Read Zotung Chin AMOS 3 Bible Online

AMOS 3 - Zotung Chin bible

AMOS 3

¹Izip ram kyate minphuin pynpi te ka poukhae hae paw, pou Israel ccungccaw hae, BAWIPAW nynh nanning ae honua oh paw e bya hynh ngaetua oh:

²Laephi vawlan e minphuin hae balyn kyaze nanning kyalya kha kae ny oh; tukeiccuze nae hoyleinaw balyn hanlan de kae tah cih oh.

³Ccungccaw lu ning nynh nawccawnaw hoity leite pynkheihlan khua a ccongkheih thya hae zawtou?

⁴Chindeih tuh teipaw saw a hoi leite ramkaw kya a sia zawtou? Chindeih anopaw tuh pawpaw sanmah a kyngkuh leite a karung kyate a sia zawtou?

⁵Lae vawlan khe kaangsya leite, pavaw tuh kaang a kae zawtou? Kaang tuh a pheihtu a um leite a seihkuh boi zawtou?

⁶Khua lungkhu kya mungkae kha tu athua ze, khuaccaaw hae tuh ri leite a um hae zawtou? BAWIPAW nynh ronaw a thuasah leite, khua lungkhu kya ronaw a thua zawtou?

⁷Bawipaw PACHIA nynh a paccynpaw kha a ryalahtu profeh hae kya a langsakuh leite, pawpaw sanmah cyih khyh.

⁸Chindeih nynh he a sia vae ze, hummou ri leite a um cih? Bawipaw PACHIA nynh bya he a ho vae ze, hummou profehbya ho leite a um kho?

⁹Ashdod te Izip kya-e rhawlungrua hae kha thaesah hae lah, “Samaria mua vawlan pumkuh oh, Samaria khua lungkhu kya siarisiaraepaw roi te tuaasahkunaw a umpaw kha dotua oh,” cite hopah hae.

¹⁰Minmin nynh akyhpaw cyi lanpaw kha nykuh khyh hae, mih inn ahoyhoy hae paw kyakhe puathonaw te a luade hae paw uccaw hae kha a ccakhung hae, cite BAWIPAW nynh a ci.

¹¹Tukeiccuze Bawipaw PACHIA nynh hynhte a ho: Rhaw nynh ram kha a koihlu cih zah, na koihkhawkupaw kha ae phoupah cih; na inn ahoyhoy hae paw kha luadete a roh cih hae.

¹²BAWIPAW nynh hynhte a ho: Tuurinpaw nynh tuu accu ccangning khyhze nakua ccapyh kha chindeih khalang kyate a khum hawte, Samaria khua umpaw iphae adung te ikhung apaekua vawlan a haung hae paw Israel hae beihtaraw kha khum athua cih hae.

¹³Bawipaw PACHIA, vaaw Pachia nynh a hopaw kha ngae oh lah, Jakob ciihan hae kha honua oh:

¹⁴Israel kha a seinaw keiccuze de ka tah nin khe, Bethel kya umpaw silawhang hae kha de ka tah cih hae, silawhang a ki hae kha moi athua cih hae zah laekhu lang a ccah cih hae.

¹⁵Khuaccih ccyh lya-e inn te hawnin ccyh lya-e inn kha ka phou cih hae; saepaw nua te a ccaan hae paw inn hae kha ka roh cih, myarya lepaw inn hae tuh a zo vae cih hae, cite BAWIPAW nynh a ho.