Read Zotung Chin OBADIAH 1 Bible Online

OBADIAH 1 - Zotung Chin bible

OBADIAH 1

¹Obadiah nynh a muihpaw vizin. Edom ram konglang kha Bawipaw PACHIA nynh hynhte a ho: BAWIPAW nynh minphuin hae kalan khe locceihtu kha saw zah: “Thoku tua oh! Edom kha rhawtuk khylan thonuakuh oh sih!” a cipaw bya kha ah thae vae oh.

²Nang kha minphuin hae laku kya adih huaccepaw lang kae rae ccaccing cih; nang tuh dothatheihpaw na thua cih.

³A lysakuhpaw na thinlung nynh nang kha ae ling vae, nang tuh lungtungpi hae laku khe na um zah, ahangpaw hmin hae kya na um. Na thinlung kyakhe, “Hum nynh mou laekhu lang yn sahbung kho cih?” na ciku.

⁴Nang tuh mosipi hawte na hangkuh thung zah, awsi hae laku khe bu na luaku zemah, tuin kyate kae sahbung cih, cite BAWIPAW nynh a ci.

⁵Nang tuh pawcihtemou ro na thua! Miruh hae nynh na kalan oun thua hae ze thuasah, luadetu hae nynh khuazi khe oun thua hae ze thuasah, a ry hae paw kyalya kha ruh khyh hae tou? Misu thae lotu hae nynh na kalan oun thua hae ze, a lobang hae paw beihtaraw kha cciataw khyh hae tou?

⁶Esau uccaw kha phe luade vae hae, a thuruhpaw a sisua hae kha ccung hae zah a lua vae hae!

⁷Na hokuhbung oh paw balyn nynh nang kha ae ling vae hae, nang kha ramri langkhe ae dee vae hae; na vaeccawkuh oh paw nynh ae tae vae hae; na looh a ae hae paw nynh kaang ae syakhaw vae hae, tuh-e kong kha nythyanaw na hoi vae khyh.

⁸BAWIPAW nynh a hopaw tuh, tuin nin vae tuh, Edom ram e a haw hae paw te Esau Mua e nythyanaw a hoi hae paw kha ka roh cih hae.

⁹Pou Teman, na rhawkaw hae tuh mih bungzou cih, tuhteze nynh Esau Mua a um hae paw balyn kha chia athua cih hae.

¹⁰Nang nynh na uno Jakob kha puathote na chia keiccuze maethyanaw na mue cih zah, phe thang lan chia na thua cih.

¹¹Minphuin ccangpaw hae nynh a sisua kha a cciakhae lya hae khe, ramccang hae nynh a koikua lungkhu lang teenua hae zah, Jerusalem e uccaw hae kha ccungthydungte a neeku hae nin khe, nang tuh ccanglang khe namaw um lan zya na um nin kya, nang mah ramccang hae ryte nae lunglokuh bua.

¹²Na unopaw vethyanaw a tung nin khe, na unopaw tungvaw kya lunghoy na ria lan ccan khyh; Judah ccungccaw hae a ro nin hae khe, nang tuh lungpawte na um lan ccan khyh; riathaenaw a tung nin hae khe, nang tuh na pooku lan ccan khyh.

¹³Ka ccungccaw hae nynh shethya a tung lya hae khe, mih koikua lungkhu lang na tee lan oh ccan khyh. Judah nynh shethya a tung nin, aning a vawsaw nin kha lunghoy na ria lan ccan khyh; aning nynh shethya a tung nin khe, a uccaw kha na luade lan ccan khyh.

¹⁴Lue khylan a ccue hae paw kha chia khylan, laanpi a tungkunaw kya na thadyn khaw lan hae ccan khyh; mih vawsaw nin kya, a hiinhy hae paw kha rhaw hae kuih kya na ap lan hae ccan khyh.

¹⁵Minphuin hae balyn tungvaw kya BAWIPAW byapianaw nin tuh anae vae. Na cyi hawte na tungvaw cyi athua cih; na cyisahnaw tuh na lu vawlan accah cih.

¹⁶Nanning ka ccungccaw hae nynh athyaapaw ka mua vawlan na ae na la nia oh keiccuze nae pepan e minphuin hae balyn nynh a ae a neih cih hae; minmin nynh a neih cih hae, a due cih hae zah marya a zo cih hae.

¹⁷Thuasalama Zion Mua vawlan khe a lue hae paw tuh a um cih hae zah, tuh-e hmin tuh hmin thyaa athua cih. Jakob ciihan hae nynh mih ram a la luatu hae kha a luaru cih hae.

¹⁸Jakob ciihan hae tuh maee athua cih hae zah, Josef ciihan hae tuh maeesoi athua cih hae, Esau ciihan hae tuh athupaw athua cih hae, maee te a soi cih hae zah minmin kha a u cih hae, Esau ciihan a hiinhypaw um lan khyh hae; pawccecize BAWIPAW nynh phe a ho vae.

¹⁹Negeb kya um hae paw nynh Esau Mua kha a ccou cih hae, Shefelah kya um hae paw nynh Filistin ram kha a ccou cih hae, minmin nynh Efraim ram te Samaria ram kha a ccou cih hae, Benjamin ccungccaw hae nynh Gilead ram kha a ccou cih hae.

²⁰Kyngte cciakhae thua hae zah Halah kya um hae paw Israel hae nynh Foenisia ram kha Zarefath khua kyacia a ccou cih hae; kyngte cciakhae thua hae zah Sefarad kya um hae paw Jerusalem khuaccaaw hae nynh Negeb ram kya um hae paw khua hae kha a ccou cih hae.

²¹Khum athua hae paw tuh Esau Mua kha uk khylan, Zion Mua lang a kaethung cih hae; te peenaw tuh BAWIPAW peenaw athua cih.