Read Zotung Chin AMOS 8 Bible Online

AMOS 8 - Zotung Chin bible

AMOS 8

¹E hynh Bawipaw PACHIA nynh kae yn muihsahpaw nynh thua—hawnin ccyh e thingthae a umnahpaw shua shuakheit alangkuh.

²BAWIPAW nynh, “Amos, pawmou na muih?” cite yn khia zah, kae nynh, “Hawnin ccyh e thingthae shua kheit kha ka muih,” ka cipya. Tetuh BAWIPAW nynh kae kha, “Ka ccungccaw Israel hae tungvaw kya athangnaw tuh a thua vae; minmin kha papin bua ka ngaesangpah vae lan khyh hae.

³Tuin nin vae tuh beikinn e hlawsah hae paw roi tuh rawkhuinaw roi lang a tang cih. Michi rhua patae a um cih zah, hmin takyh kya a vua cih hae, “Daebabi lan um oh! a ci cih hae,” cite Bawipaw PACHIA nynh a ci.

⁴Minyaa hae kha syde hae zah, ram kya-e ryachi hae kha ro lan a ry hae paw nanning, e bya hynh ngaetua oh,

⁵nanning nynh, “Looh kha zua khylan, hohtuh vema sawpaw sah thawpaw tuh athang cih; chanvuih kha zua khylan, hohtuh vema sabbath tuh athang cih? Ephah kha disah lan zah, shekel kha lesah lan, ahme leipaw zawccu khate ling lan hae,

⁶ahoy leipaw chanvuih kha zua lan zah, ryachi hae kha ngunphua te re lan hae, minyaa hae kha phanah bua kheit te re lan hae,” cite na hoku oh.

⁷BAWIPAW nynh Jakob lesaenaw liate bya a kinku vae: Mih cyisahnaw kha papin ka ning lan khyh.

⁸E keiccuze laephi tuh hy leite a um cih zawtou? Laephi vawlan um hae paw balyn tuh rawkhui leite a um cih hae zawtou? Ram pynpi tuh Nal vawpi hawte a thokuh cih zah, Izip ram e Nal vawpi hawte a le koute siibung leite a um cih zawtou?

⁹Bawipaw PACHIA nynh a hopaw tuh, tuin nin vae tuh, ninthu ccyh kya khuanin kha ka ccawsah cih zah, khuadae a aw ccyh khe laephi kha ka mohsah cih.

¹⁰Nae poi hae kha rawkhuinaw lang ka tangsah cih zah, nae hlaw hae kha rawnaw hlaw lang ka tangsah cih; ccungccaw balyn kha mih tae kya buriboei ka voisakuh cih hae zah, mih lu kha marya ka o cih hae; ccapaw lu kheit kyalyapaw chih zah a raw hae hawte nae poi kha ka thuasah cih zah, poi athangnaw tuh myarya khahpaw nin hawte ka thuasah cih.

¹¹Bawipaw PACHIA nynh a hopaw tuh, ram lungkhu kya ccakannaw ccyh tuh yn thua ccaccing cih; looh hanlan ccakannaw thua khyh, tui hanlan kanmawnaw mah thua leite, BAWIPAW bya thaenaw hanlan ccakannaw athua cih.

¹²Ccungccaw hae nynh BAWIPAW bya kha ccungte, a ccue bungthung cih hae, rili ccangkheit kyate rili ccangkheit kyacia, thahlang te nithua lang cia a khiakuh cih hae, thuasalama muih lan khyh hae.

¹³Tuin nin vae tuh apuithyapaw liaccaw hae te ccangvae hae tuh tui kanmawte a bang cih hae.

¹⁴Samaria hae pachia Ashimah min te thyalawkute byakinkuh hae zah, “Pou Dan, na pachia tuh a hiin thyhte,” cite ho hae zah, “Beersheba laanpi tuh a hiin thyhte,” cite a hotu hae tuh a khuliakuh cih hae zah papin thokuh vae lan khyh hae.