Read Zotung Chin AMOS 2 Bible Online

AMOS 2 - Zotung Chin bible

AMOS 2

¹BAWIPAW nynh hynhte a ho: Moab nynh atu te atu seinaw a rae keiccuze detah leite ka um lan khyh; aning nynh Edom siapharan ru kha buhhaw lang phe tang lan maee te a u.

²Tukeiccuze Moab ram kha maee ka sawnua cih zah, tuh-e maee nynh Kerioth rhawlungrua hae kha a u cih, myarya ccae lan siathungnaw, siaruanaw te mungkae roi laku khe Moab hae tuh a chih cih hae;

³Moab ram angaelung khe uktu bawi kha ka vua cih zah, amaw ryte a kuihkaw e bawi hae balyn kha ka theih cih hae, cite BAWIPAW nynh a ho.

⁴BAWIPAW nynh hynhte a ho: Judah nynh atu te atu seinaw a rae keiccuze detah leite ka um lan khyh; pawccecize minmin nynh BAWIPAW kawbya kha vua hae zah, a phungbya kha zui khyh hae, mih minpaaw hae nynh a zui hae paw hynbya khate minmin kha cciakhaesei athua vae hae.

⁵Tukeiccuze Judah tungvaw maee ka sawnua cih zah, tuh-e maee nynh Jerusalem rhawlungrua hae kha a u cih.

⁶BAWIPAW nynh hynhte a ho: Israel nynh atu te atu seinaw a rae keiccuze detah leite ka um lan khyh; pawccecize minmin nynh miding hae kha ngun lang zua hae zah, minyaa hae kha phanah bua kheit lang a zua hae—

⁷ryachi hae lu kha laekhu e vuiping kya syde hae zah, zakawsang hae paw kha laante langkhe a tu hae; ka min thyaapaw kha thusah khylan paaw te ccaaw nynh nopi lu kheit kha a teenua hae;

⁸silawhang miakaw pe khe a lawku hae paw ponpaw boeining vawlan a i hae; detahnaw kyate a mue hae paw phua te a reku hae paw misutui kha mih Pachia inn kya a nia hae.

⁹Tuhzemah sidar thing ahang hawte hang zah, phaesi thing hawte a thungpaw Amor minphuin kha mih malang khe ka ro; avawlan umpaw Amor thae te akawlan umpaw Amor tharui kha ka ro.

¹⁰Amor hae ram kha ccou khylan, Izip ram kyate kae poukhae oh zah, ramkaw kya kum sung pali kae cciakhae oh.

¹¹Nae ccaaw hae abang kha profeh lang ka hangthung hae zah, nae mino hae abang kha nazir[1] hae lang ka hangthung hae. Pou Israel ccungccaw hae, tuh-e bya tuh ahmepaw thua ccaccing khyh tou? cite BAWIPAW nynh a ho.

¹²Thuasalama nanning nynh nazir hae kha misutui na niasah oh zah, profeh hae kha, “Profehbya na ho lan khyh,” cite kaw na pya oh.

¹³Tukeiccuze phe beih lan tarouhkuhpaw loohcce nynh le kha a nethin hawte, nae umnaw hmin kyakhe nanning kha kae nethin cih oh.

¹⁴Arangte a ccue khopaw nynh ccue man lan khyh zah, a thawsaepaw nynh a thawzung kha thua man lan khyh. A thungpaw nynh a hiinnaw kha khumkuh lan khyh;

¹⁵li a ccyngkuhpaw nynh thadyn man lan khyh zah, arangte a ccue khopaw nynh mah amaw kha khumkuh man lan khyh, marang rhawkaw nynh mah a hiinnaw kha khumkuh man lan khyh;

¹⁶tuin nin kya tuh a thung hae paw laku e mih thinlung tang hae paw nynh mah mih sasete a ccue cih hae, cite BAWIPAW nynh a ho.