laku kya ccyasahnawpaw lang beih oun rae nan. ‘Mih Pachia tuh teimou a um,’ cite minphuin hae laku kya pawccemou a ho cih hae?” cite ho hae sah.

¹⁸Tetuh BAWIPAW nynh a ram hanlan thawte tua zah, a ccungccaw hae kha ngaethya a umsah hae.

¹⁹BAWIPAW nynh a ccungccaw hae kha leih hae zah: Nanning kha ccathae, misutui te chitui kae pya cih oh zah nae vueso cih; nanning kha minphuin hae laku kya nuinsepaw lang kae rae vae lan khyh oh.

²⁰Thahlang e rhawkaw hae kha nae kyate asawnaw lang ka nue cih hae zah, ramrou te ccungccaw adaenaw ram lang ka dee cih hae, malang um hae paw kha nithua lang e rili lungkhu lang, nulang um hae paw kha niccaw lang e rili lungkhu lang ka dee cih hae; mih rhua tuh athuh cih zah amyn cih. BAWIPAW nynh myarya lepaw rya kha a law ccaccing vae! cite a ho.

²¹Pou laephi, rih nan; lungtua lungpawte umtua, pawccecize BAWIPAW nynh myarya lepaw rya kha a law vae!

²²Ramkaw e loramsaw hae nanning, rih nan oh, pawccecize rampaeekunaw loram tuh hinlalyh lan a um, thingku hae nynh athae thae hae zah, thaeku ku te misu ku hae nynh athae patae a thae hae.

²³Pou Zion ccaaw hae, BAWIPAW nae Pachia tungvaw nae lungtua sah lah, nae lungpaw sah; pawccecize nanning thyaaccousah nawlan hawkhuaa kha a rawsah, langmawlya hawte nanning hanlan khuaatui te hawkhuaa kha patae a rawsah.

²⁴Huimin hae tuh ccathae te phe abeih cih hae zah, atui sunawpaw akhu hae tuh misutui te chitui khate a leikuh cih hae.

²⁵Tungkhipaw phu kya-e tungkhipaw adihpaw, ro a mangpaw tungkhipaw te tungkhipaw alepaw nynh a ae kum hae kya-e na shung oh paw kha kae pyaru cih oh; e hae tuh nanning kae sawnua oh paw myarya lungpaw ka rhawkaw hae nynh thua hae.

²⁶Ae lanpaw patae na hoi cih oh zah phe na byn cih oh, te nae tungvaw ngaeangnaw a raetupaw BAWIPAW nae Pachia min kha the na hoysah cih oh. Ka ccungccaw hae tuh maethyanaw kha papin teing vae lan khyh hae.

²⁷Kae tuh Israel hae ngaelung khe ka um zah, kae, BAWIPAW tuh nae Pachia nynh ka thua, ccangpaw Pachia um khyh cipaw na nyh cih oh. Ka ccungccaw hae tuh maethyanaw kha papin teing vae lan khyh hae.

²⁸Tukoute ccungccaw balyn tungvaw kya ka muisaw ka bu cih; nae ccapaw hae te nae ccanung hae nynh profehbya a ho cih hae, nae paawpi hae nynh maan a sah cih hae zah, nae ccangvae hae nynh vizin hae kha a muih cih hae.

²⁹Tuin nin kya vae tuh, seenung hae te seepaw hae kya heize ka muisaw kha ka bu cih.

³⁰Vaawlui te laephi vawlan khe ngaeangnaw hae kha ka langsakuh cih, chiise, maee te maeekhuh atungtung te um hae paw kha ka langsakuh cih.

³¹BAWIPAW kya-e alesaepaw te ri lan umpaw nin a thua mawkhe, khuanin tuh amoh cih zah sawpaw tuh chiise lang yn tang cih.

³²Tetuh BAWIPAW min a kopaw miakaw tuh khum athua cih; pawccecize BAWIPAW nynh a ho vae hawte, a lue hae paw tuh Zion Mua te Jerusalem khua kya a um cih hae, BAWIPAW nynh a ko hae paw tuh a hiinhy hae paw ryte a um cih hae.